ಚೆನ್ನೈ: ನಕಲಿ (ಫೇಕ್) ಸಂದೇಶಗಳು ಮಾಡುವ ರಾದ್ಧಾಂತ ಅಷ್ಟಿಷ್ಟಲ್ಲ. ಇಂಥ ಫೇಕ್ ಸಂದೇಶ ಎಲ್ಲಿಂದ ಹುಟ್ಟಿಕೊಂಡಿತು, ಯಾರ ಮೂಲಕ ಸಾಗಿ ಬಂತು ಎಂಬುದನ್ನು ಪತ್ತೆ ಮಾಡಬಹುದೇ? ಇಂಥ ಪ್ರಶ್ನೆಯನ್ನು ಮದ್ರಾಸ್ ಹೈಕೋರ್ಟ್ ಮುಂದಿಟ್ಟಿದೆ. ಇದೀಗ ನ್ಯಾಯಾಲಯಕ್ಕೆ ಈ ನಿಟ್ಟಿನಲ್ಲಿ ಸಹಕರಿಸಲಿದ್ದಾರೆ ಐಐಟಿ ಮದ್ರಾಸ್ ಪ್ರೊಫೆಸರ್ ಆಗಿರುವ ವಿ.ವಿ. ಕಾಮಕೋಟಿ. ಈ ಸಾಧ್ಯತೆಯ ಕುರಿತು ವರದಿ ಸಲ್ಲಿಸುವಂತೆ ನ್ಯಾಯಾಲಯವು ಕಾಮಕೋಟಿ ಅವರಿಗೆ ಸೂಚಿಸಿದೆ. ಆಧಾರ್ ಗುರುತು ದೃಢೀಕರಣಕ್ಕೆ ಸಾಮಾಜಿಕ ಜಾಲ ತಾಣಗಳ ಪ್ರೊಫೈಲ್ ಬಳಸುವುದಕ್ಕೆ ಸಂಬಂಧಿಸಿದ ಮೇಲ್ಮನವಿ ಅರ್ಜಿಯೊಂದರ ವಿಚಾರಣೆ ಸಂದರ್ಭ ನ್ಯಾಯಾಲಯವು ಪರಿಶೀಲನೆ ನಡೆಸಿ, ಈ ಕುರಿತು ಮಾಹಿತಿ ಸಂಗ್ರಹಿಸುವಂತೆ ತಿಳಿಸಿದೆ. ತನ್ನ ಸಂದೇಶ ಮೂಲ ಪತ್ತೆ ಹಚ್ಚುವ ಸರಕಾರದ ಎಲ್ಲ ಪ್ರಯತ್ನಗಳನ್ನೂ ವಾಟ್ಸ್ಆ್ಯಪ್ ವಿರೋಧಿಸುತ್ತಲೇ ಬಂದಿದೆ. ಇದು ಎನ್‌ಕ್ರಿಪ್ಟ್ ಆಗಿದೆ, ಸುರಕ್ಷಿತವಾಗಿದೆ ಮತ್ತು ಈ ಕಾರಣದಿಂದ ಅದರ ಮೂಲ ಪತ್ತೆ ಮಾಡುವುದು ಸಾಧ್ಯವಿಲ್ಲ ಎಂದು ವಾಟ್ಸ್ಆ್ಯಪ್ ಹೇಳಿದೆ. ಆದರೂ ಸಂದೇಶ ಮೂಲವನ್ನು ಪತ್ತೆ ಮಾಡಬಹುದು ಎನ್ನುತ್ತಾರೆ ವಿ.ವಿ.ಕಾಮಕೋಟಿ. ವಾಟ್ಸ್ಆ್ಯಪ್‌ನ ಎನ್‌ಕ್ರಿಪ್ಷನ್ ಮೇಲೆ ಯಾವುದೇ ತೊಂದರೆಯಾಗದಂತೆ ಮತ್ತು ಅದರ ನೀತಿಗೂ ಧಕ್ಕೆಯಾಗದಂತೆ, 'ಮೂಲ' ಎಂಬ ಐಡೆಂಟಿಟಿ ಟ್ಯಾಗ್ ಸೇರಿಸಬಹುದು ಎಂದು ಕಾಮಕೋಟಿ ಅವರು ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ. ಸಂದೇಶಗಳನ್ನು ಫಾರ್ವರ್ಡ್ ಮಾಡಿದಾಗ, ಅದರಲ್ಲಿ 'Forwarded' ಎಂಬ ಟ್ಯಾಗ್ ಕಾಣಿಸುತ್ತದೆ. ಇದೇ ರೀತಿ, ಯಾವುದೇ ಸಂದೇಶವು ಫಾರ್ವರ್ಡ್ ಆಗುವಾಗ, ಅದನ್ನು ಸೃಷ್ಟಿಸಿದವರ ಸಂಖ್ಯೆಯೊಂದಿಗೆ Originator ಎಂಬ ಟ್ಯಾಗ್ ಸೇರಿಸುವುದು ಸಾಧ್ಯ ಎಂದು ನ್ಯಾಯಾಲಯದ ವಿಭಾಗೀಯ ಪೀಠಕ್ಕೆ ಪ್ರೊಫೆಸರ್ ಸಲಹೆ ನೀಡಿದ್ದಾರೆ. ಇದರಿಂದ, ಯಾವುದೇ ಹಂತದಲ್ಲಿಯೂ ವಾಟ್ಸ್ಆ್ಯಪ್‌ಗೆ ಈ ಸಂದೇಶವನ್ನು ಓದಲೇಬೇಕಾದ ಅನಿವಾರ್ಯತೆ ಬರುವುದಿಲ್ಲ ಎಂದಿದ್ದಾರವರು. ಬಳಕೆದಾರರು ಯಾವುದೇ ಅನುಮತಿಯಿಲ್ಲದೆ ಯಾವುದೇ ಸಂದೇಶಗಳನ್ನು ಮುಕ್ತವಾಗಿ ಫಾರ್ವರ್ಡ್ ಮಾಡುತ್ತಿರುವಾಗ, ನಮ್ಮದು 'ಗೌಪ್ಯತೆ ಬಗ್ಗೆ ಕಾಳಜಿ' ವಹಿಸುತ್ತಿರುವ ಸಂಸ್ಥೆ ಎಂದು ವಾಟ್ಸ್ಆ್ಯಪ್ ಹೇಳಿಕೊಳ್ಳುವಂತಿಲ್ಲ ಎಂದೂ ಅವರು ವಾದಿಸಿದ್ದಾರೆ. ಈ ಖಟ್ಲೆಯಲ್ಲಿ ವಾಟ್ಸ್ಆ್ಯಪ್, ಫೇಸ್‌ಬುಕ್, ಗೂಗಲ್, ಟ್ವಿಟರ್ ಅಂತೆಯೇ ಕೇಂದ್ರ ಹಾಗೂ ತಮಿಳುನಾಡು ಸರಕಾರಗಳು ಪ್ರತಿವಾದಿಗಳು. ಸಂದೇಶಗಳ ಮೂಲ ಪತ್ತೆ ಹಚ್ಚುವ ನಿಟ್ಟಿನಲ್ಲಿ ಡಿಜಿಟಲ್ ರೂಪದಲ್ಲಿ ಬೆರಳಚ್ಚಿನ ವ್ಯವಸ್ಥೆಯನ್ನು ಅಳವಡಿಸುವಂತೆ ಕೇಂದ್ರ ಸರಕಾರವು ವಾಟ್ಸ್ಆ್ಯಪ್‌ಗೆ ಜೂನ್ ತಿಂಗಳಲ್ಲಿ ಸೂಚಿಸಿತ್ತು. ಭಾರತದಲ್ಲಿ ಸುಮಾರು 35ರಿಂದ 40 ಕೋಟಿ ಮಂದಿ ವಾಟ್ಸ್ಆ್ಯಪ್ ಬಳಸುತ್ತಿದ್ದು, ಇದು ಕಿರು ತಂತ್ರಾಂಶದ ಅತಿದೊಡ್ಡ ಮಾರುಕಟ್ಟೆಯೂ ಆಗಿದೆ. ಸೈಬರ್ ಅಪರಾಧಗಳನ್ನು ತಡೆಯುವ ನಿಟ್ಟಿನಲ್ಲಿ ಆಧಾರ್ ಜತೆ ಸೋಷಿಯಲ್ ಮೀಡಿಯಾ ಖಾತೆಗಳನ್ನು ಬೆಸೆಯಬೇಕೆಂದು ಆ್ಯಂಟನಿ ಕ್ಲೆಮೆಂಟ್ ರುಬಿನ್ ಎಂಬವರು ಮದ್ರಾಸ್ ಹೈಕೋರ್ಟ್‌ಗೆ ಸಾರ್ವಜನಿಕ ಹಿತಾಸಕ್ತಿ ದಾವೆ ಸಲ್ಲಿಸಿದ್ದರು. ಗಮನಿಸಬೇಕಾದ ಅಂಶವೆಂದರೆ, ಕಾಮಕೋಟಿ ಅವರು ಪ್ರಧಾನಿ ಕಾರ್ಯಾಲಯಕ್ಕೆ ಭದ್ರತೆ ಕುರಿತು ಸಲಹೆ ನೀಡುವ ರಾಷ್ಟ್ರೀಯ ಸುರಕ್ಷತೆ ಸಲಹಾ ಮಂಡಳಿಯ ಸದಸ್ಯರೂ ಆಗಿದ್ದಾರೆ.
from India & World News in Kannada | VK Polls https://ift.tt/2SI9yAM
