ಟೋಕಿಯೋ: ಆರು ಬಾರಿಯ ವಿಶ್ವ ಚಾಂಪಿಯನ್ ಎಂಸಿ ಮೇರಿ ಕೋಮ್ ಕ್ರೀಡಾಕೂಟದ ಮಹಿಳೆಯರ 51 ಕೆ.ಜಿ. ವಿಭಾಗದ ಬಾಕ್ಸಿಂಗ್ನಲ್ಲಿ ಅಂತಿಮ ಹದಿನಾರರ ಘಟ್ಟಕ್ಕೆ ಕಾಲಿಟ್ಟಿದ್ದಾರೆ. ಭಾನುವಾರ ನಡೆದ ಪಂದ್ಯದಲ್ಲಿ ಅನುಭವದ ಆಟವಾಡಿದ 38 ವರ್ಷದ ದಂತಕತೆ ಮೇರಿ ಕೋಮ್, ತಮಗಿಂತಲೂ 15 ವರ್ಷ ಕಿರಿಯ ಬಾಕ್ಸರ್ ಡೊಮಿನಿಕನ್ ರಿಪಬ್ಲಿಕ್ನ ಮುಗ್ಯೂಲಿನಾ ಹೆರ್ನಾಂಡೆಸ್ ಗಾರ್ಸಿಯಾ ಅವರನ್ನು ಮಣಿಸಿ ಪ್ರಿ-ಕ್ವಾರ್ಟರ್ಫೈನಲ್ಸ್ ತಲುಪಿದ್ದಾರೆ. 2012ರ ಲಂಡನ್ ಒಲಿಂಪಿಕ್ಸ್ನಲ್ಲಿ ಕಂಚಿನ ಪದಕ ಗೆದ್ದಿದ್ದ , ಗಾರ್ಸಿಯಾ ಎದುರು ಅನುಭವದ ಆಟವಾಡಿ 4-1 ಅಂತರದ ಜಯ ದಕ್ಕಿಸಿಕೊಳ್ಳುವಲ್ಲಿ ಯಶಸ್ವಿಯಾದರು. ಅದರಲ್ಲೂ ಕೊನೇ ಸುತ್ತಿನಲ್ಲಿ ತಮ್ಮ ನೇರ ಪಂಚ್ಗಳನ್ನು ಎದುರಾಳಿಯ ಮುಖಕ್ಕೆ ಇಳಿಯುವಂತೆ ಮಾಡಿ ಅಂಕಗಳನ್ನು ಬಾಚಿಕೊಂಡು ಗಮನ ಸೆಳೆದರು. "ಕೊರೊನಾ ವೈರಸ್ ಮಹಾಮಾರಿ ಸೋಂಕಿನ ಕಾರಣ ಕಳೆದೆರಡು ವರ್ಷಗಳು ಎಲ್ಲರ ಪಾಲಿಗೆ ಬಹಳಾ ನೋವು ತಂದೊಡ್ಡಿದೆ. ಎಲ್ಲವೂ ಮುಚ್ಚಿದ್ದ ಸಂದರ್ಭದಲ್ಲಿ ಅಥ್ಲೀಟ್ಗಳಿಗೆ ಮನೆಯಲ್ಲೇ ಅಭ್ಯಾಸ ಮಾಡುವಂತ್ತಾಗಿತ್ತು. ಆದರೆ, ಬಾಕ್ಸರ್ಗಳಿಗೆ ಅಭ್ಯಾಸ ಮಾಡಲು ಜೊತೆಗಾರನ ಅಗತ್ಯವಿರುತ್ತದೆ," ಎಂದು ಪಂದ್ಯದ ಬಳಿಕ ಮಾತನಾಡಿದ ಮೇರಿಕೋಮ್ ಹೇಳಿಕೊಂಡಿದ್ದಾರೆ. "ಈ ವಿಚಾರದಲ್ಲಿ ನಾನು ಕೊಂಚ ಅದೃಷ್ಟವಂತೆ. ಏಕೆಂದರೆ ನನ್ನದೇ ಜಿಮ್ ಮತ್ತು ಅಗತ್ಯದ ಸಲಕರಣೆಗಳನ್ನು ಹೊಂದಿದ್ದೆ. ಆದರೂ ನನ್ನ ತರಬೇತಿಗೆ ಜೊತೆಗಾರನ ಕೊರತೆ ಇತ್ತು. ಎದುರಾಳಿಯ ಕಣ್ಣಲ್ಲಿ ಕಣ್ಣಿಟ್ಟು ಆಟವಾಡುವ ಅಭ್ಯಾಸ ಲಭ್ಯವಾಗಿರಲಿಲ್ಲ," ಎಂದು ಒಲಿಂಪಿಕ್ಸ್ಗೆ ಪೂರ್ವಸಿದ್ಧತೆ ಬಗ್ಗೆ ಕೋಮ್ ಹೇಳಿಕೊಂಡಿದ್ದಾರೆ. ಪಂದ್ಯದ ಮೊದಲ ಸುತ್ತಿನಲ್ಲಿ ರಕ್ಷಣಾತ್ಮಕ ಆಟವಾಡಿದ ಕೋಮ್, ಎದುರಾಳಿಯ ನಡೆಗಳನ್ನು ಚೆನ್ನಾಗಿ ತಿಳಿದುಕೊಂಡರು. ಆದರೆ, ಎರಡನೇ ಸುತ್ತಿನಲ್ಲಿ ಗಾರ್ಸಿಯಾ ಉತ್ತಮ ಪಂಚ್ಗಳ ಮೂಲಕ ಜಯ ತಮ್ಮದಾಗಿಸಿಕೊಂಡಿದ್ದರು. ಕೊನೇ 3 ನಿಮಿಷದಲ್ಲಿ ತಮ್ಮ ನೈಜ ಆಟ ಹೊರತಂದ ಭಾರತೀಯ ಬಾಕ್ಸರ್ ಅದ್ಭುತ ಪಂಚ್ಗಳೊಂದಿಗೆ ಅಂಕ ಗಳಿಸಿ ಪಂದ್ಯ ತಮ್ಮದಾಗಿಸಿಕೊಂಡರು. ನಾಲ್ಕು ಮಕ್ಕಳ ತಾಯಿ ಮೇರಿ ಕೋಮ್ ಈಗ ಮುಂದಿನ ಸುತ್ತಿನ ಪಂದ್ಯದಲ್ಲಿ 3ನೇ ಶ್ರೇಯಾಂಕಿತ ಬಾಕ್ಸರ್ ಕೊಲಂಬಿಯಾದ ಇಂಗ್ರಿಟ್ ವೆಲೆನ್ಸಿಯಾ ಎದುರು ಅಂತಿಮ 8ರ ಘಟ್ಟದ ಅರ್ಹತೆಗಾಗಿ ಪೈಪೋಟಿ ನಡೆಸಲಿದ್ದಾರೆ. ವೆಲೆನ್ಸಿಯಾ ರಿಯೋ ಒಲಿಂಪಿಕ್ಸ್ನಲ್ಲಿ ಕಂಚಿನ ಪದಕ ಗೆದ್ದಿದ್ದರು. ಅಂದಹಾಗೆ ಕೊಲಂಬಿಯಾದ ಬಾಕ್ಸರ್ ಎದುರು ಕಳೆದ ಎರಡು ಮುಖಾಮುಖಿಗಳಲ್ಲಿ ಮೇರಿ ಕೋಮ್ ಜಯ ದಾಖಲಿಸಿದ್ದಾರೆ. 2019ರ ಬಾಕ್ಸಿಂಗ್ ವಿಶ್ವ ಚಾಂಪಿಯನ್ಷಿಪ್ ಕ್ವಾರ್ಟರ್ಫೈನಲ್ನಲ್ಲಿ ವೆಲೆನ್ಸಿಯಾ ಎದುರು ಕೋಮ್ ಜಯ ದಾಖಲಿಸಿದ್ದರು. "ನನ್ನ ಬಳಿ ಎಲ್ಲ ಪದಕಗಳಿವೆ. ಒಲಿಂಪಿಕ್ಸ್ನಲ್ಲಿ 2012ರ ಕಂಚಿನ ಪದಕ ಹೊಂದಿದ್ದೇನೆ. ಕಾಮನ್ವೆಲ್ತ್ ಗೇಮ್ಸ್ ಚಿನ್ನ, 6 ಬಾರಿ ವಿಶ್ವ ಚಾಂಪಿಯನ್ಷಿಪ್ ಸ್ವರ್ಣ. ಅದನ್ನು ಎಣಿಸುವುದು ಕೂಡ ಸುಲಭವಲ್ಲ. ಅತ್ಯಂತ ಕಠಿಣ ಸಂಗತಿ ಎಂದರೆ ಸ್ಥಿರ ಪ್ರದರ್ಶನ ಕಾಯ್ದುಕೊಂಡು ಆಟ ಮುಂದುವರಿಸುವುದು," ಎಂದು ಕೋಮ್ ಹೇಳಿಕೊಂಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2UDlRnv
