ಕೊಲಂಬೊ: ಗೆಲುವಿನೊಂದಿಗೆ ಶ್ರೀಲಂಕಾದ ಬಲಗೈ ಅನುಭವಿ ವೇಗಿ , ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ವಿದಾಯ ಹಾಡಿದ್ದಾರೆ. ಮಾಲಿಂಗ ಮೂರು ವಿಕೆಟ್ ನೆರವಿನಿಂದ ಬಾಂಗ್ಲಾದೇಶ ವಿರುದ್ಧ ನಡೆದ ಏಕದಿನ ಸರಣಿ ಮೊದಲ ಪಂದ್ಯದಲ್ಲಿ ಶ್ರೀಲಂಕಾ 91 ರನ್ ಅಂತರದ ಅಧಿಕಾರಯುತ ಗೆಲುವನ್ನು ದಾಖಲಿಸಿದೆ. ಈ ಮೂಲಕ 1-0 ಅಂತರದ ಮುನ್ನಡೆ ಕಾಯ್ದುಕೊಂಡಿದೆ. ಮೊದಲು ಬ್ಯಾಟಿಂಗ್ ನಡೆಸಿದ ಲಂಕಾ ತಂಡವು ಕುಸಾಲ್ ಪರೇರಾ (111) ಶತಕದ ನೆರವಿನಿಂದ ಎಂಟು ವಿಕೆಟ್ ನಷ್ಟಕ್ಕೆ 314 ರನ್‌ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತ್ತು. ಬಳಿಕ ಗುರಿ ಬೆನ್ನಟ್ಟಿದ ಬಾಂಗ್ಲಾದೇಶ 41.4 ಓವರ್‌ಗಳಲ್ಲಿ 223 ರನ್‌ಗಳಿಗೆ ತನ್ನೆಲ್ಲ ವಿಕೆಟುಗಳನ್ನು ಕಳೆದುಕೊಂಡಿತು. ಮಾಲಿಂಗ 9.4 ಓವರ್‌ಗಳಲ್ಲಿ 38 ರನ್ ತೆತ್ತು ಮೂರು ವಿಕೆಟುಗಳನ್ನು ಕಬಳಿಸಿ ಮಿಂಚಿದರು. ಇದರಲ್ಲಿ ಎರಡು ಮೇಡನ್ ಓವರ್‌ಗಳು ಸೇರಿದ್ದವು. ಒಟ್ಟಾರೆಯಾಗಿ 226 ಏಕದಿನ ಪಂದ್ಯಗಳಲ್ಲಿ 338 ವಿಕೆಟುಗಳನ್ನು ಕಬಳಿಸಿದ್ದಾರೆ. ಈ ಮೂಲಕ ಮುತ್ಯಯ್ಯ ಮುರಳೀಧರನ್ ಹಾಗೂ ಚಾಮಿಂಡ ವಾಸ್ ಬಳಿಕ ಲಂಕಾ ಪರ ಏಕದಿನದಲ್ಲಿ ಅತಿ ಹೆಚ್ಚು ವಿಕೆಟುಗಳನ್ನು ಗಳಿಸಿದ ಬೌಲರ್ ಎನಿಸಿಕೊಂಡಿದ್ದಾರೆ. ಎಂಟು ಬಾರಿ ಐದು ವಿಕೆಟ್ ಸಾಧನೆ ಮಾಡಿರುವ ಮಾಲಿಂಗ ಜೀವನಶ್ರೇಷ್ಠ ಬೌಲಿಂಗ್ ಸಾಧನೆ 38/6 ಆಗಿದೆ. 15 ವರ್ಷಗಳ ಕಾಲ ಲಂಕಾ ಕ್ರಿಕೆಟ್‌ಗೆ ಸೇವೆ ಸಲ್ಲಿಸಿರುವ 35ರ ಹರೆಯದ ಮಾಲಿಂಗ ಇದು ನಿವೃತ್ತಿ ಸಲ್ಲಿಸಲು ಸರಿಯಾದ ಸಮಯ ಎಂದಿದ್ದಾರೆ. ಈ ಹಿಂದೆ 2010ರಲ್ಲೇ ಟೆಸ್ಟ್ ಕ್ರಿಕೆಟ್‌ಗೆ ನಿವೃತ್ತಿ ಸಲ್ಲಿಸಿದ್ದರು. ಹಾಗೆಯೇ ಮುಂದಿನ ವರ್ಷ ನಡೆಯಲಿರುವ ಟ್ವೆಂಟಿ-20 ವಿಶ್ವಕಪ್ ಬಳಿಕ ಚುಟುಕು ಪ್ರಕಾರಕ್ಕೂ ವಿದಾಯವನ್ನು ಹಾಡಲಿದ್ದಾರೆ. ಏಕದಿನದಲ್ಲಿ ಮೂರು ಬಾರಿ ಹ್ಯಾಟ್ರಿಕ್ ಸಾಧನೆ ಮಾಡಿರುವ ಮಾಲಿಂಗ ಏಕದಿನ ವಿಶ್ವಕಪ್‌ನಲ್ಲಿ ಅತಿ ಹೆಚ್ಚು ವಿಕೆಟುಗಳನ್ನು ಗಳಿಸಿರುವ ಪೈಕಿ ಮೂರನೇ ಸ್ಥಾನದಲ್ಲಿದ್ದಾರೆ. ಏಕದಿನ ವಿಶ್ವಕಪ್‌ನಲ್ಲಿ 56 ವಿಕೆಟುಗಳನ್ನು ಕಬಳಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2OnJvAp
