ಹೊಸದಿಲ್ಲಿ: ಆಧುನಿಕ ಬ್ಯಾಟಿಂಗ್ ದಿಗ್ಗಜ ವಿರಾಟ್ ಕೊಹ್ಲಿಯನ್ನು ಕ್ರಿಕೆಟ್ ದಂತಕತೆ ಸಚಿನ್ ತೆಂಡೂಲ್ಕರ್ಗೆ ಹೋಲಿಕೆ ಮಾಡುವುದನ್ನು ನಿಲ್ಲಿಸಬೇಕೆಂದು ಪಾಕಸ್ತಾನ ಮಾಜಿ ವೇಗಿ ಆಗ್ರಹಿಸಿದ್ದಾರೆ. ಸ್ಪೋರ್ಟ್ಸ್ಕೀಡಾ ಸಂದರ್ಶನದಲ್ಲಿ ಮಾತನಾಡಿರುವ 45ರ ಪ್ರಾಯದ ಮಾಜಿ ವೇಗಿ, "ಇಡೀ ವಿಶ್ವದಲ್ಲಿಯೇ ಗಂಟೆಗೆ 150 ಕಿಮೀ ವೇಗದಲ್ಲಿ ಬೌಲ್ ಮಾಡುವ ಎಷ್ಟು ಮಂದಿ ವೇಗಿಗಳನ್ನು ನೀವು ನೋಡಿದ್ದೀರಿ? ಹಾಗೂ ಹಳೆಯ ಸಾಂಪ್ರದಾಯದಂತೆ ಆಡಲು ಎಷ್ಟು ಆಟಗಾರರಿಗೆ ಇಲ್ಲಿ ಅವಕಾಶ ಕಲ್ಪಿಸಲಾಗಿದೆ? ಎಂದು ಪ್ರಶ್ನೆ ಮಾಡಿದರು. "ಇತ್ತೀಚಿನ ದಿನಗಳಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಸಮಿತಿಯು ಸಾಕಷ್ಟು ನಿರ್ಬಂಧಗಳನ್ನು ಹೇರಿದೆ. ಟಿಆರ್ಪಿ ಗಿಮಿಕ್ನಿಂದ ಆಟದ ಸ್ವರೂಪವನ್ನೇ ಕಡೆಗಣಿಸಲಾಗುತ್ತಿದೆ. ಆದರೆ, ನೀವು ಆಟದಲ್ಲಿ ಪ್ರಾಮಾಣಿಕ ಪಾತ್ರಗಳನ್ನು ಕಣ್ತುಂಬಿಸಿಕೊಳ್ಳಬೇಕಾದರೆ, ಹೇರಿರುವ ನಿರ್ಬಂಧಗಳನ್ನು ತೆಗೆದುಹಾಕುವ ಅಗತ್ಯವಿದೆ," ಎಂದು ಅಖ್ತರ್ ಹೇಳಿದರು. ವಿಶ್ವದ ಬ್ಯಾಟ್ಸ್ಮನ್ಗಳಿಗೆ ನಡುಕ ಹುಟ್ಟಿಸುವ ವೇಗದಲ್ಲಿ ಬೌಲ್ ಮಾಡುತ್ತಿದ್ದ ಶೊಯೆಬ್ ಅಖ್ತರ್, ಮಾಸ್ಟರ್ ಬ್ಲಾಸ್ಟರ್ ಅವರ ಬ್ಯಾಟಿಂಗ್ ಕೌಶಲವನ್ನು ಗುಣಗಾನ ಮಾಡಿದ್ದಾರೆ. ಸಚಿನ್ ತಮ್ಮ ಅವಧಿಯಲ್ಲಿ ವಿಶ್ವದ ಹಲವು ಗುಣಮಟ್ಟದ ಹಾಗೂ ಮಾರಕ ಬೌಲರ್ಗಳನ್ನು ಎದುರಿಸಿದ್ದರು. ಆದರೆ, ಈಗಿನ ಸನ್ನಿವೇಶದಲ್ಲಿ ಅಂತಹ ಬೌಲರ್ಗಳು ಸಿಗುವುದು ಅಪರೂಪ ಎಂದಿದ್ದಾರೆ. "ಏನೇ ಆಗಲಿ ಸಚಿನ್ ತೆಂಡೂಲ್ಕರ್ ಅವರನ್ನು ನಾವು ಗುಣಗಾನ ಮಾಡಲೇಬೇಕಾಗಿದೆ. ತಮ್ಮ ಕಾಲದಲ್ಲಿ ಅತ್ಯಂತ ಭಯಾನಕ ಬೌಲರ್ಗಳನ್ನು ಎದುರಿಸಿರುವ ಸಚಿನ್ಗೆ ವಿರಾಟ್ ಕೊಹ್ಲಿಯನ್ನು ಹೋಲಿಕೆ ಮಾಡುವುದನ್ನು ನಿಲ್ಲಿಸಬೇಕು. ಸಚಿನ್ ತೆಂಡೂಲ್ಕರ್ ಆಡಿರುವಷ್ಟು ಕ್ರಿಕೆಟ್ ಕೊಹ್ಲಿ ಆಡಿಲ್ಲ. ರಿವರ್ಸ್ ಸ್ವಿಂಗ್ ಸ್ಟಾರ್ಗಳಾದ ವಸೀಮ್ ಅಕ್ರಮ್, ವಖಾರ್ ಯೂನಿಸ್ ಹಾಗೂ ಸ್ಪಿನ್ ದಿಗ್ಗಜ ಶೇನ್ವಾರ್ನ್ ಅವರಂತಹ ಶ್ರೇಷ್ಠ ಬೌಲರ್ಗಳನ್ನು ಸಚಿನ್ ಎದುರಿಸಿದ್ದಾರೆ, ಎಂದರು. "ಆ ಕಾಲದಲ್ಲಿ ಪ್ರತಿ ತಂಡದಲ್ಲಿಯೂ ವಿಶೇಷ ಫಾಸ್ಟ್ ಬೌಲರ್ಗಳಿದ್ದರು. ಲ್ಯಾನ್ಸ್ ಕ್ಲಸ್ನರ್, ಜಾಕ್ ಕಾಲಿಸ್, ಶಾನ್ ಪೊಲಾಕ್, ಅಲಾನ್ ಡೊನಾಲ್ಡ್, ಮಖಾಯ್ ಎನ್ಟಿನಿ ಸೇರಿ ಒಂದು ತಂಡದಲ್ಲಿ ಐವರು ಗುಣಮಟ್ಟದ ವೇಗಿಗಳು ತಂಡದಲ್ಲಿದ್ದರು. ಆದರೆ, ಈಗ ಎಷ್ಟು ಮಂದಿ ಅಂತಹ ಗುಣಮಟ್ಟದ ಬೌಲರ್ಗಳಿದ್ದಾರೆ? ಆಯ್ತು, ಪ್ಯಾಟ್ ಕಮಿನ್ಸ್, ಜಾಶ್ ಹೇಝಲ್ವುಡ್ ಇದ್ದಾರೆ. ಆದರೆ, ನಂತರ ಯಾರಿದ್ದಾರೆ?' ಎಂದು ಅಖ್ತರ್ ಪ್ರಶ್ನೆ ಮಾಡಿದರು. ಅಂತಾರಾಷ್ಟ್ರೀಯ ಕ್ರಿಕೆಟ್ನ ಅತ್ಯಂತ ಫಾಸ್ಟ್ ಬೌಲರ್ಗಳಲ್ಲಿ ರಾವಲ್ಪಿಂಟಿ ಖ್ಯಾತಿಯ ಶೊಯೆಬ್ ಅಖ್ತರ್ ಕೂಡ ಒಬ್ಬರಾಗಿದ್ದಾರೆ. ಅವರು 178 ಟೆಸ್ಟ್ ವಿಕೆಟ್ಗಳು ಹಾಗೂ 247 ಓಡಿಐ ವಿಕೆಟ್ಗಳನ್ನು ಕಬಳಿಸಿದ್ದಾರೆ. ಅಂದಹಾಗೆ 2003ರ ವಿಶ್ವಕಪ್ ಟೂರ್ನಿಯ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಗಂಟೆಗೆ 161.3 ಕಿ.ಮೀ ವೇಗದಲ್ಲಿ ಬೌಲ್ ಮಾಡುವ ಮೂಲಕ ಅಖ್ತರ್ ವಿಶ್ವ ದಾಖಲೆ ಮಾಡಿದ್ದರು. ಅಲ್ಲದೆ, ಗಂಟೆಗೆ 100 ಮೈಲಿ ವೇಗವಾಗಿ ಬೌಲ್ ಮಾಡಿದ ದಾಖಲೆ ಕೂಡ ಇವರ ಹೆಸರಿನಲ್ಲಿಯೇ ಇದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3wTAsrS
