ಬರೇಲಿ: ಆಕೆ ಆಸ್ಸಾಂನ ಹುಡುಗಿ. ಇನ್ನು 18ರ ಹರೆಯ. ಉತ್ತರ ಪ್ರದೇಶದ ಮುರಾಬಾದ್‌ನ ಹುಡುಗನನ್ನು ಪ್ರೀತಿಸಿದ್ದಳು. ಆತನ ಪ್ರೀತಿಯಯಲ್ಲಿ ಜಗವನ್ನೇ ಮರೆತಿದ್ದ ಆಕೆ ಒಂದು ದಿನ ಆತನಿಗಾಗಿ ಮನೆ ಬಿಟ್ಟು ಓಡಿ ಬಂದಳು. ಪಟ್ನಾದಲ್ಲಿ ಇಬ್ಬರು ಮದುವೆಯಾದರು. ಇನ್ನೇನಿದ್ದರೂ ತಾನು ಪ್ರೀತಿಸಿದವನ ಜತೆ ಬದುಕು ಎಂದುಕೊಂಡಿದ್ದ ಆಕೆಯ ಮುಂದೆ ದೊಡ್ಡ ದುರಂತ ಕಾದಿತ್ತು. ಹೊಂಗನಿಸಿನೊಂದಿಗೆ ರೈಲಿನಲ್ಲಿ ಪ್ರಯಾಣಿಸುತ್ತಿದ್ದ ಆಕೆಯನ್ನಾತ ರೈಲಿನಿಂದ ಕೆಳಕ್ಕೆ ತಳ್ಳಿದ. ಅಷ್ಟೇ ಅಲ್ಲ ತಾನು ಕೂಡ ಹಾರಿದ. ರೈಲ್ವೆ ಹಳಿಯ ಮೇಲೆ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಬಿದ್ದಿದ್ದ ದಂಪತಿಯನ್ನು ಪೊಲೀಸರು ಜಿಲ್ಲಾಸ್ಪತ್ರೆಗೆ ಕರೆತಂದರು. ಅವರನ್ನು ತುರ್ತು ನಿಗಾ ಘಟಕದಲ್ಲಿಟ್ಟು ಚಿಕಿತ್ಸೆ ನೀಡಲಾಗುತ್ತಿದೆ. ಸಂತ್ರಸ್ತೆ ಬೇಬಿ (18) ನೀಡಿರುವ ಹೇಳಿಕೆ ಪ್ರಕಾರ ಆಕೆಯ ಪತಿ ಹಿರಾ (25) ಆಕೆಯನ್ನು ಕೆಳಕ್ಕೆ ತಳ್ಳಿ, ತಾನು ಕೂಡ ಜಿಗಿದಿದ್ದಾನೆ. ಕಳೆದ ಮೂರು ತಿಂಗಳ ಹಿಂದೆ ಅಪರಿಚಿತ ಸಂಖ್ಯೆಯೊಂದರಿಂದ ನನಗೆ ಮೊಬೈಲ್ ಕರೆ ಬರುತ್ತಿತ್ತು. ನಿಧಾನಕ್ಕೆ ನಾವಿಬ್ಬರು ಹತ್ತಿರವಾಗಿ ಪ್ರೀತಿಸಲು ಆರಂಭಿಸಿದೆವು. ನಾವಿಬ್ಬರು ಮದುವೆಯಾಗಲು ನಿರ್ಧಿರಿಸಿದೆವು. ಜುಲೈ 26 ರಂದು ಆತ ನಾನಿದ್ದಲ್ಲಿಗೆ ಬಂದ. ನಾವವನ ಜತೆ ಓಡಿ ಹೋದೆ. ಮರುದಿನ ಪಟ್ನಾಕ್ಕೆ ಹೋಗಿ ಹೋಟೆಲೊಂದರಲ್ಲಿ ಉಳಿದುಕೊಂಡು ಜುಲೈ 29ರಂದು ಮದುವೆಯಾದೆವು. ಮಂಗಳವಾರ ಮೊರಾದಾಬಾದ್‌ಗೆ ಹೋಗುವ ರೈಲನ್ನು ಹತ್ತಿದ್ದೆವು. ಬರೇಲಿ ನಿಲ್ದಾಣವನ್ನು ದಾಟುತ್ತಿದ್ದಂತೆ ಆತ ನನ್ನನ್ನು ತಳ್ಳಿ , ತಾನು ಕೂಡ ಹಾರಿದ, ಎಂದಾಕೆ ಹೇಳಿದ್ದಾಳೆ. ಗಂಭೀರ ಸ್ಥಿತಿಯಲ್ಲಿರುವ ಹಿರಾ ಪೊಲೀಸ್ ವಿಚಾರಣೆಗೆ ಸಹಕಾರ ನೀಡುವ ಸ್ಥಿತಿಯಲ್ಲಿಲ್ಲ. ಬೇಬಿ ಸ್ಥಿತಿ ಕೂಡ ಗಂಭೀರವಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
from India & World News in Kannada | VK Polls https://ift.tt/313LMC7
