ಮುಂಬಯಿ: 9 ನೇ ತರಗತಿಯಲ್ಲಿ ಓದುತ್ತಿರುವ ಇಬ್ಬರು ಅಪ್ರಾಪ್ತ ವಿದ್ಯಾರ್ಥಗಳು ಮತ್ತೊಬ್ಬ ಗೆಳೆಯನ ಸಹಾಯದೊಂದಿಗೆ ತಮ್ಮದೇ ಸಹಪಾಠಿಯಿಂದ ಬರೋಬ್ಬರಿ 3 ಲಕ್ಷ ರೂಪಾಯಿ ಮೌಲ್ಯದ ಮತ್ತು ಚಿನ್ನಭರಣ ದೋಚಿದ ಬೆಚ್ಚಿ ಬೀಳಿಸುವ ಘಟನೆ ಮಹಾರಾಷ್ಟ್ರದಲ್ಲಿ ವರದಿಯಾಗಿದೆ. ಇಬ್ಬರು ಆರೋಪಿ ವಿದ್ಯಾರ್ಥಿಗಳಲ್ಲಿ ಒಬ್ಬನ ಸೋದರ ಸಂಬಂಧಿ ಕೂಡ ಈ ಕೃತ್ಯದಲ್ಲಿ ಪಾಲುದಾರನಾಗಿದ್ದಾನೆ. ಆತನಿಗೆ ಗೂಂಡಾಗಳ ಸ್ನೇಹವಿದ್ದು, ಅವರು ಸದಾ ತಲ್ವಾರ್ ಮತ್ತು ಚಾಕುವನ್ನಿಟ್ಟುಕೊಂಡಿರುತ್ತಾರೆ ಎಂದು ಪೀಡಿತ ಬಾಲಕನಿಗೆ ಕೊಲೆ ಬೆದರಿಕೆ ಒಡ್ಡಿ ಆತನಿಂದ ಹಣ ಮತ್ತು ಚಿನ್ನಾಭರಣವನ್ನು ದೋಚಲಾಗುತ್ತಿತ್ತು. ಪೀಡಿತ ಬಾಲಕ ಇದ್ದಕ್ಕಿದ್ದಂತೆ ತೂಕ ಇಳಿಕೆಗೊಳಗಾಗಿದ್ದಕ್ಕೆ ಚಿಂತಿತಗೊಂಡ ತಾಯಿ ಭಾನುವಾರ ಆತನನ್ನು ಆಸ್ಪತ್ರೆಗೆ ಕರೆದೊಯ್ದಿದ್ದಳು. ಆ ಸಂದರ್ಭದಲ್ಲಿ ಆತನಿಗೆ ಫೋನ್ ಕರೆ ಬಂದಿದ್ದು ತಾಯಿ ಅದನ್ನು ಸ್ವೀಕರಿಸಿದ್ದಾಳೆ. ಕರೆ ಮಾಡಿದವರು ಕೆಲಸ ಆಯಿತೇ ಎಂದು ಹೇಳಿದಾಗ ನೀನ್ಯಾರು ಎಂದಾಕೆ ಪ್ರಶ್ನಿಸಿದ್ದಾಳೆ. ಕರೆ ಮಾಡಿದಾತ (ಆರೋಪಿಗಳಲ್ಲೊಬ್ಬ) ನಿನ್ನ ಮಗನ ಗೆಳೆಯ ಎಂದು ಪರಿಚಯಿಸಿಕೊಂಡಿದ್ದಾನೆ. ಈ ಅನುಮಾನಾಸ್ಪದ ಫೋನ್ ಕರೆ ಬಗ್ಗೆ ಕೇಳಿದಾಗ ಬಾಲಕ ಏನೋ ಕಾರಣ ನೀಡಿ ಮಾತನ್ನು ಬದಲಿಸಿದ್ದ. ಆದರೆ ಮರು ದಿನ ಅವರ ಮನೆಯಿಂದ ಹಣ ನಾಪತ್ತೆಯಾಗಿರುವುದು ಬೆಳಕಿಗೆ ಬಂತು. ಸಾರಿಗೆ ವ್ಯವಹಾರ ನಡೆಸುತ್ತಿದ್ದ ತಂದೆ ಏಕಾಏಕಿ ಮನೆಯಿಂದ ಹಣ ನಾಪತ್ತೆಯಾಗಿದ್ದಕ್ಕೆ ಮಗನಲ್ಲಿ ನೀನೇನಾದರೂ ತೆಗೆದುಕೊಂಡೆಯಾ ಕೇಳಿದ್ದಕ್ಕಾತ ತಿಂಡಿ ಕೊಂಡು ತಿಂದೆ ಎಂದು ಹೇಳಿದ. ಆದರೆ ಆತ ಹೇಳಿದ ಅಂಗಡಿಗೆ ಕರೆದುಕೊಂಡು ಹೋಗಿ ಕೇಳಲಾಗಿ ಅಂಗಡಿಯಾತ ಅದನ್ನು ನಿರಾಕರಿಸಿದ. ಪೊಲೀಸ್ ಠಾಣೆಗೆ ಕರೆದುಕೊಂಡು ಹೋಗುವುದಾಗಿ ಹೇಳಿದಾಗ ಆತ ಸತ್ಯವನ್ನು ಬಾಯ್ಬಿಟ್ಟಿದ್ದಾನೆ. ಮಗನೊಂದಿಗೆ ಶಾಲೆಗೆ ಹೋದ ತಂದೆ ಪ್ರಾಚಾರ್ಯರಲ್ಲಿ ಎಲ್ಲವನ್ನು ಹೇಳಿದ್ದಾರೆ. ಆರೋಪಿಗಳಲ್ಲೊಬ್ಬನ ಪೋಷಕರನ್ನು ಕರೆದು ಈ ಬಗ್ಗೆ ವಿಚಾರಣೆ ನಡೆಸಿದಾಗ ಅವರು ಸಹ ಬೆದರಿಕೆಯನ್ನೊಡ್ಡಿದ್ದಾರೆ. ಬಳಿಕ ಪೀಡಿತನ ತಂದೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ನನ್ನ ಮಗನನ್ನು ಮತ್ತು ಕುಟುಂಬವನ್ನು ಸಾಯಿಸುವ ಬೆದರಿಕೆ ಒಡ್ಡಿ ಹಣ ದೋಚಲಾಗುತ್ತಿತ್ತು, ಎಂದು ಪೀಡಿತನ ತಂದೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ, ವೈದ್ಯಕೀಯ ವೆಚ್ಚ, ವಿಮೆ ಮತ್ತು ಉಳಿತಾಯದ ಉದ್ದೇಶಕ್ಕೆ ಮನೆಯಲ್ಲಿಟ್ಟಿದ್ದ ಹಣವನ್ನೆಲ್ಲ ಮಗ ಆರೋಪಿಗಳಿಗೆ ನೀಡಿದ್ದಾನೆ ಎಂದವರು ಹೇಳಿದ್ದಾರೆ ಅಪ್ರಾಪ್ತ ಆರೋಪಿಗಳ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.
from India & World News in Kannada | VK Polls https://ift.tt/2JWWGUz
