ಮುಂಬಯಿ: ಟೀಮ್ ಇಂಡಿಯಾ ಉಪ ನಾಯಕ ಜತೆಗಿನ ಭಿನ್ನಾಭಿಪ್ರಾಯದ ಬಗ್ಗೆ ನಾಯಕ ಕೊನೆಗೂ ಮೌನ ಮುರಿದಿದ್ದಾರೆ. ವೆಸ್ಟ್‌ಇಂಡೀಸ್ ಪ್ರವಾಸಕ್ಕೂ ಮುನ್ನ ಮುಂಬಯಿಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ತಂಡದ ಒಳ ಜಗಳದ ಬಗ್ಗೆ ವಿರಾಟ್ ಖಡಕ್ ಮಾತುಗಳಲ್ಲೇ ಉತ್ತರಿಸಿದ್ದಾರೆ. ನನ್ನ ಮತ್ತು ರೋಹಿತ್ ಶರ್ಮ ನಡುವೆ ಯಾವುದೇ ಮನಸ್ತಾಪವಿಲ್ಲ. ಒಳಜಗಳವೆಂಬ ಶುದ್ಧ ಸುಳ್ಳನ್ನು ಸೃಷ್ಟಿ ಮಾಡಿ ಹರಿಯಬಿಡಲಾಗಿದೆ. ಇದು ನಮಗೆ ತೋರುವ ಅಗೌರವ ಎಂದು ತೀಕ್ಷ್ಣವಾಗಿ ಪ್ರತಿಬಿಂಬಿಸಿದ್ದಾರೆ. ನನಗೆ ಯಾರನ್ನಾದರೂ ಇಷ್ಟವಿಲ್ಲದಿದ್ದರೆ ಅದು ನನ್ನ ಮುಖದಲ್ಲಿ ಪ್ರತಿಬಿಂಬಿಸುತ್ತದೆ. ಅದು ಅಷ್ಟೇ ಸರಳವಾಗಿದೆ. ಡ್ರೆಸ್ಸಿಂಗ್ ರೂಮ್‌ನಲ್ಲಿ ಉತ್ತಮ ವಾತಾವರಣ ಇಲ್ಲದಿರುವ ಹೊರತು ಮೈದಾನದಲ್ಲಿ ಅತ್ಯುತ್ತಮ ನಿರ್ವಹಣೆ ನೀಡುವುದು ಅಸಾಧ್ಯ ಎಂದು ವಿರಾಟ್ ನುಡಿದರು. ಮೈದಾನದಲ್ಲಿ ನಾವೆಲ್ಲರೂ ಆಟವಾಡುತ್ತಿರುವ ರೀತಿಯನ್ನೇ ನೋಡಿದರೆ ನಿಮಗೆ ಮನಗಾಣಬಹುದಾಗಿದೆ. ಅಷ್ಟಕ್ಕೂ ಸಂಶಯಗಳಿದ್ದರೆ ನಮ್ಮ ಜತೆಗೆ ನೇರವಾಗಿ ಡ್ರೆಸ್ಸಿಂಗ್ ಕೊಠಡಿಗೆ ಬನ್ನಿ. ಅಲ್ಲಿಯೇ ನಾವೆಲ್ಲರೂ ಜತೆಯಾಗಿ ಬೆರೆತುಕೊಳ್ಳುತ್ತಿದ್ದೇವೆ ಎಂಬುದನ್ನು ಕಣ್ಣಾರೆಯಾಗಿ ನೋಡಿ. ವೀಡಿಯೋ ಕಳುಹಿಸಿಕೊಡಲು ಸಾಧ್ಯವಿಲ್ಲ ಎಂದು ಪತ್ರಕರ್ತರನ್ನು ಆಹ್ವಾನಿಸಿದರು. ''ನಾನು 11 ವರ್ಷಗಳಿಂದ ಕ್ರಿಕೆಟ್ ಆಡುತ್ತಿದ್ದೇನೆ. ರೋಹಿತ್ ಶರ್ಮ 10 ವರ್ಷಗಳಿಂದ ಆಡುತ್ತಿದ್ದಾರೆ. ನಮ್ಮ ಮಧ್ಯೆ ಯಾವುದೇ ಜಗಳವಿಲ್ಲ. ಪದೇಪದೆ ಸುಳ್ಳುಗಳನ್ನು ಹರಿಯಬಿಡುವ ಕಾರ್ಯ ಸರಿಯಲ್ಲ. ಬಣ ಜಗಳದ ಆರೋಪವೇ ಮೂರ್ಖತನದ್ದು,'' ಎಂದು ಕಿಡಿಕಾರಿದ್ದಾರೆ. ''ಕಳೆದ ಅನೇಕ ದಿನಗಳಿಂದ ಈ ರೀತಿಯ ಮಿಥ್ಯಾರೋಪಗಳನ್ನು ಕೇಳಿಸಿಕೊಳ್ಳುತ್ತಿದ್ದೇನೆ. ಅದರಲ್ಲೂ ಖಾಸಗಿ ವಿಷಯವನ್ನು ಮುನ್ನೆಲೆಗೆ ತರುತ್ತಿರುವುದು ದುರದೃಷ್ಟಕರ. ಒಳ್ಳೆಯ ವಿಚಾರಗಳ ಕುರಿತು ಜಾಣ ಕುರುಡುತನ ಪ್ರದರ್ಶಿಸಲಾಗುತ್ತಿದೆ. ಕಾಲ್ಪನಿಕ ಕತೆಗಳನ್ನು ಸೃಷ್ಟಿಸಿ ಅದನ್ನು ಪೋಷಿಸಲಾಗುತ್ತಿದೆ,'' ಎಂದರು. ಅನುಷ್ಕಾ ಶರ್ಮಾ ಇನ್‌ಸ್ಟಾಗ್ರಾಂ ಪೋಸ್ಟ್‌ಗೆ ಸಂಬಂಧಿಸಿದಂತೆ ಪ್ರಶ್ನೆಗಳು ಎದ್ದಾಗ, ಇದನ್ನು ಬಹಳ ಸಮಯದಿಂದ ನೋಡುತ್ತಿದ್ದೇನೆ. ಖಾಸಗಿ ಬದುಕನ್ನು ಎಳೆದು ತರದಿರಿ. ಇದು ನಮಗೆ ತೋರುವ ಅಗೌರವ ಎಂದು ಹೇಳಿದರು. ಇದಕ್ಕೆ ಕೈಜೋಡಿಸಿದ ರವಿಶಾಸ್ತ್ರಿ, ಕೆಲವೇ ದಿನಗಳಲ್ಲಿ ಪತ್ನಿಯರು ಬ್ಯಾಟಿಂಗ್, ಬೌಲಿಂಗ್ ಮಾಡುತ್ತಿದ್ದೀರಿ ಎಂಬುದನ್ನು ಆಲಿಸುವಿರಿ ಎಂದರು. ಕ್ರಿಕೆಟ್‌ಗಿಂತಲೂ ಮಿಗಿಲಾಗಿ ಯಾರೂ ಇಲ್ಲ. ನಾನೇ ಆಗಲಿ, ವಿರಾಟ್ ಆಗಲಿ, ತಂಡದಲ್ಲಿರುವ ಯಾವ ವ್ಯಕ್ತಿಯೂ ಕ್ರಿಕೆಟಿಗಿಂತಲೂ ಮಿಗಿಲಲ್ಲ. ನಾನು ಕೂಡಾ ಡ್ರೆಸ್ಸಿಂಗ್ ಕೊಠಡಿಯ ಭಾಗವಾಗಿದ್ದು, ಇವೆಲ್ಲವೂ ಅಸಂಬಂಧ ಎಂದು ಎಂದು ಕಿಡಿ ಕಾರಿದರು. ನನಗೆ ಅವಕಾಶ ಸಿಕ್ಕಾಗೆಲ್ಲಾ ರೋಹಿತ್ ಶರ್ಮಾರನ್ನು ಅಭಿನಂದಿಸುತ್ತೇನೆ. ಏಕಂದರೆ ಅವರು ಅತ್ಯುತ್ತಮ ಆಟಗಾರನೆಂಬುದು ನನ್ನ ನಂಬಿಕೆಯಾಗಿದೆ. ಈ ಎಲ್ಲ ಕಥೆಗಳನ್ನು ರಚಿಸಿ ಯಾರು ಪ್ರಯೋಜನ ಪಡೆದುಕೊಳ್ಳುತ್ತಿದ್ದಾರೆ ಎಂಬುದು ತಿಳಿದಿಲ್ಲ. ಭಾರತ ತಂಡವನ್ನು ಪ್ರಗತಿಯತ್ತ ಮುನ್ನಡೆಸುವುದು ನಮ್ಮೆಲ್ಲರ ಧ್ಯೇಯವಾಗಿದೆ ಎಂದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2LOfBTw
