ಶ್ರೀನಗರ: ಸ್ವಾತಂತ್ರ್ಯ ದಿನಾಚರಣೆ ವೇಳೆ ಪಾಕಿಸ್ತಾನದ ಐಎಸ್‌ಐ ಉಗ್ರ ದಾಳಿ ನಡೆಸಲು ಸಂಚು ಹೂಡಿದೆ ಎಂಬ ಗುಪ್ತಚರ ಮಾಹಿತಿಗಳ ಮೇರೆಗೆ ಜಮ್ಮು ಮತ್ತು ಕಾಶ್ಮೀರದಲ್ಲಿ ಹೆಚ್ಚುವರಿ ಭದ್ರತಾ ಪಡೆಗಳನ್ನು ನಿಯೋಜಿಸಲಾಗಿದೆ ಎಂದು ಕೇಂದ್ರ ಸರಕಾರ ಸ್ಪಷ್ಟಪಡಿಸಿದೆ. 35ಎ ಮತ್ತು 370 ವಿಧಿಗಳ ರದ್ದತಿ ಪ್ರಸ್ತಾಪಕ್ಕೂ ಭದ್ರತಾ ಪಡೆಗಳ ಈ ನಿಯೋಜನೆಗೂ ಸಂಬಂಧವಿಲ್ಲ ಎಂದು ಸರಕಾರ ಹೇಳಿದೆ. ಎರಡು ದಿನಗಳ ಹಿಂದೆಯಷ್ಟೇ 100 ಕಂಪನಿಗಳಷ್ಟು (ಸುಮಾರು 10,000 ಯೋಧರು) ಅರೆ ಮಿಲಿಟರಿ ಪಡೆಗಳನ್ನು ಹೆಚ್ಚುವರಿಯಾಗಿ ಜಮ್ಮು ಮತ್ತು ಕಾಶ್ಮೀರದಲ್ಲಿ ನಿಯೋಜಿಸಲಾಗಿತ್ತು. 35ಎ ಮತ್ತು ರದ್ದತಿಯ ಪೂರ್ವಭಾವಿ ಕ್ರಮವಾಗಿಯೇ ಸರಕಾರ ಈ ಕ್ರಮ ಕೈಗೊಂಡಿದೆ ಎಂದು ಕಾಶ್ಮೀರದಲ್ಲಿ ಗುಲ್ಲೆದ್ದಿತ್ತು. ಆಗಸ್ಟ್‌ 15ರಂದು ಪಾಕಿಸ್ತಾನದ ಐಎಸ್‌ಐ ನಡೆಸಬಹುದಾದ ಯಾವುದೇ ವಿಧ್ವಂಸಕ ಕೃತ್ಯಗಳು ಮತ್ತು ದುಸ್ಸಾಹಸಗಳನ್ನು ತಡೆಯುವುದಷ್ಟೇ ಈ ವಿಶೇಷ ಭದ್ರತಾ ಪಡೆಗಳ ನಿಯೋಜನೆಯ ಉದ್ದೇಶ ಎಂದು ಅಧಿಕೃತ ಮೂಲಗಳು ತಿಳಿಸಿವೆ. ಪ್ರತ್ಯೇಕತಾವಾದಿ ಶಕ್ತಿಗಳ ವಿರುದ್ಧ ರಾಷ್ಟ್ರೀಯ ತನಿಖಾ ದಳ (ಎನ್‌ಐಎ) ಸಮರ ಸಾರಿದ್ದು, ಕಾಶ್ಮೀರದಲ್ಲಿ ಭಯೋತ್ಪಾದಕ ಕೃತ್ಯಗಳ ಪ್ರಮಾಣ ಗಣನೀಯವಾಗಿ ಕಡಿಮೆಯಾಗಿದೆ. ಹೀಗಾಗಿ ಐಎಸ್‌ಐ ಹತಾಶೆಗೊಂಡಿದೆ. ರಾಜ್ಯದಲ್ಲೀಗ ಪ್ರವಾಸಿಗರ ಸಂಖ್ಯೆ ಅಧಿಕವಾಗಿದೆ. ಹೋಟೆಲ್‌ಗಳು ಭರ್ತಿಯಾಗಿವೆ. ಅಮರನಾಥ ಯಾತ್ರಿಕರ ಸಂಖ್ಯೆಯೂ ಹೆಚ್ಚಾಗಿದೆ. ಕಲ್ಲು ತೂರಾಟದ ಪ್ರಕರಣಗಳು ತಗ್ಗಿವೆ. 'ಬಂದ್‌, ಮುಷ್ಕರದ ಕರೆಗಳೂ ಕಡಿಮೆಯಾಗಿವೆ. ಜನತೆಯೂ ಇಂತಹ ಕರೆಗಳಿಗೆ ಸ್ಪಂದಿಸುತ್ತಿಲ್ಲ. ಜಮ್ಮು ಕಾಶ್ಮೀರದ ಬಗ್ಗೆ ಪಾಕಿಸ್ತಾನ ಬಿಂಬಿಸಲು ಯತ್ನಿಸುತ್ತಿರುವ ಚಿತ್ರಣಗಳೆಲ್ಲವೂ ಸುಳ್ಳಾಗಿವೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು. ಕಾಶ್ಮೀರ ಕಣಿವೆಯಲ್ಲಿ ಶಾಂತಿ ಮರುಳುವುದನ್ನು ಐಎಸ್‌ಐ ಸಹಿಸುತ್ತಿಲ್ಲ. ಹೀಗಾಗಿ ಶತಾಯಗತಾಯ ವಿಧ್ವಂಸಕ ಕೃತ್ಯಗಳನ್ನು ನಡೆಸಲೇಬೇಕೆಂದು ಸಂಚು ಹೂಡಿದೆ. ಅದನ್ನು ವಿಫಲಗೊಳಿಸಲು ನಮ್ಮ ಭದ್ರತಾ ಪಡೆಗಳು ಸಮರ್ಥವಾಗಿವೆ ಎಂದು ಅವರು ತಿಳಿಸಿದರು.
from India & World News in Kannada | VK Polls https://ift.tt/2ymykNj
