ಹೈದರಾಬಾದ್: ಪ್ರೇಮಿಗೆ ಕಾರ್ ಕೊಂಡುಕೊಳ್ಳಲು ಸಹಾಯ ಮಾಡುವುದಕ್ಕಾಗಿ ಯುವತಿಯೊಬ್ಬಳು ಮನೆಯಿಂದ ಬಂಗಾರದ ಆಭರಣಗಳನ್ನು ದರೋಡೆಗೈದ ಪ್ರಸಂಗ ಗೋದಾವರಿ ಜಿಲ್ಲೆಯ ಸೂರ್ಯಪೇಟದಲ್ಲಿ ನಡೆದಿದೆ. ಪುದುಚೇರಿಯ ಯನಂ ಜಿಲ್ಲೆಯ ನಿವಾಸಿ ಕೆರ್ರಿ ಸತೀಶ್ ಎಂಬಾತ ಫಾರ್ಮಸಿ ಓದುತ್ತಿದ್ದ ಯುವತಿಗೆ ಇನ್ಸ್ಟಾಗ್ರಾಮ್ ಮೂಲಕ ಪರಿಚಯವಾಗಿದ್ದ. ಆಕೆ ತನ್ನ ಅಜ್ಜ ಅಜ್ಜಿ ಜತೆ ವಾಸಿಸುತ್ತಿದ್ದಳು. ಅವರ ಸ್ನೇಹ ಪ್ರೇಮಕ್ಕೆ ತಿರುಗಿದಾಗ ಕಾರು ಕೊಳ್ಳಲು ಹಣ ಹೊಂದಿಸಿಕೊಡುವಂತೆ ಸತೀಶ್ ಆಕೆಯಲ್ಲಿ ಕೇಳಿದ. ಒಪ್ಪಿಕೊಂಡ ಆಕೆ ತನ್ನ ಅಜ್ಜಿಮನೆಯಲ್ಲಿ ಬಂಗಾರ ಕದ್ದು ಅದನ್ನು ಆತನಿಗೆ ಕೊಟ್ಟಳು. ಆ ಹಣದಿಂದ ಆತ ಕಾರನ್ನು ಖರೀದಿಸಿದ್ದ. ಮನೆಯಲ್ಲಿ ದರೋಡೆಯಾಗಿದೆ ಎಂದು ಯುವತಿಯ ಅಜ್ಜಿ ಸೂರ್ಯಪೇಟ ಪೊಲೀಸ್ ಠಾಣೆಯಲ್ಲಿ ಏಪ್ರಿಲ್ 14ರಂದು ದೂರು ದಾಖಲಿಸಿದ್ದಳು. ತಮ್ಮ ಮನೆಗೆ ಹೊಂದಿಕೊಂಡ ಇನ್ನೊಂದು ಮನೆಯಲ್ಲಿ ವಾಸಿಸುತ್ತಿದ್ದ ಮಹಿಳೆಯ ಮೇಲವರು ಸಂದೇಹ ವ್ಯಕ್ತಪಡಿಸಿದ್ದರು. ಆದರೆ ಆಕೆಯ ವಿರುದ್ಧ ಯಾವ ಸಾಕ್ಷ್ಯಗಳು ಸಿಗಲಿಲ್ಲ. ಹೀಗಾಗಿ ಪೊಲೀಸರು ಮನೆಯ ಎಲ್ಲ ಸದಸ್ಯರ ಫೋನ್ ಕರೆ ವಿವರಗಳನ್ನು ಸಂಗ್ರಹಿಸಿದರು. ಆಗ ಯುವತಿ ಸತೀಶ್ ಜೊತೆ ಸದಾ ಫೋನ್ ಕಾಲಿನಲ್ಲಿರುವುದು ಪತ್ತೆಯಾಯ್ತು. ಅವರಿಬ್ಬರನ್ನು ವಿಚಾರಣೆಗೊಳಪಡಿಸಿದಾಗ ಸತ್ಯ ಬಯಲಾಗಿದೆ. ಇನ್‌ಸ್ಟಾಗ್ರಾಮ್‌ನಲ್ಲಿ ಪರಿಚಯವಾದ ವ್ಯಕ್ತಿಗಾಗಿ ಮೊಮ್ಮಗಳು 200 ಗ್ರಾಂ ಕದ್ದಿದ್ದಕ್ಕೆ ಅಜ್ಜ ಅಜ್ಜಿ ಅಷ್ಟೇ ಅಲ್ಲ ಪೊಲೀಸರು ಶಾಕ್‌ಗೊಳಗಾಗಿದ್ದಾರೆ.
from India & World News in Kannada | VK Polls https://ift.tt/2J31tn8
