ಭಾರತದಲ್ಲಿ ಮಾರಕ ಎರಡನೆಯ ಅಲೆ ಸೋಂಕಿಗೆ ಡೆಲ್ಟಾ ರೂಪಾಂತರವೇ ಕಾರಣ: ಸರ್ಕಾರಿ ಅಧ್ಯಯನ ವರದಿ

ಹೊಸದಿಲ್ಲಿ: ಭಾರತದಲ್ಲಿ ಮೊದಲ ಬಾರಿಗೆ ಕಾಣಿಸಿಕೊಂಡ ರೂಪಾಂತರಿ ಅಥವಾ ಡೆಲ್ಟಾ ರೂಪಾಂತರವು ದೇಶದಲ್ಲಿ ಕೋವಿಡ್ ಎರಡನೆಯ ಅಲೆಯ ಭೀಕರತೆಗೆ ಕಾರಣ ಎಂದು ಸರ್ಕಾರಿ ಅಧ್ಯಯನವೊಂದು ತಿಳಿಸಿದೆ. ಇತ್ತೀಚೆಗಷ್ಟೇ ಡಬ್ಲ್ಯೂಎಚ್‌ಒದಿಂದ '' ಎಂಬ ಹೆಸರು ಪಡೆದಿರುವ B.1.617.2 ತಳಿಯು ಬ್ರಿಟನ್‌ನ ಕೆಂಟ್‌ನಲ್ಲಿ ಪತ್ತೆಯಾದ ಆಲ್ಫಾ ರೂಪಾಂತರಕ್ಕಿಂತಲೂ ಅತ್ಯಂತ ಹೆಚ್ಚು ಸಾಂಕ್ರಾಮಿಕ ಎಂದು ಇಂಡಿಯನ್ ಸಾರ್ಸ್ ಕೋವ್ 2 ಜೆನೋಮಿಕ್ ಕನ್ಸೋರ್ಟಿಯಾ ಮತ್ತು ರಾಷ್ಟ್ರೀಯ ರೋಗ ನಿಯಂತ್ರಣ ಕೇಂದ್ರದ ವರದಿ ತಿಳಿಸಿದೆ. ಆಲ್ಫಾ ತಳಿಗಿಂತಲೂ ಡೆಲ್ಟಾ ರೂಪಾಂತರವು ಶೇ 50ರಷ್ಟು ಹೆಚ್ಚು ಸಾಂಕ್ರಾಮಿಕವಾಗಿದೆ ಎಂದು ಅದು ಹೇಳಿದೆ. ಅಷ್ಟೇ ಅಲ್ಲ, ದೇಶದಲ್ಲಿ 12,200ಕ್ಕೂ ಅಧಿಕ ರೂಪಾಂತರಗಳು ಇವೆ ಎಂಬುದನ್ನು ವಂಶವಾಹಿ ಪತ್ತೆಯ ಅಧ್ಯಯನಗಳಿಂದ ಗೊತ್ತಾಗಿದೆ. ಈ ಅಧ್ಯಯನ ಇನ್ನೂ ಮುಂದುವರಿದಿದೆ. ಆದರೆ ಡೆಲ್ಟಾ ರೂಪಾಂತರಗಳಿಗೆ ಹೋಲಿಸಿದರೆ ಇವುಗಳ ಅಸ್ತಿತ್ವದ ಅಷ್ಟೇನೂ ಅಪಾಯಕಾರಿಯಾಗಿಲ್ಲ ಎಂದು ವರದಿ ಹೇಳಿದೆ. ಡೆಲ್ಟಾ ರೂಪಾಂತರವು ದೇಶದ ಪ್ರತಿ ರಾಜ್ಯದಲ್ಲಿಯೂ ಹರಡಿದೆ. ಆದರೆ ದೆಹಲಿ, ಆಂಧ್ರಪ್ರದೇಶ, ಗುಜರಾತ್, ಮಹಾರಾಷ್ಟ್ರ, ಒಡಿಶಾ ಮತ್ತು ತೆಲಂಗಾಣಗಳಿಗೆ ಹೆಚ್ಚು ಅಪಾಯಕಾರಿಯಾಗಿದೆ. ಲಸಿಕೆ ಪಡೆದ ಬಳಿಕವೂ ದೊಡ್ಡ ಮಟ್ಟದಲ್ಲಿ ಸೋಂಕು ಹರಡಲು ಡೆಲ್ಟಾ ಪ್ರಮುಖ ಪಾತ್ರ ವಹಿಸಿದೆ. ಆದರೆ ಲಸಿಕೆ ಪಡೆದ ಬಳಿಕ ಸೋಂಕು ಹರಡಿದ ಪ್ರಕರಣವು ಆಲ್ಫಾ ರೂಪಾಂತರಿಯಲ್ಲಿ ಕಂಡುಬಂದಿಲ್ಲ. ಆದರೆ ಹೆಚ್ಚಿನ ಸಾವುಗಳಾಗಲು ಹಾಗೂ ಪ್ರಕರಣಗಳು ಹೆಚ್ಚು ಗಂಭೀರವಾಗಲು ಡೆಲ್ಟಾ ರೂಪಾಂತರ ಕಾರಣವೇ ಎಂಬುದು ದೃಢಪಟ್ಟಿಲ್ಲ ಎಂದು ವರದಿ ತಿಳಿಸಿದೆ.

from India & World News in Kannada | VK Polls https://ift.tt/2T0twe0