ಹೊಸದಿಲ್ಲಿ: ನ್ಯೂಜಿಲೆಂಡ್ ವಿರುದ್ಧ ಜೂನ್ 18 ರಿಂದ ಆರಂಭವಾಗಲಿರುವ ಉದ್ಘಾಟನಾ ಆವೃತ್ತಿಯ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್ ಆಡಲು ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ತಂಡ ಸಜ್ಜಾಗುತ್ತಿದೆ. 2020ರಲ್ಲಿ ಭಾರತದ ವಿರುದ್ಧ ಎರಡು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಪ್ರಾಬಲ್ಯ ಸಾಧಿಸಿದ್ದ ನ್ಯೂಜಿಲೆಂಡ್ ವೇಗಿಗಳಿಗೆ ಸೌತಾಮ್ಟನ್ ಪಿಚ್ ನೆರವಾಗುವ ಸಾಧ್ಯತೆ ಇದೆ. ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್ ಹಣಾಹಣಿಗೂ ಮುನ್ನ ಇಂಗ್ಲೆಂಡ್ ವಿರುದ್ಧ ಎರಡು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ನ್ಯೂಜಿಲೆಂಡ್ ತೊಡಗಿಕೊಂಡಿದೆ. ಈ ಹಿನ್ನೆಲೆಯಲ್ಲಿ ಭಾರತ ತಂಡಕ್ಕಿಂತ ಇಲ್ಲಿನ ವಾತಾವರಣಕ್ಕೆ ಹೊಂದಿಕೊಳ್ಳಲು ಅತ್ಯುತ್ತಮ ಅವಕಾಶ ನ್ಯೂಜಿಲೆಂಡ್ ತಂಡಕ್ಕಿದೆ. ಇಂಗ್ಲೆಂಡ್ನಲ್ಲಿ ಬ್ಯಾಟಿಂಗ್ ಮಾಡುವಾಗ ಎದುರಾಗುವ ದೊಡ್ಡ ಸವಾಲನ್ನು ಭಾರತದ ಆಟಗಾರ ವಿವರಿಸಿದ್ದಾರೆ. 2018ರಲ್ಲಿ ಇಂಗ್ಲೆಂಡ್ನಲ್ಲಿ ಹನುಮ ವಿಹಾರಿ ಅಂತಾರಾಷ್ಟ್ರೀಯ ಟೆಸ್ಟ್ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ್ದರು. ಆ ಸರಣಿಯಲ್ಲಿ ಭಾರತದ ಬ್ಯಾಟಿಂಗ್ ವಿಭಾಗ ಸಾಕಷ್ಟು ಭರವಸೆಯನ್ನು ಮೂಡಿಸಿತ್ತು. ಇದರ ಹೊರತಾಗಿಯೂ ವಿರಾಟ್ ಕೊಹ್ಲಿ ಬಳಗ 5 ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 1-4 ಅಂತರದಲ್ಲಿ ಸೋಲು ಅನುಭವಿಸಿತ್ತು. ಇಂಗ್ಲೆಂಡ್ನ ಕಠಿಣ ವಾತಾವರಣದಲ್ಲಿ ಡ್ಯೂಕ್ ಬಾಲ್ ಅನ್ನು ಎದುರಿಸುವುದು ದೊಡ್ಡ ಸವಾಲು ಆಗಿದೆ ಎಂಬ ಅಂಶವನ್ನು ಹನುಮ ವಿಹಾರಿ ಬಹಿರಂಗಪಡಿಸಿದ್ದಾರೆ. "ಖಚಿತವಾಗಿ, ಇದು ಸವಾಲುದಾಯಕವಾಗಿದೆ. ಓವರ್ಹೆಡ್ ಪರಿಸ್ಥಿತಿಗಳು ಸಹ ಒಂದು ಪಾತ್ರವನ್ನು ವಹಿಸುತ್ತವೆ. ಏಕೆಂದರೆ ಬಿಸಿಲು ಇದ್ದಾಗ ಬ್ಯಾಟಿಂಗ್ ಮಾಡಲು ಸ್ವಲ್ಪ ಸುಲಭವಾಗುತ್ತದೆ, ಆದರೆ ಮೋಡ ಕವಿದಿರುವಾಗ, ಚೆಂಡು ಇಡೀ ದಿನ ಚಲಿಸುತ್ತದೆ. ಇತ್ತೀಚೆಗೆ ಕೌಂಟಿ ಆಡಿದ ನನಗೆ ಇದು ದೊಡ್ಡ ಸವಾಲುದಾಯಕವಾಗಿತ್ತು. ವಾತಾವರಣ ತಣ್ಣಗೆ ಇದ್ದು, ಚೆಂಡು ವಿಕೆಟ್ ಮೇಲೆ ಸಾಕಷ್ಟು ಚಲಿಸುತ್ತಿರುತ್ತದೆ," ಎಂದು ವಿಹಾರಿ ಇಎಸ್ಪಿಎನ್ ಕ್ರಿಕ್ಇನ್ಪೋಗೆ ತಿಳಿಸಿದ್ದಾರೆ. ಕೊನೆಯ ಬಾರಿ ಇಲ್ಲಿ ಸ್ಟುವರ್ಟ್ ಬ್ರಾಡ್ ಅವರ ಮೂರು ಓವರ್ಗಳನ್ನು ವಿಹಾರಿ ಎದುರಿಸಿದ್ದರು. 23 ಎಸೆತಗಳನ್ನು ಎದುರಿಸಿದ್ದ ಅವರು ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದ್ದರು. ನನ್ನ ವಿರುದ್ಧ ಸ್ಟುವರ್ಟ್ ಬ್ರಾಡ್ ಉತ್ತಮವಾಗಿ ಬೌಲ್ ಮಾಡಲು ಕಾರಣವೇನೆಂಬುದನ್ನು ವಿಹಾರಿ ವಿವರಿಸಿದರು. "ಯಾವ ಎಸೆತವನ್ನು ನೀವು ಡ್ರೈವ್ ಮಾಡಬೇಕೆಂದು ನಿಮಗೆ ಗೊತ್ತಿರುತ್ತದೆ. ಆದರೆ, ಇಂಗ್ಲೆಂಡ್ನಲ್ಲಿ ಡ್ರೈವ್ ಹೊಡೆಯುವ ಹಾಗೆಯೇ ನಿಮಗೆ ಕಾಣಿಸುತ್ತದೆ. ಆದರೆ, ಆ ಎಸೆತವನ್ನು ಡ್ರೈವ್ ಮಾಡಲು ಸಾಧ್ಯವಾಗುವುದಿಲ್ಲ. ಇಲ್ಲಿ ನಿಮ್ಮ ಶಾಟ್ ಆಯ್ಕೆಯ ಬಗ್ಗೆ ನಿಮಗೆ ಖಚಿತತೆ ಇರಬೇಕು. ಆದರೆ, ಭಾರತದಲ್ಲಿ ಈ ತರ ಇರುವುದಿಲ್ಲ. ಡ್ರೈವ್ಗೆ ಇಲ್ಲದೇ ಇದ್ದರೂ ನೀವು ಸ್ವಲ್ಪ ಬ್ಯಾಟ್ನಲ್ಲಿ ತಳ್ಳಿದರೆ ಬೌಂಡರಿ ಹೋಗುತ್ತದೆ. ಎರಡನೇ ಬಾರಿ ಇಲ್ಲಿ ಆಡುವಾಗ ನಾನು ಸಾಧ್ಯವಾದಷ್ಟು ನಿಧಾನವಾಗಿ ಆಡಲು ಪ್ರಯತ್ನಿಸುತ್ತೇನೆ," ಎಂದರು. "ಕೌಂಟಿ ಕ್ರಿಕೆಟ್ ಆಡಿದ ಮೊದಲನೇ ಇನಿಂಗ್ಸ್ನಲ್ಲಿಯೇ ನಾನು ಇಲ್ಲಿ ತಡವಾಗಿ ಆಡಬೇಕೆಂಬುದನ್ನು ತಿಳಿದುಕೊಂಡೆ. ನಂತರ ಎಸೆಕ್ಸ್ ವಿರುದ್ಧ ನನ್ನ ಎರಡನೇ ಪಂದ್ಯದಲ್ಲಿ 30 ಹಾಗೂ 50 ರನ್ ಗಳಿಸಿದೆ. ಈ ತಂಡದಲ್ಲಿ ಪೀಟರ್ ಸಿಡ್ಲೆ ಹಾಗೂ ಸಿಮೋನ್ ಹಾರ್ಮರ್ ಅವರನ್ನೊಳಗೊಂಡ ಬೌಲಿಂಗ್ ವಿಭಾಗ ಯೋಗ್ಯವಾಗಿತ್ತು. ನಾನು ಬ್ಯಾಟ್ ಚೆನ್ನಾಗಿ ಮಾಡಿದ್ದೇನೆಂದು ಭಾವಿಸುತ್ತೇನೆ, ಆದರೆ, ಇದನ್ನು ದೊಡ್ಡ ಮೊತ್ತವನ್ನಾಗಿ ಪರಿವರ್ತಿಸಬೇಕಾಗಿತ್ತು," ಎಂದು ಹನುಮ ವಿಹಾರಿ ಕೌಂಟಿ ಅನುಭವ ಹಂಚಿಕೊಂಡರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2S7XjS9
