ಅಮೆರಿಕಾ, ಕೆನಡಾದಲ್ಲಿ ನೆಲೆ ಕಂಡುಕೊಂಡ ಭಾರತದ ಬೀದಿ ನಾಯಿಗಳು

ವೀರಾ, ರಾಣಿ, ಪೊಂಕಿ, ಗೋಲ್ಡಿ- ಈ ಪುಟಾಣಿ ನಾಯಿ ಮರಿಗಳ ಪುಟ್ಟ ಕಂಗಳಲ್ಲಿ ಮುಗ್ಧತೆಯೇ ಲಾಸ್ಯವಾಡುತ್ತದೆ. ಬಾಲ ಅಲ್ಲಾಡಿಸುತ್ತ ಓಡಿ ಬಂದು ಕಾಲು ನೆಕ್ಕುವ ಈ ಮುದ್ದು ಮುದ್ದು ಮರಿಗಳನ್ನು ಕಂಡರೆ ಯಾರಿಗಾದರೂ ಸರಿ ಎತ್ತಿ ಮುದ್ದಾಡಬೇಕೆನ್ನಿಸುತ್ತದೆ. ಕೆಲ ದಿನಗಳ ಹಿಂದೆ ಭಾರತದ ಬೀದಿಗಳಲ್ಲಿ ಆಹಾರಕ್ಕಾಗಿ ಅಲೆದಾಡುತ್ತ ಕೃಶ ದೇಹ, ಮೈ ತುಂಬಾ ವೃಣ, ಕಾಯಿಲೆಗಳಿಂದ ಬಳಲುತ್ತ ದಯನೀಯ ಸ್ಥಿತಿಯಲ್ಲಿದ್ದ ಈ ಮರಿಗಳೆಲ್ಲ ಈಗ , ಅಮೆರಿಕಾಗಳಲ್ಲಿ ಆಶ್ರಯ ಪಡೆದಿವೆ. ಅವರಿಗೆಲ್ಲ ಸೂರನ್ನು ಒದಗಿಸಿಕೊಟ್ಟ ಶ್ರೇಯಸ್ಸು 26 ವರ್ಷದ ಅಮೆರಿಕನ್ ಮಹಿಳೆ ಜೆಸ್ಸಿಕಾ ಹಾಲ್ಟ್ಜ್ಮನ್‌ಗೆ ಸೇರುತ್ತದೆ. ಸಿಯಾಟಲ್ ಮೂಲದ ಜೆಸ್ಸಿಕಾ ಕಳೆದ 9 ತಿಂಗಳ ಹಿಂದೆ ಭಾರತದ ಬೀದಿ ಬದಿಯಲ್ಲಿ ಕರುಣಾಜನಕ ಸ್ಥಿತಿಯಲ್ಲಿ ಕಂಡು ಬಂದ ಪುಟ್ಟ ಪುಟ್ಟ ನಾಯಿ ಮರಿಗಳ ಪಾಲಿಗೆ ದೇವತೆಯಾಗಿ ಬಂದರು. 2018ರಲ್ಲಿ ‘Delhi the Foundation’ ಎಂಬ ಸಂಸ್ಥೆ ಸ್ಥಾಪಿಸಿದ ಜೆಸ್ಸಿಕಾ, ಸಹಾಯದ ನಿರೀಕ್ಷೆಯಲ್ಲಿದ್ದ ಭಾರತದ ಬೀದಿ ನಾಯಿಗಳಿಗೆ ಹೊಸ ಬದುಕು ಕಟ್ಟಿಕೊಡುವ ಕಾರ್ಯಕ್ಕೆ ಕೈ ಹಾಕಿದರು. ಸ್ವಯಂ ಸೇವಕರ ಮತ್ತು ಪ್ರಾಣಿ ದಯಾ ಸಂಸ್ಥೆಗಳ ಸಹಯೋಗದೊಂದಿಗೆ ಆಶ್ರಯದ ಅಗತ್ಯದಲ್ಲಿದ್ದ ನಾಯಿಗಳನ್ನು ಗುರುತಿಸಿ ವಿದೇಶದಲ್ಲಿ ಅವುಗಳನ್ನು ದತ್ತು ಪಡೆಯಲು ತಯಾರಿರುವವರ ಶೋಧದಲ್ಲಿ ತೊಡಗಿದರು. ಆದರೆ ಅವರ ಈ ಹಾದಿ ಸುಲಭವಾಗಿರಲಿಲ್ಲ. ವಿದೇಶಕ್ಕೆ ಸಾಗಿಸಲು ಅಗತ್ಯ ದಾಖಲೆಗಳನ್ನು ದೊರಕಿಸಿಕೊಳ್ಳುವಲ್ಲಿ ಅತಿಯಾದ ವಿಳಂಬ ಸೇರಿದಂತೆ ಆರ್ಥಿಕ ಸಮಸ್ಯೆ ಸಹ ಈ ಕಾರ್ಯಕ್ಕೆ ತೊಡಕಾಯಿತು. ಎದುರಾದ ಎಲ್ಲ ಅಡಚಣೆಗಳನ್ನು ದಾಟಿ ಅವರು ಕೆನಡಾ ಮತ್ತು ಅಮೆರಿಕಾಕ್ಕೆ ನಾಯಿ ಮರಿಗಳನ್ನು ಸಾಗಿಸಲು ಯಶಸ್ವಿಯಾದರು. ನಿಷ್ಠೆ ಮತ್ತು ಅತಿಯಾದ ಪ್ರೀತಿಯನ್ನು ತೋರುವ ಕಾರಣಕ್ಕೆ ದೇಶಿ ನಾಯಿಗಳು ಎಲ್ಲರಿಗೂ ಆಪ್ತವಾಗುತ್ತವೆ ಎನ್ನುತ್ತಾರೆ ಜೆಸ್ಸಿಕಾ.

from India & World News in Kannada | VK Polls https://ift.tt/32WtJPU