ಬೀಜಿಂಗ್ (ಚೀನಾ): ಚೀನಾದ ಅಧ್ಯಕ್ಷ ಕ್ಸಿ ಜಿನ್ಪಿಂಗ್ ಅವರು ಅರುಣಾಚಲ ಪ್ರದೇಶದ ಗಡಿಯ ಆಯಕಟ್ಟಿನ ಸ್ಥಳದಲ್ಲಿರುವ ಟಿಬೆಟ್ನ ನೈಯಿಂಗ್ಚಿ ಪಟ್ಟಣಕ್ಕೆ ಚೊಚ್ಚಲ ಹಾಗೂ ಅಪರೂಪದ ಭೇಟಿ ನೀಡುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ. ಇಲ್ಲಿನ ಮೈನ್ಲಿಂಗ್ ವಿಮಾನ ನಿಲ್ದಾಣದ ಮೂಲಕ ಅವರು ಕಳೆದ ಬುಧವಾರ ಈ ಪ್ರದೇಶಕ್ಕೆ ಭೇಟಿ ನೀಡಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಭಾರತ - ಚೀನಾ ಗಡಿಯಲ್ಲಿರುವ ಈ ಪಟ್ಟಣಕ್ಕೆ ಭೇಟಿ ನೀಡಿದ ಮೊದಲ ಅಧ್ಯಕ್ಷರೂ ಇವರೇ ಆಗಿದ್ದಾರೆ. 68 ವರ್ಷದ ಕ್ಸಿ ಜಿನ್ಪಿಂಗ್ ಅವರ ಭೇಟಿಯನ್ನು ಶುಕ್ರವಾರದವರೆಗೂ ಚೀನಾ ಮಾಧ್ಯಮಗಳು ರಹಸ್ಯವಾಗಿರಿಸಿದ್ದವು. ಪೂರ್ವ ಲಡಾಕ್ನಲ್ಲಿ ಭಾರತ - ಚೀನಾ ಸೇನೆಗಳ ಸಂಘರ್ಷ ಹಾಗೂ ಗಡಿಯಲ್ಲಿ ಬಿಗುವಿನ ಪರಿಸ್ಥಿತಿ ನಡುವೆಯೇ ಕ್ಸಿ ಭೇಟಿ ಗಮನ ಸೆಳೆದಿದೆ. ಭೇಟಿ ವೇಳೆ ಕ್ಸಿ ಜಿನ್ಪಿಂಗ್ ಅವರು ಇಲ್ಲಿರುವ ನ್ಯಾಂಗ್ ನದಿಯ ಸೇತುವೆಗೆ ಭೇಟಿ ನೀಡಿ, ಬ್ರಹ್ಮಪುತ್ರ ನದಿ ಪಾತ್ರದ ಪ್ರದೇಶದಲ್ಲಿನ ಪರಿಸರ ಸಂರಕ್ಷಣೆ ಬಗ್ಗೆ ಪರಿಶೀಲನೆ ನಡೆಸಿದರು. ಟಿಬೆಟ್ ಭಾಷೆಯಲ್ಲಿ ಯರ್ಲುಂಗ್ ಜಾಂಗ್ಬೊ ಎಂದು ಕರೆಯಲಾಗುವ ಬ್ರಹ್ಮ ಪುತ್ರಾ ನದಿಗೆ ಅಡ್ಡಲಾಗಿ 14ನೇ ಹಣಕಾಸು ವರ್ಷದಲ್ಲಿ ಬೃಹತ್ ಅಣೆಕಟ್ಟು ಕಟ್ಟುವ ಯೋಜನೆಗೆ ಚೀನಾ ಸರಕಾರ ಈಗಾಗಲೇ ಅನುಮೋದನೆ ನೀಡಿದೆ. ಆದರೆ, ಈ ಯೋಜನೆ ಬಗ್ಗೆ ಭಾರತ ಮತ್ತು ನೇಪಾಳ ಆಕ್ಷೇಪ ವ್ಯಕ್ತಪಡಿಸಿವೆ. ನೈಯಿಂಗ್ಚಿ ಪಟ್ಟಣವು ಅರುಣಾಚಲ ಪ್ರದೇಶದ ಗಡಿಯಲ್ಲಿದೆ. ಅರುಣಾಚಲ ಪ್ರದೇಶವನ್ನು ದಕ್ಷಿಣ ಚೀನಾದ ಭಾಗವೆಂದು ಚೀನಾ ವಾದಿಸುತ್ತಾ ಬಂದಿದೆ. ಆದರೆ, ಭಾರತ ಈ ವಾದವನ್ನು ನಿರಾಕರಿಸಿದೆ.
from India & World News in Kannada | VK Polls https://ift.tt/3BBBix5
