ಶಶಿಧರ್ ಎಸ್. ದೋಣಿಹಕ್ಲು: ಕೋವಿಡ್-19 ನಿರೋಧಕ ಲಸಿಕೆಗೆ ಬೇಡಿಕೆ ಹೆಚ್ಚುತ್ತಿದ್ದಂತೆಯೇ ಮಾರಾಟದ ದಂಧೆಯೂ ಜೋರಾಗಿದೆ..! ಕೋವಿಡ್ ವಾರಿಯರ್ಗಳ ಹೆಸರಲ್ಲಿ, ಅನುಪಯುಕ್ತ (ವೇಸ್ಟೇಜ್) ಎನ್ನುವ ನೆಪದಲ್ಲಿ ದಂಧೆ ನಡೆಯುತ್ತಿದೆ. ದುಡ್ಡು ಕೊಟ್ಟವರಿಗೆ ಲಸಿಕೆ ಸುಲಭವಾಗಿ ಸಿಗುತ್ತಿದೆ. ರಾಜ್ಯದ ನಾನಾ ಪ್ರಾಥಮಿಕ ಆರೋಗ್ಯ ಕೇಂದ್ರಗಳು, ಉಪ ಕೇಂದ್ರಗಳೂ ಸೇರಿದಂತೆ ಲಸಿಕಾ ಕೇಂದ್ರಗಳಲ್ಲಿ ಫಲಾನುಭವಿಗಳಿಂದ ಪ್ರತಿ ಡೋಸ್ಗೆ 300ರಿಂದ 500 ರೂ. ಪಡೆಯಲಾಗುತ್ತಿದೆ. ದುಡ್ಡು ಕೊಟ್ಟ ಫಲಾನುಭವಿಗಳಿಗೆ ಮೊದಲು ಲಸಿಕೆ ವಿತರಿಸಲಾಗುತ್ತಿದೆ. ಈ ಹಿಂದೆ ಸಾಕಷ್ಟು ಬಾರಿ ಲಸಿಕೆಗೆ ಕೋರಿಕೆ ಸಲ್ಲಿಸಿದ್ದವರಿಗೆ, ಈಗಾಗಲೇ ಲಸಿಕೆ ಪಡೆಯಲು ನೋಂದಣಿ ಮಾಡಿಕೊಂಡವರಿಗೆ ಲಸಿಕಾ ಕೇಂದ್ರಗಳಿಂದ ದೂರವಾಣಿ ಕರೆಗಳು ಬರುತ್ತಿವೆ. ಡೋಸ್ಗೆ 300-500 ರೂ. ನೀಡಬೇಕಾಗುತ್ತದೆ ಎಂದು ನೇರವಾಗಿ ಕೇಳುತ್ತಿದ್ದಾರೆ. ಹಣ ನೀಡಿದರೆ ತತ್ಕ್ಷಣ ಪ್ರಕ್ರಿಯೆ ಪೂರ್ಣಗೊಳಿಸಿ ಲಸಿಕೆ ನೀಡುತ್ತಾರೆ. ಇಲ್ಲದಿದ್ದರೆ ಕೊರತೆ ನೆಪ ಹೇಳಿ ಹಿಂದಕ್ಕೆ ಕಳಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ. ಲಸಿಕೆ ವಿತರಣೆಯಲ್ಲೂ ಮಧ್ಯವರ್ತಿಗಳು ಎಂಟ್ರಿ ಕೊಟ್ಟಿದ್ದಾರೆ. ಪ್ರಭಾವ, ಪರಿಚಯ, ಸಲುಗೆಗೆ ಲಸಿಕೆ ನೀಡುವುದು ಒಂದೆಡೆಯಾದರೆ, ವಸೂಲಿ ದುಡ್ಡಲ್ಲಿ ಪಾಲು ನೀಡಿ ಲಸಿಕೆ ವಿತರಿಸುವ ಕೆಲಸವೂ ಆಗುತ್ತಿದೆ. ನಕಲಿ ವಾರಿಯರ್ಸ್ಗಳ ಹಾವಳಿ: ಮುಂಚೂಣಿ ಕಾರ್ಯಕರ್ತರ ಹೆಸರಲ್ಲಿ ಅನರ್ಹರಿಗೂ ಲಸಿಕೆ ನೀಡಲಾಗುತ್ತಿದೆ. ನಕಲಿ ಶಿಫಾರಸು ಪತ್ರ, ಐಡಿ ಕಾರ್ಡ್ಗಳನ್ನು ಈ ವಂಚನೆಗೆ ಬಳಸಿಕೊಳ್ಳಲಾಗುತ್ತಿದೆ. ಅಲ್ಲದೇ, ಲಸಿಕೆ ದಂಧೆಯ ಇನ್ನೊಂದು ಮಾರ್ಗವೆಂದರೆ ನೋಂದಣಿಯಿಲ್ಲದೆ ಲಸಿಕೆ ನೀಡುವುದು. ಲಸಿಕೆ ಸಿಕ್ಕರೆ ಸಾಕು, ಲಸಿಕೆ ಪಡೆದಿರುವ ಪ್ರಮಾಣ ಪತ್ರ ಯಾಕೆ ಎಂದು ಅನೇಕರು ನೋಂದಣಿಯ ಗೋಜಿಗೆ ಹೋಗದೆ ಲಸಿಕೆ ಪಡೆಯುತ್ತಿದ್ದಾರೆ. ನೋಂದಾಯಿಸದೆ ಲಸಿಕೆ ಪಡೆದವರ ಹೆಸರಲ್ಲಿ ನೋಂದಣಿ ಮಾಡಿ, ಇನ್ನೊಬ್ಬರಿಂದ ಹಣ ಪಡೆದು ಲಸಿಕೆ ಹಾಕಲಾಗುತ್ತಿದೆ ಎನ್ನುವ ದೂರುಗಳೂ ಇವೆ. ವೇಸ್ಟೇಜ್ ಹೆಸರಲ್ಲೂ ಅಕ್ರಮ: 1 ವಾಯಲ್ನಲ್ಲಿ 10 ಮಂದಿಗೆ ಲಸಿಕೆ ನೀಡಲಾಗುತ್ತದೆ. ಇಲಾಖೆ ದಾಖಲೆಗಳಲ್ಲೂ ಇದನ್ನೇ ತೋರಿಸಲಾಗುತ್ತದೆ. ಆದರೆ, 11 ಮಂದಿಗೆ ಲಸಿಕೆ ನೀಡಬಹುದಾಗಿದೆ. ಕೆಲವರು ನಿಯಮದಂತೆ ಎಷ್ಟು ಡೋಸ್ ನೀಡಿದ್ದಾರೋ ಅಷ್ಟನ್ನೇ ದಾಖಲು ಮಾಡುತ್ತಾರೆ. ಆದರೆ, ಲಸಿಕೆ ಮಾರಾಟದಲ್ಲಿ ತೊಡಗಿರುವವರು ಆ ಲೆಕ್ಕ ತೋರಿಸುವುದಿಲ್ಲ. ಹೆಚ್ಚುವರಿ 1 ಡೋಸ್ ಅನ್ನು ನೋಂದಣಿಯಿಲ್ಲದೆ ನೀಡುತ್ತಾರೆ. ಅಲ್ಲದೆ ವೇಸ್ಟೇಜ್ ಲೆಕ್ಕ ತೋರಿಸಿ ಮಾಡುತ್ತಾರೆ. 'ಲಸಿಕೆ ದುರ್ಬಳಕೆ ಆರೋಪಗಳು ಕೇಳಿಬಂದಿವೆ. ಆದರೆ, ಅಧಿಕೃತ ದಾಖಲೆಗಳಿಲ್ಲ. ಚಿಕ್ಕನಾಯಕನ ಹಳ್ಳಿಯಲ್ಲಿ ನೋಂದಣಿ ಮಾಡಿ, ತಿಪಟೂರಲ್ಲಿ ಲಸಿಕೆ ನೀಡಿದ ದೂರು ಬಂದಿದ್ದು, ನೋಟಿಸ್ ನೀಡಲಾಗಿದೆ' ಎಂದು ತುಮಕೂರಿನ ಆರ್ಸಿಎಚ್ ಅಧಿಕಾರಿ ಡಾ.ಕೇಶವ್ ರಾಜ್ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/3fV1cDf
