ಹೊಸದಿಲ್ಲಿ: ಮನೆ ಖರೀದಿಗಾಗಿ ತೆಗೆದುಕೊಂಡ ಸಾಲದ ಬಡ್ಡಿಗೆ ಆದಾಯ ತೆರಿಗೆ ವಿನಾಯಿತಿ ಕ್ಲೇಮ್ ಮಾಡಬಹುದಾದ ಮೊಬಲಗನ್ನು ಹೆಚ್ಚಿಸುವ ಬಗ್ಗೆ 2019-20 ಸಾಲಿನ ಮುಂಗಡ ಪತ್ರದಲ್ಲಿ ಹಣಕಾಸು ಸಚಿವೆ ಅವರು ಪ್ರಸ್ತಾಪಿಸಿರುವುದು ಹೊಂದಿರುವವರಿಗೆ ಶುಭ ಸುದ್ದಿಯಾಗಿದೆ. 45 ಲಕ್ಷ ರೂ. ಒಳಗಿನ ಮನೆಯ ಸಾಲಕ್ಕೆ ವರ್ಷಕ್ಕೆ 2 ಲಕ್ಷ ರೂ. ವರೆಗಿರುವ ಬಡ್ಡಿ ವಿನಾಯಿತಿಯ ಕಡಿತದ ಮಿತಿಯನ್ನು ಇನ್ನು 3.5 ಲಕ್ಷ ರೂ.ಗೆ ಏರಿಸಲಾಗುತ್ತದೆ. ಇದು 2020 ಮಾರ್ಚ್ 31ರವರೆಗೆ ತೆಗೆದುಕೊಳ್ಳುವ ಗೃಹ ಸಾಲಗಳಿಗೆ ಅನ್ವಯ. ಈ ಮೂಲಕ, 15 ವರ್ಷಗಳ ಸಾಲದ ಅವಧಿಯಲ್ಲಿ ಬಳಕೆದಾರರಿಗೆ 7 ಲಕ್ಷ ರೂ. ಲಾಭವಾಗಲಿದೆ. ನರೇಂದ್ರ ಮೋದಿ ಸರಕಾರದ 2ನೇ ಅವಧಿಯ ಚೊಚ್ಚಲ ಬಜೆಟ್ ಮಂಡಿಸಿದ ನಿರ್ಮಲಾ ಸೀತಾರಾಮನ್, ಇದರ ಜತೆಗೆ, ವಿದ್ಯುಚ್ಚಾಲಿತ ವಾಹನ ಖರೀದಿಗೆ ತೆಗೆದುಕೊಂಡ ಸಾಲಕ್ಕೆ ಪಾವತಿಸಿದ ಬಡ್ಡಿಗೂ 1.5 ಲಕ್ಷ ರೂ. ವರೆಗೆ ತೆರಿಗೆ ವಿನಾಯಿತಿ ನೀಡಲಾಗುತ್ತದೆ ಎಂದು ಹೇಳಿದರು. ಸರ್ವರಿಗೂ ಕೈಗೆಟಕುವ ದರದಲ್ಲಿ ಮನೆ ಎಂಬ ಕನಸನ್ನು ಸಾಕಾರಗೊಳಿಸುವ ನಿಟ್ಟಿನಲ್ಲಿ, ಅಗ್ಗದ ವಸತಿ ಅಭಿವೃದ್ಧಿಪಡಿಸಲಿರುವ ಡೆವಲಪರ್ಗಳ ಲಾಭಾಂಶಕ್ಕೆ ಈಗಾಗಲೇ ತೆರಿಗೆ ವಿನಾಯಿತಿ ನೀಡಲಾಗಿದೆ. ಇದಲ್ಲದೆ, ತಾವೇ ವಾಸವಿರುವ ಮನೆಗಳ ಗೃಹ ಸಾಲಕ್ಕೆ ಪಾವತಿಸಿದ ಬಡ್ಡಿಗೂ 2 ಲಕ್ಷದವರೆಗೆ ಆದಾಯ ತೆರಿಗೆ ವಿನಾಯಿತಿ ಇದೆ. ಮತ್ತಷ್ಟು ಪ್ರಯೋಜನ ನೀಡುವುದಕ್ಕಾಗಿ, 2020ರ ಮಾರ್ಚ್ 31ರವರೆಗೆ ತೆಗೆದುಕೊಳ್ಳುವ, 45 ಲಕ್ಷ ರೂ.ವರೆಗಿನ ಗೃಹ ಸಾಲಕ್ಕೆ ಹೆಚ್ಚುವರಿಯಾಗಿ 1.5 ಲಕ್ಷ ರೂ. ಬಡ್ಡಿ ಮೊತ್ತಕ್ಕೆ ತೆರಿಗೆ ವಿನಾಯಿತಿ ನೀಡಲಾಗುತ್ತದೆ. ಇದರೊಂದಿಗೆ 45 ಲಕ್ಷ ರೂ. ಒಳಗಿನ ಮೌಲ್ಯದ ಮನೆ ಖರೀದಿಸುವ ವ್ಯಕ್ತಿಗೆ ವಾರ್ಷಿಕ 3.5 ಲಕ್ಷ ರೂ.ವರೆಗಿನ ಬಡ್ಡಿಯಲ್ಲಿ ತೆರಿಗೆ ವಿನಾಯಿತಿ ಲಭ್ಯವಾಗಲಿದೆ. ಮಧ್ಯಮವರ್ಗದ ಮಂದಿ 15 ವರ್ಷಗಳ ಅವಧಿಗೆ ತೆಗೆದುಕೊಳ್ಳುವ ಗೃಹ ಸಾಲದಲ್ಲಿಇದು 7 ಲಕ್ಷ ರೂ.ವರೆಗಿನ ಉಳಿತಾಯಕ್ಕೆ ಕಾರಣವಾಗಲಿದೆ ಎಂದು ಸಚಿವರು ವಿವರಿಸಿದರು. ಈ ಪ್ರಸ್ತಾವನೆಯು ಮಧ್ಯಮ ವರ್ಗದ ಹಾಗೂ ಮೊದಲ ಮನೆ ಖರೀದಿಸುವ ಮಂದಿಗೆ 1.5 ಲಕ್ಷ ರೂ. ಹೆಚ್ಚುವರಿ ಲಾಭ ತರಲಿದೆ. (ಪ್ರಸ್ತುತ ತೆರಿಗೆ ವಿನಾಯಿತಿ ಮಿತಿ 2 ಲಕ್ಷ ರೂ. ಇದೆ.) ಮತ್ತು ಇದು ಗೃಹ ವಲಯಕ್ಕೂ ಉತ್ತೇಜನ ನೀಡಿದಂತಾಗುತ್ತದೆ. ಒಟ್ಟಾರೆಯಾಗಿ, ಖರೀದಿಸಿದ ಮನೆಯಲ್ಲೇ ವಾಸಿಸುವ ವ್ಯಕ್ತಿಯು, ಗೃಹ ಸಾಲಕ್ಕೆ ಪಾವತಿಸಿದ ಅಸಲು ಹಾಗೂ ಬಡ್ಡಿ ಹಣಕ್ಕೆ ತೆರಿಗೆ ವಿನಾಯಿತಿ ಪಡೆಯಬಹುದು. ಆದಾಯ ತೆರಿಗೆ ಕಾಯಿದೆಯ ಸೆಕ್ಷನ್ 80ಸಿ ಅನುಸಾರ, ವಾರ್ಷಿಕ 1.5 ಲಕ್ಷ ರೂ.ವರೆಗಿನ ಅಸಲು ಮೊತ್ತ ಹಾಗೂ ಸೆಕ್ಷನ್ 24 ಅನುಸಾರ 2 ಲಕ್ಷ ರೂ.ವರೆಗಿನ ಬಡ್ಡಿಯನ್ನು ತೆರಿಗೆ ಆದಾಯದಿಂದ ಕಡಿತ ಮಾಡಬಹುದಾಗಿದೆ. ಅಂದರೆ ತೆರಿಗೆ ಲೆಕ್ಕಾಚಾರ ಹಾಕುವ ಒಟ್ಟು ಆದಾಯದಿಂದ ಈ ಮೊತ್ತಗಳನ್ನು ಕಡಿತ ಮಾಡಿದ ಬಳಿಕವಷ್ಟೇ ಆದಾಯ ತೆರಿಗೆ ಲೆಕ್ಕ ಹಾಕಬಹುದಾಗಿದೆ. ಇದು ಪಾವತಿಸಬೇಕಾದ ತೆರಿಗೆ ಪ್ರಮಾಣವನ್ನು ತಗ್ಗಿಸುತ್ತದೆ.
from India & World News in Kannada | VK Polls https://ift.tt/2FTtUSv
