ಹೊಸದಿಲ್ಲಿ: ದೇಶದ ಪ್ರಥಮ ಮಹಿಳಾ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಇಂದು ಮೋದಿ ಸರಕಾರ 2.0 ದ ಮೊದಲ ಬಜೆಟ್ನ್ನು ಮಂಡಿಸುತ್ತಿದ್ದಾರೆ. ಸಾಮಾನ್ಯ ಸೇಲ್ಸ್ ಗರ್ಲ್ ಆಗಿದ್ದ ಅವರು ಇಂದು ಕೇಂದ್ರ ಸಚಿವೆಯಾಗಿದ್ದಾರೆ. ಹೌದು, ನಿರ್ಮಲಾ ಸೀತಾರಾಮನ್ ಅವರ ಜೀವನ ಸಂಪನ್ಮೂಲಗಳ ಕೊರತೆ ಮತ್ತು ಕೌಟುಂಬಿಕ ಅನಿವಾರ್ಯತೆಗಳ ನಡುವೆ ಸಿಕ್ಕಿ ಹಾಕಿಕೊಂಡು ಕಣ್ಣೀರು ಸುರಿಸುವ ಲಕ್ಷಾಂತರ ಮಹಿಳೆಯರಿಗೆ ಸ್ಪೂರ್ತಿದಾಯಕವಾಗಿದೆ. ಬಹಳ ಸೌಮ್ಯ ಸ್ವಭಾವ ಮತ್ತು ಸರಳ ಜೀವನವನ್ನು ರೂಢಿಸಿಕೊಂಡಿದ್ದ ನಿರ್ಮಲಾ ಸೀತಾರಾಮನ್ ಬಹಳ ಕಷ್ಟಪಟ್ಟು ಈ ಉನ್ನತ ಸ್ಥಾನಕ್ಕೇರಿದ್ದಾರೆ. ಮೇ 23ರಂದು ಲೋಕಸಭಾ ಚುನಾವಣಾ ಫಲಿತಾಂಶ ಘೋಷಿಸಲ್ಪಟ್ಟಿತು. ನರೇಂದ್ರ ಮೋದಿ ಅವರು ಎರಡನೆಯ ಅವಧಿಗೆ ಪ್ರಚಂಡ ಬಹುಮತದಿಂದ ಮತ್ತೆ ಅಧಿಕಾರಕ್ಕೇರಿದರು. ಈ ಹಿಂದೆ ರಕ್ಷಣಾ ಸಚಿವೆಯಾಗಿದ್ದ ನಿರ್ಮಲಾ ಸೀತಾರಾಮನ್ ಅವರಿಗೆ ಪ್ರಧಾನಿ ಮೋದಿ ವಿಚ್ಚ ಸಚಿವೆಯ ಸ್ಥಾನವನ್ನು ನೀಡಿದರು. ಈ ಮೂಲಕ ದೇಶದ ಮೊದಲ ಮಹಿಳಾ ವಿತ್ತ ಸಚಿವೆ ಎಂಬ ಹೆಗ್ಗಳಿಕೆ ಅವರದಾಯಿತು. ಮೊದಲು ರಕ್ಷಣಾ ಸಚಿವೆ, ಮತ್ತೀಗ ಹಣಕಾಸು ಸಚಿವೆ- ಇದು ಅವರ ಕಾರ್ಯ ಶೈಲಿ ಮತ್ತು ದಕ್ಷತೆಯ ಫಲವಾಗಿ ಸಿಕ್ಕ ಬಹುದೊಡ್ಡ ಜವಾಬ್ದಾರಿಗಳಾಗಿವೆ. ತಮಿಳುನಾಡಲ್ಲಿ ಜನನ ನಿರ್ಮಲಾ ಸೀತಾರಾಮನ್ ಅವರು 1959, ಆಗಸ್ಟ್ 18ರಂದು ತಮಿಳುನಾಡಿನ ಮಧುರೈನಲ್ಲಿ ಜನಿಸಿದರು. ಅವರ ತಂದೆ ನಾರಾಯಣ ಸೀತಾರಾಮನ್ ರೈಲ್ವೆ ಇಲಾಖೆಯಲ್ಲಿದ್ದರು. ಸೀತಾಲಕ್ಷ್ಮಿ ರಾಮಸ್ವಾಮಿ ಕಾಲೇಜಿನಲ್ಲಿ ಬಿ ಎ ವ್ಯಾಸಂಗ ಮಾಡಿದ ಅವರು 1980ರಲ್ಲಿ ದಿಲ್ಲಿಯ ಜವಾಹರಲಾಲ್ ನೆಹರು ವಿಶ್ವವಿದ್ಯಾಲಯದಲ್ಲಿ ಎಮ್ ಪದವಿ ಪಡೆದರು. ಜೆಎನ್ಯುನಲ್ಲಿ ಆಂಧ್ರಪ್ರದೇಶ ಮೂಲದ ಪರಕಲ ಪ್ರಭಾಕರ ಅವರೊಂದಿಗೆ ಪ್ರೇಮ ವಿವಾಹವಾದರು. 1970ರಲ್ಲಿ ಪತಿ ಪ್ರಭಾಕರ್ ಅವರೊಂದಿಗೆ ಲಂಡನ್ಗೆ ತೆರಳಿ, ಲಂಡನ್ ಸ್ಕೂಲ್ ಆಫ್ ಎಕಾನಾಮಿಕ್ಸ್ನಿಂದ ಪಿಎಚ್ಡಿ ಪದವಿ ಪಡೆದರು. ಲಂಡನ್ನಲ್ಲಿ ಸೇಲ್ಸ್ ಗರ್ಲ್ ಲಂಡನ್ನಲ್ಲಿ ಪಿಎಚ್ಡಿ ಮಾಡುವ ವೇಳೆ ರೀಜೆಂಟ್ ಸ್ಟ್ರೀಟ್ನಲ್ಲಿದ್ದ ಹೋಂ ಡೆಕೋರ್ ಸ್ಟೋರ್ನಲ್ಲಿ ಸೇಲ್ಸ್ ಗರ್ಲ್ ಆಗಿ ಕೆಲಸ ಮಾಡುತ್ತಿದ್ದರು. ಆ ಬಳಿಕ ಬಿಬಿಸಿ ರೇಡಿಯೋದಲ್ಲಿ ತಮಿಳು ವಿಭಾಗದ ಭಾಷಾಂತರ ಮಾಡುವ ಕೆಲಸ ಮಾಡುತ್ತಿದ್ದರು. ಕೆಲ ಸಮಯದ ಬಳಿಕ ಪ್ರೈಸ್ ವಾಟರ್ಹೌಸ್ ಎಂಬ ಸಲಹಾ ಸಂಸ್ಥೆಯ ಸಂಶೋಧನಾ ವಿಭಾಗದಲ್ಲಿ ಅನಾಲಿಸ್ಟ್ ಆಗಿ ಕೆಲಸ ಮಾಡಿದ್ದರು. 1991ರಲ್ಲಿ ಲಂಡನ್ನಿಂದ ಹಿಂದುರಿಗಿದ ಪ್ರಭಾಕರ್ ಹಾಗೂ ನಿರ್ಮಲಾ, ಹೈದರಾಬಾದ್ನಲ್ಲಿ ಮಾರ್ಕೆಟಿಂಗ್ ರಿಸರ್ಚ್ ಸಂಸ್ಥೆಯನ್ನು ಆರಂಭಿಸಿದರು. ಪ್ರಭಾಕರ್ ತಂದೆಯ ಸ್ಮರಣಾರ್ಥ ಈ ಸಂಸ್ಥೆ ಆರಂಭಗೊಂಡಿತು. ಇದೇ ವೇಳೆ ನಿರ್ಮಲಾ ಸೀತಾರಾಮನ್ ಸಣ್ಣ ಶಾಲೆಯೊಂದನ್ನು ಆರಂಭಿಸಿದ್ದರು. ರಾಜಕಾರಣಕ್ಕೆ ಬಂದಿದ್ದು ಹೇಗೆ? ಪತಿ ಪ್ರಭಾಕರ ಹಾಗೂ ಕುಟುಂಬ ಕಾಂಗ್ರೆಸ್ ಬೆಂಬಲಿಗರು. ಆದರೆ ನಿರ್ಮಲಾ ಸೀತಾರಾಮನ್ ತನ್ನ ದಾರಿಯನ್ನು ತಾವೇ ಆಯ್ಕೆ ಮಾಡಿಕೊಂಡಿದ್ದರು. ಕುಟುಂಬ ರಾಜಕಾರದ ಜತೆ ಅವರು ಗುರುತಿಸಿಕೊಳ್ಳಲೇ ಇಲ್ಲ. 2003ರಿಂದ-05ರ ವರೆಗೆ ರಾಷ್ಟ್ರೀಯ ಮಹಿಳಾ ಆಯೋಗದ ಸದಸ್ಯೆಯಾಗಿದ್ದರು. 2006ರಲ್ಲಿ ಬಿಜೆಪಿಗೆ ಸೇರ್ಪಡೆಗೊಂಡರು. 2007ರಲ್ಲಿ ಅವರ ಪತಿ ಪ್ರಭಾಕರ್, ತೆಲುಗು ಸೂಪರ್ ಸ್ಟಾರ್ ಚಿರಂಜೀವಿ ಅವರ ಪ್ರಜಾರಾಜ್ಯ ಪಕ್ಷಕ್ಕೆ ಸೇರಿದ್ದರು. ಬಳಿಕ ಅವರು ಕೂಡ ಬಿಜೆಪಿ ಸೇರಿದರು. ಪ್ರಭಾಕರ್ ಅವರ ತಂದೆ-ತಾಯಿ ಕಾಂಗ್ರೆಸ್ ಪಕ್ಷದಿಂದ ಸ್ಪರ್ಧಿಸಿ ಗೆದ್ದು ಶಾಸಕರಾಗಿದ್ದರು. ಕಾಂಗ್ರೆಸ್ ಕುಟುಂಬದಲ್ಲಿ ಬಿಜೆಪಿ ಮಹಿಳೆ 2010ರಲ್ಲಿ ನಿರ್ಮಲಾ ಅವರನ್ನು ಬಿಜೆಪಿ ವಕ್ತಾರರನ್ನಾಗಿ ನೇಮಿಸಲಾಯಿತು. ಈ ವೇಳೆ ನಿತಿನ್ ಗಡ್ಕರಿ ಬಿಜೆಪಿ ಅಧ್ಯಕ್ಷರಾಗಿದ್ದರು. 2014ರ ಬಿಜೆಪಿ ಅಧಿಕಾರಕ್ಕೆ ಬಂದ ಬಳಿಕ ಮೊದಲು ವಾಣಿಜ್ಯ ಇಲಾಖೆಯ ರಾಜ್ಯ ಖಾತೆ ಸಚಿವರಾಗಿ ನೇಮಕಗೊಂಡಿದ್ದರು.
from India & World News in Kannada | VK Polls https://ift.tt/328axOX
