ಹೊಸದಿಲ್ಲಿ: ನೀವು ಹೇಗಿರಬೇಕೆಂದು ಲೋಕ ಜನಶಕ್ತಿ ಪಕ್ಷದ ಚಿರಾಗ್ ಪಾಸ್ವಾನ್ ಅವರನ್ನು ನೋಡಿ ಕಲಿತುಕೊಳ್ಳಿ ಎಂದು ಪ್ರಧಾನಿ ತಮ್ಮ ಪಕ್ಷದ ಸಂಸದರಿಗೆ ಸಲಹೆ ನೀಡಿದ್ದಾರೆ. ಮಂಗಳವಾರ ನಡೆದ ಸಂಸದೀಯ ಸಭೆಯಲ್ಲಿ ತಮ್ಮ ಪಕ್ಷದ ಸಂಸದರಿಗೆ ಖಡಕ್ ಪಾಠ ಬೋಧಿಸಿದ ಪ್ರಧಾನಿ ಸಂಸದರು ವಿಶ್ವವಿದ್ಯಾಲಯದ ತರಹ. ಇಲ್ಲಿ ನೀವು ಬಹಳಷ್ಟನ್ನು ಕಲಿಯಬೇಕಾಗುತ್ತದೆ. ಹೊಸ ಸಂಸದರು ಹೇಗಿರಬೇಕೆಂದು ಅವರನ್ನು ನೋಡಿ ಕಲಿಯಿರಿ. ಸಂಸತ್ ಅಧಿವೇಶನಗಳಲ್ಲಿ ಸಕ್ರಿಯರಾಗಿರುವ ಅವರು ಪೂರ್ವ ತಯಾರಿಯೊಂದಿಗೆ ಬಂದಿರುತ್ತಾರೆ. ಪ್ರತಿದಿನ ಹಾಜರಿರುತ್ತಾರೆ. ಎಂದರು. ಉದ್ಧಟತನಕ್ಕೆ ತಕ್ಕ ಶಾಸ್ತಿ ಉದ್ಧಟತನ, ದುರಹಂಕಾರ, ದುವರ್ತನೆಯನ್ನು ಯಾವ ಕಾರಣಕ್ಕೂ ಬಿಜೆಪಿ ಸಹಿಸುವುದಿಲ್ಲ. ಅಂತಹ ನಡೆ ತೋರುವ ನಾಯಕರನ್ನು ಮುಲಾಜಿಲ್ಲದೆ ಪಕ್ಷದಿಂದ ಹೊರಹಾಕಲಾಗುವು ದು ಎಂದು ಪ್ರಧಾನಿ ಮೋದಿ ಅವರು ಖಡಕ್ ಸಂದೇಶ ರವಾನಿಸಿದ್ದಾರೆ. ಮಧ್ಯಪ್ರದೇಶದ ಬಿಜೆಪಿ ಮುಖಂಡ ಕೈಲಾಶ್ ವಿಜಯವರ್ಗೀಯ ಅವರ ಪುತ್ರ, ಬಿಜೆಪಿ ಶಾಸಕ ಆಕಾಶ್ ವಿಜಯವರ್ಗೀಯ ಒತ್ತುವರಿ ತೆರವು ವೇಳೆ ಸರಕಾರಿ ಅಧಿಕಾರಿಗೆ ಕ್ರಿಕೆಟ್ ಬ್ಯಾಟ್ನಿಂದ ಥಳಿಸಿದ ಪ್ರಕರಣಕ್ಕೆ ಖಾರವಾಗಿ ಪ್ರತಿಕ್ರಿಯಿಸಿರುವ ಅವರು ‘‘ಇಂತಹ ಗೂಂಡಾಗಿರಿಗೆ ಪಕ್ಷದಲ್ಲಿ ಅವಕಾಶಧಿವಿಲ್ಲ. ತಪ್ಪು ಮಾಡಿದವರು ಯಾರೇ ಆಗಿದ್ದರೂ, ಅವರು ಯಾರ ಮಗನೇ ಆಗಿದ್ದರೂ ಕಠಿಣ ಕ್ರಮ ತಪ್ಪದು. ಈ ನಿಯಮ ಎಲ್ಲರಿಗೂ ಅನ್ವಯಿಸುತ್ತದೆ,’’ ಎಂದು ಹೇಳಿದ್ದಾರೆ. ಮಂಗಳವಾರ ನಡೆದ ಬಿಜೆಪಿ ಸಂಸದೀಯ ಪಕ್ಷದ ಸಭೆಯಲ್ಲಿ ಮೋದಿ ಈ ಎಚ್ಚರಿಕೆ ರವಾನಿಸಿದ್ದಾರೆ. ತಮ್ಮ ರಾಜಕೀಯ ಜೀವನದಲ್ಲಿ ಔನತ್ಯಕ್ಕೇರಲು ಬಯಸುವ ಸಂಸದರು ಮೊದಲು ಸೇವಾ ತತ್ಪರರಾಗಿರಬೇಕು ಎಂದವರು ಹೇಳಿದ್ದಾರೆ. ಗೈರಾಗುವ ಸಂಸದರಿಗೆ ಎಚ್ಚರಿಕೆ ಸಂಸತ್ ಅಧಿವೇಶನಕ್ಕೆ ಗೈರುಹಾಜರಾಗುವ ಬಿಜೆಪಿ ಸಂಸದರನ್ನು ಮೋದಿ ತರಾಟೆಗೆ ತೆಗೆದುಕೊಂಡಿದ್ದಾರೆ. ಸಂಸದೀಯ ಪಕ್ಷದ ಸಭೆಯಲ್ಲಿ ಈ ವಿಷಯ ಪ್ರಸ್ತಾಪಿಸಿರುವ ಮೋದಿ ‘‘ಅಮಿತ್ ಶಾ ನಿಮ್ಮ ಕಾರ್ಯಕ್ರಮಕ್ಕೆ ಬರುವನೆಂದು ಹೇಳಿ ಕೊನೆಯ ಕ್ಷಣದಲ್ಲಿ ಕೈಕೊಟ್ಟರೆ ಹೇಗಿರುತ್ತದೆ?’’ಎಂದು ಪ್ರಶ್ನಿಸಿದರು. ಚಕ್ಕರ್ ಹಾಕಿದ ಕೆಲವು ನಾಯಕರನ್ನು ದಿಟ್ಟಿಸಿ ನೋಡುತ್ತಾ, ಇದೇ ಪ್ರಶ್ನೆಯನ್ನು ಪದೇಪದೆ ಕೇಳಿದರು. ‘‘ನೀವು 2 ಲಕ್ಷ ಮತಗಳ ಅಂತರದಿಂದ ಗೆದ್ದಿದ್ದೀರಿ, ಆದರೆ ನಿಮ್ಮ ಆಪ್ತ ಸ್ನೇಹಿತನೇ ನಿಮಗೆ ಮತ ನೀಡಿಲ್ಲ ಎಂದು ತಿಳಿದರೆ ನಿಮಗೆ ಹೇಗೆನಿಸುತ್ತದೆಯೋ ನೀವು ಸದನಕ್ಕೆ ಬರದಿದ್ದರೆ ನನಗೆ ಅಂಥದ್ದೇ ಭಾವನೆ ಉಂಟಾಗುತ್ತದೆ,’’ ಎಂದರು.
from India & World News in Kannada | VK Polls https://ift.tt/2FN28H4
