ಹೊಸದಿಲ್ಲಿ: ದೀರ್ಘಕಾಲ ಆಡಬೇಕೆಂದು ಬಯಸುವವರು ಭಾರತದ ಸ್ಟಾರ್ ಆಲ್ರೌಂಡರ್ ಅವರನ್ನು ಗಮನಿಸಬೇಕು ಮತ್ತು ಅನುಸರಿಸಬೇಕು ಎಂದು ಇಂಗ್ಲೆಂಡ್ ಮಾಜಿ ನಾಯಕ ಕೆವಿನ್ ಪೀಟರ್ಸನ್ ತಮ್ಮ ದೇಶದ ಯುವ ಮತ್ತು ಉದಯೋನ್ಮುಖ ಕ್ರಿಕೆಟಿಗರಿಗೆ ಸಲಹೆ ನೀಡಿದ್ದಾರೆ. "ಇಂಗ್ಲೀಷ್ ಎಡಗೈ ಸ್ಪಿನ್ ಆಲ್ರೌಂಡರ್ಗಳು ಇನ್ನು ಅಂತಾರಾಷ್ಟ್ರೀಯ ಗುಣಮಟ್ಟ ಹೊಂದದೆ ಇರುವುದು ನನಗೆ ನಿರಾಶೆ ಉಂಟುಮಾಡಿದೆ. ಭಾರತ ತಂಡದಲ್ಲಿ ಟೆಸ್ಟ್, ಓಡಿಐ ಹಾಗೂ ಟಿ20 ಕ್ರಿಕೆಟ್ನಲ್ಲಿ ರವೀಂದ್ರ ಜಡೇಜಾ ಏನು ಮಾಡುತ್ತಿದ್ದಾರೆಂದು ಒಮ್ಮೆ ನೋಡಿ," ಎಂದು ಪೀಟರ್ಸನ್ ಬೆಟ್ವೇ ಇನ್ಸೈಡರ್ಸ್ ಬ್ಲಾಗ್ನಲ್ಲಿ ಬರೆದಿದ್ದಾರೆ. ರವೀಂದ್ರ ಜಡೇಜಾ ಟೆಸ್ಟ್ ಕ್ರಿಕೆಟ್ನಲ್ಲಿ 220 ವಿಕೆಟ್ಗಳು ಹಾಗೂ ಸೀಮಿತ ಓವರ್ಗಳ ಸ್ವರೂಪದಲ್ಲಿ 227 ವಿಕೆಟ್ಗಳನ್ನು ಕಬಳಿಸಿದ್ದಾರೆ. ಜತೆಗೆ ಇತ್ತೀಚೆಗೆ ಅವರು ತೋರುತ್ತಿರುವ ಬ್ಯಾಟಿಂಗ್ ಭಾರತೀಯ ಕ್ರಿಕೆಟ್ನಲ್ಲಿ ತೀವ್ರ ಸಂಚಲನ ಮೂಡಿಸುತ್ತಿದೆ. ಜಡೇಜಾ ಅವರ ಸರಾಸರಿ, ವಿಶೇಷವಾಗಿ ಟೆಸ್ಟ್ ಕ್ರಿಕೆಟ್ನಲ್ಲಿ 36.18 ಇದೆ. ತಮ್ಮ ವೃತ್ತಿ ಜೀವನದಲ್ಲಿ ಗಳಿಸಿದೆ ಇರುವ ರನ್ಗಳನ್ನು ಅವರು ಇತ್ತೀಚೆಗೆ ಗಳಿಸುತ್ತಿದ್ದಾರೆ. ಇಂಗ್ಲೆಂಡ್ ಆಲ್ರೌಂಡರ್ ಸ್ಯಾಮ್ ಕರ್ರನ್ ಅವರು ರವೀಂದ್ರ ಜಡೇಜಾ ಅವರಷ್ಟೇ ಅದ್ಭುತ ಬೌಲಿಂಗ್ ಹಾಗೂ ಬ್ಯಾಟಿಂಗ್ ಪ್ರದರ್ಶನ ತೋರುತ್ತಿದ್ದಾರೆ. ಆದರೆ, ಜಡೇಜಾ ರೀತಿ ಆಡುವ ಎಡಗೈ ಸ್ಪಿನ್ನರ್ ಯಾರಾದರೂ ಒಬ್ಬರು ಇಂಗ್ಲೆಂಡ್ ತಂಡದಲ್ಲಿ ಪತ್ತೆ ಮಾಡುವ ಅಗತ್ಯವಿದೆ ಎಂದು ಪೀಟರ್ಸನ್ ಹೇಳಿದ್ದಾರೆ. "ತಂಡದಲ್ಲಿ ಒಂದು ಸ್ಥಾನಕ್ಕೆ ಎಸಿಬಿ ಆದ್ಯತೆ ನೀಡಬೇಕು. ಎಲ್ಲಾ ಸ್ವರೂಪದಲ್ಲೂ ಬ್ಯಾಟಿಂಗ್ ಹಾಗೂ ಬೌಲಿಂಗ್ ಎರಡರಲ್ಲೂ ತಂಡಕ್ಕೆ ನೆರವಾಗುವ ಆಟಗಾರನೊಬ್ಬನನ್ನು ಇಂಗ್ಲೆಂಡ್ ತಂಡದಲ್ಲಿ ಹೂಡಿಕೆ ಮಾಡುವ ಅಗತ್ಯವಿದೆ," ಎಂದು ಹೇಳಿದ ಕೆವಿನ್, ಒಂದು ವೇಳೆ ಬಾಲಕನಾಗಿದ್ದರೆ, ಉದಯೋನ್ಮುಖ ಆಟಗಾರನಾಗಿದ್ದರೆ ಅಥವಾ ಕೌಂಟಿ ಕ್ರಿಕೆಟರ್ ಆಗಿದ್ದರೆ ಖಂಡಿತಾ ಜಡೇಜಾ ಅವರನ್ನು ಅನುಸರಿಸಿ. ಏಕೆಂದರೆ ಜಡೇಜಾ ನಿಸ್ಸಂಶವಾಗಿ ಸೂಪರ್ಸ್ಟಾರ್. ಇಂಗ್ಲೆಂಡ್ ಪರ ನೀವು ದೀರ್ಘಕಾಲ ಟೆಸ್ಟ್ ಕ್ರಿಕೆಟ್ ಆಡಬೇಕಾದರೆ ಇದನ್ನು ಮಾಡಿ," ಎಂದು ಪೀಟರ್ಸನ್ ಸಲಹೆ ನೀಡಿದ್ದಾರೆ. ಸದ್ಯ ಇಂಗ್ಲೆಂಡ್ ತಂಡದಲ್ಲಿ ಜ್ಯಾಕ್ ಲೀಚ್ ಹಾಗೂ ಡಾಮ್ ಬೆಸ್ ಇಬ್ಬರು ಸ್ಪಿನ್ನರ್ಗಳಿದ್ದಾರೆ. ಆದರೆ, ಇದಕ್ಕಿಂತ ಹೆಚ್ಚಿನ ಸಾಮರ್ಥ್ಯವಿರುವ ಸ್ಪಿನ್ನರ್ಗಳು ತಂಡಕ್ಕೆ ಅಗತ್ಯವಿದೆ ಎಂಬುದು ಮಾಜಿ ನಾಯಕನ ಅಭಿಪ್ರಾಯ. ಗ್ರೇಮ್ ಸ್ವಾನ್, ಮಾಂಟಿ ಪನೇಸರ್ ಹಾಗೂ ಮೊಯೀನ್ ಅಲಿ ಬಳಿಕ ಇಂಗ್ಲೆಂಡ್ ಟೆಸ್ಟ್ ತಂಡದಲ್ಲಿ ಯಾರೂ ನಿಯಮಿತವಾಗಿ ಆಡುತ್ತಿಲ್ಲ. "ಲೀಚ್ ಹಾಗೂ ಬೆಸ್ ಇಬ್ಬರೂ ಟೆಸ್ಟ್ ಮ್ಯಾಚ್ ಸ್ಪಿನ್ನರ್ಗಳಲ್ಲ. ಜ್ಯಾಕ್ ಲೀಚ್ ಟೆಸ್ಟ್ ಕ್ರಿಕೆಟ್ಗೆ ಹೇಳಿಕೊಳ್ಳುವ ಆಟಗಾರನಲ್ಲ ಎಂಬ ಅಂಶವನ್ನು ಕಳೆದ ಹಲವು ವರ್ಷಗಿಂದಲೇ ನಾನು ಹೇಳಿರುವುದನ್ನು ನೀವು ಸ್ಮರಿಸಿಕೊಳ್ಳಬೇಕು," ಎಂದು ಹೇಳಿದರು. "ಅನಿರೀಕ್ಷಿತವಾಗಿ ನಾನು ಹೇಳಿದ್ದು ನಿಜವಾಗಿದೆ, ಅವರು ಇನ್ನು ಹೇಳಿಕೊಳ್ಳುವ ಪ್ರದರ್ಶನ ತೋರಿಲ್ಲ. ಟೆಸ್ಟ್ ಕ್ರಿಕೆಟ್ನಲ್ಲಿ ಮಾಂಟಿ ಪಣೇಸರ್ ಹಾಗೂ ಗ್ರೇಮ್ ಸ್ವಾನ್ ರೀತಿ ಮ್ಯಾಚ್ ವಿನ್ನಿಂಗ್ ಪ್ರದರ್ಶನವನ್ನು ಇನ್ನೂ ತೋರಿಲ್ಲ," ಎಂದು ಪೀಟರ್ಸನ್ ತಿಳಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3g61aHr
