ಹೊಸದಿಲ್ಲಿ: ಸೀಮಿತ ಓವರ್ಗಳ ಕ್ರಿಕೆಟ್ನಲ್ಲಿ ರನ್ ಹೊಳೆ ಹರಿಸುವುದನ್ನು ಮುಂದುವರಿಸಿರುವ ತಂಡದ ನಾಯಕ ಬಾಬರ್ ಆಝಮ್ ತಮ್ಮ ವೃತ್ತಿ ಜೀವನದ 13ನೇ ಓಡಿಐ ಶತಕ ಸಿಡಿಸಿದ್ದಾರೆ. ಆ ಮೂಲಕ ದಕ್ಷಿಣ ಆಫ್ರಿಕಾದ ಮಾಜಿ ಆಟಗಾರ ಹಾಶೀಮ್ ಆಮ್ಲಾ ಹಾಗೂ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ದಾಖಲೆಯನ್ನು ಹಿಂದಿಕ್ಕಿದ್ದಾರೆ. ಶುಕ್ರವಾರ ಸೆಂಚುರಿಯನ್ನಲ್ಲಿ ನಡೆದಿದ್ದ ಓಡಿಐ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ನೀಡಿದ್ದ 274 ರನ್ ಗುರಿ ಹಿಂಬಾಲಿಸಿದ್ದ ಪಾಕಿಸ್ತಾನ ತಂಡ, ಅವರ 103 ರನ್ಗಳ ಸಹಾಯದಿಂದ ಗೆಲುವಿನ ನಗೆ ಬೀರಿತ್ತು. ಆ ಮೂಲಕ ಮೂರು ಪಂದ್ಯಗಳ ಓಡಿಐ ಸರಣಿಯಲ್ಲಿ ಪಾಕಿಸ್ತಾನ 1-0 ಮುನ್ನಡೆ ಪಡೆಯಿತು. ಬಾಬರ್ ಆಝಮ್ ಅತ್ಯಂತ ಸ್ಥಿರ ಪ್ರದರ್ಶನದ ಬ್ಯಾಟ್ಸ್ಮನ್ ಎಂದು ಸಾಕಷ್ಟು ಚರ್ಚೆಗಳು ನಡೆದಿವೆ ಹಾಗೂ ಈಗಲೂ ನಡೆಯುತ್ತಿವೆ. ಅದರಂತೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಪಾಕ್ ನಾಯಕ ಅತ್ಯುತ್ತಮ ಲಯವನ್ನು ಮುಂದುವರಿಸಿದ್ದಾರೆ. ಓಡಿಐ ಕ್ರಿಕೆಟ್ನಲ್ಲಿ 13ನೇ ಶತಕ ಸಿಡಿಸುವ ಮೂಲಕ ಅಝಮ್ ಮತ್ತೊಂದು ದಾಖಲೆಯೊಂದನ್ನು ಸ್ಥಾಪಿಸಿದ್ದಾರೆ. ಓಡಿಐ ಕ್ರಿಕೆಟ್ನಲ್ಲಿ ವೇಗವಾರಿ 13 ಶತಕಗಳನ್ನು ಪೂರೈಸಿದ ವಿಶ್ವದ ಮೊದಲ ಕ್ರಿಕೆಟಿಗ ಎಂಬ ಖ್ಯಾತಿಗೆ ಬಾಬರ್ ಭಾಜನರಾದರು. ಈ ಸಾಧನೆ ಮಾಡಲು ಪಾಕ್ ನಾಯಕ 76 ಇನಿಂಗ್ಸ್ಗಳನ್ನು ತೆಗದುಕೊಂಡಿದ್ದಾರೆ. 83 ಇನಿಂಗ್ಸ್ಗಳಲ್ಲಿ 13 ಶತಕ ಸಿಡಿಸಿದ್ದ ಹಾಶೀಮ್ ಆಮ್ಲಾ ಹಾಗೂ 86 ಇನಿಂಗ್ಸ್ ಈ ಸಾಧನೆ ಮಾಡಿದ್ದ ವಿರಾಟ್ ಕೊಹ್ಲಿಯನ್ನು ಆಝಮ್ ಹಿಂದಿಕ್ಕಿದರು. ಇನ್ನು ಮಹಿಳಾ ಕ್ರಿಕೆಟ್ನಲ್ಲಿ ಆಸ್ಟ್ರೇಲಿಯಾ ತಂಡದ ಮೆಗ್ ಲ್ಯಾನಿಂಗ್ 13 ಶತಕಗಳನ್ನು ಸಿಡಿಸಲು 76 ಇನಿಂಗ್ಸ್ಗಳನ್ನು ತೆಗೆದುಕೊಂಡಿದ್ದಾರೆ. ಇನ್ನು ಪಂದ್ಯದಲ್ಲಿ ರೋಚಕ ಜಯ ದಾಖಲಿಸಿದ ಪಾಕಿಸ್ತಾನ ತಂಡ ಓಡಿಐ ಸರಣಿಯಲ್ಲಿ 1-0 ಮುನ್ನಡೆ ಪಡೆಯಿತು. ಉಭಯ ತಂಡಗಳ ನಡುವೆ ಎರಡನೇ ಪಂದ್ಯ ಭಾನುವಾರ ನಡೆಯಲಿದೆ. ಇನ್ನು ಪಂದ್ಯದಲ್ಲಿ ಬಾಬರ್ ಅಝಮ್ ಜತೆಗೆ ಇಮಾಮ್ ಉಲ್ ಹಕ್ 70 ರನ್ ಹಾಗೂ ಮೊಹಮ್ಮದ್ ರಿಜ್ವಾನ್ 40 ರನ್ ಗಳಿಸಿ ಪಾಕಿಸ್ತಾನದ ಗೆಲುವಿಗೆ ಕೊಡುಗೆ ನೀಡಿದ್ದರು. ಇದಕ್ಕೂ ಮುನ್ನ ಮೊದಲು ಬ್ಯಾಟಿಂಗ್ ಮಾಡಿದ್ದ ದಕ್ಷಿಣ ಆಫ್ರಿಕಾ ತಂಡ ತನ್ನ ಪಾಲಿನ 50 ಓವರ್ಗಳಿಗೆ 6 ವಿಕೆಟ್ ಕಳೆದುಕೊಂಡು 273 ರನ್ ದಾಖಲಿಸಿತ್ತು. ದಕ್ಷಿಣ ಆಫ್ರಿಕಾ ವಾನ್ ಡೆರ್ ಡಸೆನ್ 134 ಎಸೆತಗಳಲ್ಲಿ ಎರಡು ಸಿಕ್ಸರ್ ಹಾಗೂ 10 ಬೌಂಡರಿಗಳೊಂದಿಗೆ ಅಜೇಯ 123 ರನ್ ದಾಖಲಿಸಿದ್ದರು. ಇನ್ನು ಡೇವಿಡ್ ಮಿಲ್ಲರ್ ಅರ್ಧಶತಕ ಸಿಡಿಸಿದ್ದರು. ಮೂರು ಪಂದ್ಯಗಳ ಓಡಿಐ ಸರಣಿ ಮುಗಿದ ಬಳಿಕ ಪಾಕಿಸ್ತಾನ ಹಾಗೂ ದಕ್ಷಿಣ ಆಫ್ರಿಕಾ ತಂಡಗಳು ನಾಲ್ಕು ಹಣಾಹಣಿಗಳ ಟಿ20 ಸರಣಿಯಲ್ಲಿ ಕಾದಾಟ ನಡೆಸಲಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3sMnHxT
