ಹಿಂದೂಗಳು ಸಹಿಷ್ಣುಗಳು ಎಂದ ಅಮೆರಿಕದ ಸಮೀಕ್ಷೆ: ಭಾರತ ಸರ್ವಜನಾಂಗದ ಶಾಂತಿಯ ತೋಟ ಎಂದು ಶ್ಲಾಘನೆ

ಹೊಸದಿಲ್ಲಿ: ಭಾರತವು ಧರ್ಮಸಹಿಷ್ಣು ರಾಷ್ಟ್ರವಾಗಿದ್ದು ಹಿಂದೂಗಳು ಸದಾ ಧರ್ಮ ಸಹಿಷ್ಣುತೆ ಮೆರೆಯುತ್ತಿದ್ದಾರೆ ಎಂದು ಅಮೆರಿಕದ ವಾಷಿಂಗ್ಟನ್‌ ಡಿಸಿ ಮೂಲದ 'ಪ್ಯೂ' ಸಂಶೋಧನಾ ಕೇಂದ್ರ ನಡೆಸಿದ ಸಮೀಕ್ಷೆ ತಿಳಿಸಿದೆ. ಕೊರೊನಾ ಆರಂಭಕ್ಕೂ ಕೆಲವೇ ವಾರಗಳ ಮುಂಚೆ, ಅಂದರೆ, 2019ರ ಕೊನೆಯ ಹಾಗೂ 2020ರ ಆರಂಭದಲ್ಲಿ ದೇಶದ 29,999 ಯುವಕರ ಅಭಿಪ್ರಾಯ ಸಂಗ್ರಹಿಸಿ, ಅವರನ್ನು ಮುಖಾಮುಖಿಯಾಗಿ ಭೇಟಿಯಾಗಿ ಮಾಹಿತಿ ಪಡೆದ ಬಳಿಕ ಸಂಸ್ಥೆಯು ವರದಿ ಪ್ರಕಟಿಸಿದೆ. ''ಧಾರ್ಮಿಕ ಸ್ವಾತಂತ್ರ್ಯ, ಸಹಿಷ್ಣುತೆ ಹಾಗೂ ಬೇರೆಯವರ ಧರ್ಮದ ನಂಬಿಕೆಗಳಿಗೆ ಗೌರವ ನೀಡುವುದೇ ಭಾರತದ ಅಂತಃಸತ್ವವಾಗಿದೆ. ದೇಶದಲ್ಲಿ ಎಲ್ಲ ಧರ್ಮದವರೂ ಸುರಕ್ಷತೆಯ ಮನೋಭಾವ ಹೊಂದಿದ್ದಾರೆ,'' ಎಂದು ವರದಿ ತಿಳಿಸಿದೆ. ''ದೇಶದಲ್ಲಿರುವ ಪ್ರಮುಖ ಧರ್ಮೀಯರಾದ ಹಿಂದೂಗಳು, ಮುಸ್ಲಿಮರು, ಕ್ರಿಶ್ಚಿಯನ್ನರು, ಜೈನರು, ಸಿಖ್ಖರು ಹಾಗೂ ಬೌದ್ಧರು ಅನ್ಯೋನ್ಯವಾಗಿದ್ದಾರೆ. ಪರಸ್ಪರ ನಂಬಿಕೆಗಳಿಗೆ ಗೌರವವಿದೆ. ಧರ್ಮ ಚಿಂತನೆಗಳಿಗೆ ಆದ್ಯತೆ ನೀಡಿದರೂ, ಬೇರೆ ಧರ್ಮೀಯರ ಆಚರಣೆ, ಸಂಪ್ರದಾಯಗಳಿಗೆ ಧಕ್ಕೆ ತರುವುದಿಲ್ಲ,'' ಎಂದು ಉಲ್ಲೇಖಿಸಿದೆ. ಜಗತ್ತಿನ ಪ್ರಮುಖ ರಾಷ್ಟ್ರಗಳ ಧರ್ಮ, ಆಚರಣೆ, ಅವರಲ್ಲಿರುವ ವ್ಯತ್ಯಾಸ, ಜನರ ಮರಣ ಪ್ರಮಾಣ, ಅಂತಾರಾಷ್ಟ್ರೀಯ ವಲಸೆ, ಮತಾಂತರದ ರೀತಿ ಸೇರಿ ಹಲವು ವಿಚಾರಗಳ ಕುರಿತು ಸಂಸ್ಥೆ ಸಮೀಕ್ಷೆ ನಡೆಸಿದ್ದು, ಭಾರತದ ಧರ್ಮ, ಸಂಸ್ಕೃತಿ, ಆಚರಣೆ, ಸಹಿಷ್ಣುತೆಗೆ ಸಮೀಕ್ಷೆಯಲ್ಲಿ ಆದ್ಯತೆ ನೀಡಿದೆ. ಭಾರತದ ಕುರಿತು ಸಮೀಕ್ಷೆ ಪ್ರಮುಖಾಂಶ * ಭಾರತದ ಶೇ.97ರಷ್ಟು ಜನರಿಗೆ ದೇವರು, ಧರ್ಮದಲ್ಲಿ ನಂಬಿಕೆ * ದೇವರು ಇದ್ದಾನೆ ಎಂದು ನಂಬುವವರ ಪ್ರಮಾಣ ಶೇ.80 * ಹಿಂದೂಗಳಿಗೆ ಗೋವು ಪವಿತ್ರ ಮತ್ತು ಪೂಜನೀಯ ಪ್ರಾಣಿ * ಶೇ.74ರಷ್ಟು ಮುಸ್ಲಿಮರಿಗೆ ಪ್ರತ್ಯೇಕ ಕೋರ್ಟ್‌ ಬೇಕೆಂಬ ಇಚ್ಛೆ * ಹಿಂದೂಗಳಿಗೆ ದೀಪಾವಳಿ ಪವಿತ್ರ ಹಬ್ಬ, ಶೇ.20ರಷ್ಟು ಮುಸ್ಲಿಮರಿಂದಲೂ ಆಚರಣೆ * ಭಾರತ ಹಿಂದೂ ಬಹುಸಂಖ್ಯಾತ ರಾಷ್ಟ್ರವಾಗಿಯೇ ಉಳಿಯಲಿದೆ * ಬೇರೆ ದೇಶಗಳಿಗಿಂತ ಭಾರತದಲ್ಲೇ ಹೆಚ್ಚು ಮುಸ್ಲಿಮರ ವಾಸ * ವಿಶ್ವಾದ್ಯಂತ ಹಿಂದೂಗಳ ಸಂಖ್ಯೆ ಶೇ.34ರಷ್ಟು ಏರಿಕೆ ಸಾಧ್ಯತೆ

from India & World News in Kannada | VK Polls https://ift.tt/3hpvvBf