ಹೊಸದಿಲ್ಲಿ: ನ್ಯೂಜಿಲೆಂಡ್ ವಿರುದ್ಧ ಜೂನ್‌ 18 ರಿಂದ 22ರ ವರೆಗೆ ನಡೆಯುವ ಉದ್ಘಾಟನಾ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ ಫೈನಲ್ ಹಣಾಹಣಿಯಲ್ಲಿ ಭಾರತ ಸೆಣಸಲಿದೆ. ಇದರ ನಡುವೆ ಟೀಮ್‌ ಮ್ಯಾನೇಜ್‌ಮೆಂಟ್‌ಗೆ ಪ್ಲೇಯಿಂಗ್‌ ಇಲೆವೆನ್‌ ಆಯ್ಕೆ ಮಾಡುವ ಹೊಸ ತಲೆ ನೋವು ಶುರುವಾಗಿದೆ. ಅದರಲ್ಲೂ ರೋಹಿತ್ ಶರ್ಮಾ ಜೊತೆ ಯಾರನ್ನು ಕಣಕ್ಕೆ ಇಳಿಸಬೇಕೆಂಬುದು ಕೊಹ್ಲಿಗೆ ಗೊಂದಲ ಉಂಟಾಗಿದೆ. ಕಳೆದ ಹಲವು ವರ್ಷಗಳಿಂದ ಇಂಗ್ಲೆಂಡ್ ಪಿಚ್‌ಗಳು ಓಪನಿಂಗ್‌ ಬ್ಯಾಟ್ಸ್‌ಮನ್‌ಗಳಿಗೆ ಸುಲಭವಾಗಿಲ್ಲ. ವೇಗದ ಬೌಲರ್‌ಗಳಿಗೆ ನೆರವಾಗುವ ಪಿಚ್‌ಗಳಲ್ಲಿ ಹೊಸ ಚೆಂಡಿನಲ್ಲಿ ಬ್ಯಾಟಿಂಗ್‌ ಮಾಡುವುದು ಸುಲಭದ ಮಾತಲ್ಲ. ಅದರಲ್ಲೂ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ ಫೈನಲ್ ಹಣಾಹಣಿಯಲ್ಲಿ ಕಿವೀಸ್‌ನ ಮಾರಕ ವೇಗಿಗಳಾದ ಟ್ರೆಂಟ್‌ ಬೌಲ್ಟ್, ಟಿಮ್‌ ಸೌಥ್‌ ಹಾಗೂ ನೀಲ್‌ ವ್ಯಾಗ್ನರ್ ಅವರನ್ನು ಭಾರತ ಬ್ಯಾಟ್ಸ್‌ಮನ್‌ಗಳು ಹೇಗೆ ಎದುರಿಸಲಿದ್ದಾರೆಂಬುದು ತೀವ್ರ ಕುತೂಹಲ ಕೆರಳಿಸಿದೆ. ಕೇವಲ 7 ಅಂತಾರಾಷ್ಟ್ರೀಯ ಪಂದ್ಯಗಳಾನ್ನಾಡಿರುವ ಶುಭಮನ್ ಗಿಲ್ ಅವರು ಹಲವು ದಿಗ್ಗಜರಿಂದ ಶ್ಲಾಘನೆಗೆ ಒಳಗಾಗಿದ್ದಾರೆ. ಬ್ಯಾಟಿಂಗ್‌ನಲ್ಲಿ ಮಾತ್ರವಲ್ಲದೆ ಫೀಲ್ಡಿಂಗ್‌ನಲ್ಲಿಯೂ ಗಿಲ್ ಗಮನಾರ್ಹ ಪ್ರದರ್ಶನ ತೋರಿದ್ದಾರೆ. ಈ ಬಗ್ಗೆ ಮಾತನಾಡಿರುವ ಫೀಲ್ಡಿಂಗ್ ಕೋಚ್‌ , ಶುಭಮನ್ ಗಿಲ್ ಅವರನ್ನು ಪರಿಪೂರ್ಣ ಅಥ್ಲಿಟ್‌ ಎಂದು ಗುಣಗಾನ ಮಾಡಿದ್ದಾರೆ. ಟೈಮ್ಸ್ ಆಫ್‌ ಇಂಡಿಯಾ ಜೊತೆ ಮಾತನಾಡಿದ ಶ್ರೀಧರ್‌, "ನಾನು ನೋಡಿದ ಹಾಗೆ ಶುಭಮನ್ ಗಿಲ್ ಪರಿಪೂರ್ಣ ಅಥ್ಲೀಟ್‌. ಅವರು ತೆಳ್ಳಗೆ ಇದ್ದಾರೆ, ವೇಗವಾಗಿ ಓಡುತ್ತಾರೆ, ಕೈ ಹಾಗೂ ಕಣ್ಣುಗಳ ನಡುವೆ ಅತ್ಯುತ್ತಮ ಸಂಯೋಜನೆಯನ್ನು ಹೊಂದಿದ್ದಾರೆ. ಹೊಸ ಆಟಗಾರ ತಂಡಕ್ಕೆ ಬಂದಾಗ ಆತನಲ್ಲಿನ ದೌರ್ಬಲ್ಯ ಹಾಗೂ ಸಾಮರ್ಥ್ಯವನ್ನು ನಾವು ಸುಲಭವಾಗಿ ಕಂಡು ಹಿಡಿಯಬಹುದು. ಆದರೆ,ನಾವು ಶುಭಮನ್ ಗಿಲ್ ಅವರನ್ನು ಐಪಿಎಲ್‌ ಹಾಗೂ ಭಾರತ 'ಎ' ತಂಡದಲ್ಲಿಯೇ ನೋಡಿದ್ದೇನೆ," ಎಂದು ಹೇಳಿದರು. "ಫೀಲ್ಡಿಂಗ್ ತರಬೇತುದಾರನಾಗಿ ನನ್ನ ಕೆಲಸವೆಂದರೆ ಅವರ ಮನಸ್ಥಿತಿ ರಾಷ್ಟ್ರೀಯ ತಂಡದೊಂದಿಗೆ ಹೊಂದಿಕೆಯಾಗುವಂತೆ ನೋಡಿಕೊಳ್ಳುವುದು. ಅವರ(ಗಿಲ್) ಕೈ-ಕಣ್ಣಿನ ಸಮನ್ವಯ, ಅವನ ಪ್ರತಿವರ್ತನ, ಅವರು ಕೈಗಳು ಅತ್ಯುತ್ತಮ ಚಟುವಟಿಕೆಯಿಂದ ಕೂಡಿದೆ. ಚೆಂಡಿನ ಜೊತೆಗಿನ ವೇಗ ಹಾಗೂ ಬೌಂಡರಿ ಲೈನ್‌ನಿಂದ ಅವರ ಥ್ರೋ ಅತ್ಯುತ್ತಮವಾಗಿದೆ, " ಎಂದು ಶ್ಲಾಘಿಸಿದರು. ಇದೀಗ ವಿಶ್ವ ಟೆಸ್ಟ್ ಚಾಂಪಯನ್‌ಷಿಪ್‌ ಫೈನಲ್ ಹಣಾಹಣಿಗೆ ಒಟ್ಟು ನಾಲ್ವರು ಆರಂಭಿಕ ಬ್ಯಾಟ್ಸ್‌ಮನ್‌ಗಳಿದ್ದಾರೆ. ರೋಹಿತ್ ಶರ್ಮಾ, ಶುಭಮನ್ ಗಿಲ್, ಮಯಾಂಕ್‌ ಅಗರ್ವಾಲ್‌ ಹಾಗೂ ಕೆಎಲ್‌ ರಾಹುಲ್‌. ಇವರಲ್ಲಿ ಯಾರು ಓಪನಿಂಗ್‌ ಮಾಡುತ್ತಾರೆಂದು ಇನ್ನು ನಿರ್ಧರಿಸಲು ಸಾಧ್ಯವಿಲ್ಲ. ಇದರಲ್ಲಿ ರೋಹಿತ್ ಶರ್ಮಾ ಜೊತೆ ಮತ್ತೊಂದು ತುದಿಯಲ್ಲಿ ಗಿಲ್ ಅಥವಾ ಮಯಾಂಕ್‌ಗೆ ಅವಕಾಶ ನೀಡಬಹುದು. ವೇಳಾಪಟ್ಟಿ: ನ್ಯೂಜಿಲೆಂಡ್ ವಿರುದ್ಧ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್‌ ಫೈನಲ್ ಹಣಾಹಣಿ ಸೌತಾಮ್ಟನ್‌ನಲ್ಲಿ ಜೂನ್‌ 18 ರಿಂದ 22ರ ವರೆಗೆ ನಡೆಯಲಿದೆ. ನಂತರ ಆಗಸ್ಟ್ 4 ರಿಂದ ಇಂಗ್ಲೆಂಡ್ ವಿರುದ್ಧ ಟೆಸ್ಟ್ ಸರಣಿ ಆರಂಭವಾಗಲಿದೆ. ಮೊದಲನೇ ಪಂದ್ಯ ನಾಟಿಂಗ್‌ಹ್ಯಾಮ್‌, ಎರಡನೇ ಹಣಾಹಣಿ ಲಾರ್ಡ್ಸ್(ಆ.12 ರಿಂದ 6), ಮೂರನೇ ಪಂದ್ಯ ಲೀಡ್ಸ್ (ಆ. 25 ರಿಂದ 29), ನಾಲ್ಕನೇ ಹಣಾಹಣಿ ದಿ ಓವಲ್‌ನಲ್ಲಿ (ಸೆ.2 ರಿಂದ 6) ಹಾಗೂ ಐದನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯ ಮ್ಯಾಂಚೆಸ್ಟರ್‌ನಲ್ಲಿ (ಸೆ.10 ರಿಂದ 14) ಜರುಗಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3uK4Q71
