ಹೊಸದಿಲ್ಲಿ: ಇಂಗ್ಲೆಂಡ್ ಸೌತಾಮ್ಟನ್ನಲ್ಲಿ ಜೂನ್ 18 ರಿಂದ 22ರವರೆಗೆ ನಡೆಯುವ ಉದ್ಘಾಟನಾ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್ ಹಣಾಹಣಿಯಲ್ಲಿ ಭಾರತ ಹಾಗೂ ತಂಡಗಳು ಮುಖಾಮುಖಿಯಾಗಲಿವೆ. ಈ ಮಹತ್ವದ ಪಂದ್ಯದಲ್ಲಿ ಗೆಲ್ಲಬಹುದಾದ ತಂಡದ ಬಗ್ಗೆ ಹಲವು ಹಾಲಿ ಹಾಗೂ ಮಾಜಿ ಕ್ರಿಕೆಟಿಗರು ತಮ್ಮದೇ ಆದ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದಾರೆ. ಕಳೆದ ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ನ್ಯೂಜಿಲೆಂಡ್ ಪೈನಲ್ನಲ್ಲಿ ಸೋತಿತ್ತು. ಮತ್ತೊಂದೆಡೆ ಭಾರತ ತಂಡ ನಿಯಮಿತವಾಗಿ ಐಸಿಸಿ ಟೂರ್ನಿಗಳಲ್ಲಿ ನಾಕೌಟ್ ತಲುಪುತ್ತಿದೆ. 2015 ಹಾಗೂ 2019ರ ಏಕದಿನ ವಿಶ್ವಕಪ್ ಟೂರ್ನಿಗಳಲ್ಲಿ ಭಾರತ ಸೆಮಿಫೈನಲ್ ತಲುಪಿತ್ತು. 2016 ಟಿ20 ವಿಶ್ವಕಪ್ನಲ್ಲಿ ಸೆಮಿಫೈನಲ್ ಹಾಗೂ 2017ರ ಚಾಂಪಿಯನ್ಸ್ ಟ್ರೋಫಿಯಲ್ಲಿ ಕೊಹ್ಲಿ ಪಡೆ ರನ್ನರ್ ಅಪ್ ಆಗಿತ್ತು. ಐಸಿಸಿ ಟೂರ್ನಿಗಳಲ್ಲಿ ನಿಯಮಿತವಾಗಿ ನಾಕೌಟ್ ಆಡುತ್ತಿರುವ ಟೀಮ್ ಇಂಡಿಯಾಗೆ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್ ಹಣಾಹಣಿಯಲ್ಲಿ ಗೆಲ್ಲುವ ಸಾಧ್ಯತೆ ಇದೆ ಎಂದೇ ಹೇಳಬಹುದು. ಏಕೆಂದರೆ ಭಾರತ ತಂಡದಲ್ಲಿ ಮ್ಯಾಚ್ ವಿನ್ನಿಂಗ್ ಪ್ರದರ್ಶನ ತೋರುವ ಹಲವು ಆಟಗಾರರು ತಂಡದಲ್ಲಿದ್ದಾರೆ. ಈ ಹಿನ್ನೆಲೆಯಲ್ಲಿ ಡಬ್ಲ್ಯುಟಿಸಿ ಫೈನಲ್ ಸವಾಲು ಕೊಹ್ಲಿ ಪಡೆಗೆ ಹೋಲಿಕೆಯಾಗುತ್ತದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. "ಖಂಡಿತಾ ಇದು ಕಠಿಣ ಪಂದ್ಯವಾಗಿರುತ್ತದೆ. ಸೌತಾಮ್ಟನ್ ಪಿಚ್ನಲ್ಲಿ ಯಾವ ಬೌಲರ್ ಅತ್ಯುತ್ತಮವಾಗಿ ಬೌಲಿಂಗ್ ಮಾಡುತ್ತಾರೆಂದು ನೀವು ನೋಡಬೇಕಾಗಿದೆ. ಭಾರತ ತಂಡದ ಲೈನ್ಅಪ್ ಬಗ್ಗೆ ಮಾತನಾಡುವುದಾದರೆ, ಅವರು ಉತ್ತಮ ಪ್ರದರ್ಶನ ತೋರುತ್ತಿದ್ದಾರೆ. ಕಿವೀಸ್ ರೀತಿಯಲ್ಲಿಯೇ ಕೊಹ್ಲಿ ಬಳಗದಲ್ಲಿ ಉತ್ತಮ ಪ್ರತಿಭೆಗಳಿದ್ದಾರೆ. ಇಲ್ಲಿನ ಸವಾಲಿಗೆ ಭಾರತ ಹೋಲಿಕೆಯಾಗುತ್ತದೆ," ಎಂದು ಐಸಿಸಿಗೆ ಲೀ ಹೇಳಿದ್ದಾರೆ. ಭಾರತ ತಂಡ ಗುರುವಾರ ಏಗಾಸ್ ಬೌಲ್ ಹೋಟೆಲ್ ತಲುಪಿದ್ದು, ಬಯೋ ಬಬಲ್ಗೆ ಪ್ರವೇಶ ಮಾಡುವುದಕ್ಕೂ ಮುನ್ನ ಕ್ವಾರಂಟೈನ್ ಮುಗಿಸಬೇಕಾಗಿದೆ. ಮತ್ತೊಂದೆಡೆ ನ್ಯೂಜಿಲೆಂಡ್ ತಂಡ ಈಗಾಗಲೇ ಇಂಗ್ಲೆಂಡ್ ವಿರುದ್ಧ ಎರಡು ಪಂದ್ಯಗಳ ಟೆಸ್ಟ್ ಸರಣಿಯ ಮೊದಲನೇ ಕಾದಾಟದಲ್ಲಿದೆ. ಲಾರ್ಡ್ಸ್ ಪಂದ್ಯ ಮುಗಿದ ಬಳಿಕ ಎರಡನೇ ಪಂದ್ಯವಾಡಲಿದೆ. ಈ ಹಿನ್ನೆಲೆಯಲ್ಲಿ ಕೇನ್ ವಿಲಿಯಮ್ಸನ್ ಪಡೆ, ಭಾರತದ ವಿರುದ್ಧ ಡಬ್ಲ್ಯಟಿಸಿ ಫೈನಲ್ನಲ್ಲಿ ಪ್ರಾಬಲ್ಯ ಸಾಧಿಸಬಹುದೆಂದು ಲೀ ಭಾವಿಸಿದ್ದಾರೆ. "ನ್ಯೂಜಿಲೆಂಡ್ ವಾತಾವರಣಕ್ಕೆ ತಕ್ಕಂತೆ ನಾನು ಮಾತನಾಡುತ್ತೇನೆ. ಏಕೆಂದರೆ, ಇಲ್ಲಿಯೂ ಕೂಡ ಪಿಚ್ ಅದೇ ರೀತಿ ಇದೆ. ಚೆಂಡು ಹಚ್ಚಿನ ಚಲನೆಯನ್ನು ಹೊಂದಿದೆ. ಇಂತಹ ಪಿಚ್ಗಳಲ್ಲಿ ಬೌಲಿಂಗ್ ಮಾಡಿದ ಅನುಭವವನ್ನು ಕಿವೀಸ್ ವೇಗಿಗಳು ಹೊಂದಿದ್ದಾರೆ. ಹಾಗಾಗಿ, ಇದು ಫೈನಲ್ ಹಣಾಹಣಿಯಲ್ಲಿ ಪ್ರಮುಖ ಪಾತ್ರವಹಿಸಬಹುದೆಂದು," ಬ್ರೆಟ್ ಲೀ ಹೇಳಿದ್ದಾರೆ. "ಈ ಅಂಶದಿಂದ ನ್ಯೂಜಿಲೆಂಡ್ ಒಂದು ಕೈ ಮೇಲುಗೈ ಸಾಧಿಸಬಹುದೆಂದು ನಾನು ಭಾವಿಸುತ್ತೇನೆ. ಬ್ಯಾಟಿಂಗ್ ಬಗ್ಗೆ ಮಾತನಾಡುವುದಾದರೆ, ಎರಡೂ ತಂಡಗಳಲ್ಲಿ ಉತ್ತಮ ಬ್ಯಾಟ್ಸ್ಮನ್ಗಳಿದ್ದಾರೆ, ಆದರೆ, ಸ್ವಿಂಗ್ ಬೌಲಿಂಗ್ ಎದುರಿಸುವುದರಲ್ಲಿ ಎಲ್ಲವೂ ಅವಲಂಬಿತವಾಗಿದೆ. ಆದರೆ, ಪಂದ್ಯದಲ್ಲಿ ಬೌಲಿಂಗ್ ಪ್ರಮುಖ ಪಾತ್ರವಹಿಸುತ್ತದೆ. ಉತ್ತಮವಾಗಿ ಬೌಲ್ ಮಾಡುವ ತಂಡ ಫೈನಲ್ ಹಣಾಹಣಿ ಗೆಲ್ಲಲಿದೆ," ಎಂದು ಬ್ರೆಟ್ ಲೀ ತಿಳಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3fLoHhL
