ಮುಂಬಯಿ: ರಕ್ಷಕರೇ ಭಕ್ಷಕರ ಪರ ನಿಂತರೇ? ಇದಕ್ಕೊಂದು ನಿದರ್ಶನ ಈ ಘಟನೆ. ಅಪಹರಣ ಮತ್ತು ಹೊಡೆದಾಟ ಪ್ರಕರಣದ ಆರೋಪಿಯೊಬ್ಬನ ಜನ್ಮ ದಿನವನ್ನಾಚರಿಸುವ ಮೂಲಕ ವಾಣಿಜ್ಯ ನಗರಿಯ ಠಾಣೆಯೊಂದರ ಪೊಲೀಸರು ರೆಡ್ ಹ್ಯಾಂಡಾಗಿ ಸಿಕ್ಕಿ ಬಿದ್ದಿದ್ದಾರೆ. ಈ ವೀಡಿಯೋ ಈಗ ವೈರಲ್ ಆಗಿದೆ. 23 ಜುಲೈನಂದು ಈ ಘಟನೆ ನಡೆದಿದ್ದು, ಕೇಕ್ ಜತೆ ಠಾಣೆಗೆ ಬಂದ ಆರೋಪಿ ಅಯಾನ್ ಖಾನ್ ಪೊಲೀಸರ ಜತೆಗೆ ಕೇಕ್ ಕತ್ತರಿಸಿ ತನ್ನ ಜನ್ಮದಿನವನ್ನಾಚರಿಸಿಕೊಂಡಿದ್ದಾನೆ. ವೀಡಿಯೋದಲ್ಲಿ ಖಾನ್ ಕೇಕ್ ಕತ್ತರಿಸಿದ ಬಳಿಕ, ಪೊಲೀಸರಲ್ಲೊಬ್ಬರು ಆತನಿಗೆ ಕೇಕ್ ತಿನ್ನಿಸಿದ್ದಾರೆ. ವೀಡಿಯೋ ವೈರಲ್ ಆಗುತ್ತಿದ್ದಂತೆ ಎಚ್ಚೆತ್ತುಕೊಂಡಿರುವ ಪೊಲೀಸರು ಖಾನ್ ಮೇಲೆ ಈಗ ಆರೋಪವಿಲ್ಲ . ಆತ ನಿರಪರಾಧಿ ಎಂದು ಸಾಬೀತಾಗಿದೆ ಎಂದು ಹೇಳಿದ್ದಾರೆ. ಪ್ರಸಂಗದ ಸತ್ಯಾಸತ್ಯತೆ ಬಗ್ಗೆ ತಿಳಿದುಕೊಳ್ಳಲುಪೊಲೀಸ್ ಉಪ ಆಯುಕ್ತರು ತನಿಖೆಗೆ ಆದೇಶಿಸಿದ್ದು, ಇನ್ನು ಮೇಲೆ ಠಾಣೆಯಲ್ಲಿ ಯಾರ ಜನ್ಮದಿನವನ್ನು ಕೂಡ ಆಚರಿಸಬಾರದು ಎಂದು ಆದೇಶಿಸಿದ್ದಾರೆ. ಇದೇ ವರ್ಷ ಜೂನ್ ತಿಂಗಳಲ್ಲಿ ಉತ್ತರ ಪ್ರದೇಶದ ಕಾರಾಗೃಹವೊಂದರಲ್ಲಿ ಮದ್ಯದ ಪಾರ್ಟಿ ನಡೆಸಿದ್ದು ವೈರಲ್ ಆಗಿತ್ತು.
from India & World News in Kannada | VK Polls https://ift.tt/2SJCLeE
