ಹೈದರಾಬಾದ್: ಇಲ್ಲಿ ಸಾಗುತ್ತಿರುವ ಪ್ರೊ ಕಬಡ್ಡಿ ಲೀಗ್ (ಪಿಕೆಎಲ್) ಏಳನೇ ಆವೃತ್ತಿಯ ಮೊದಲ ಚರಣದ ಪಂದ್ಯಾವಳಿಯಲ್ಲಿ ಡೆಬ್ಯು ಆಟಗಾರ ಸೂರಜ್ ದೇಸಾಯ್ (18 ಅಂಕ) ಅದ್ಭುತ ಹೋರಾಟದ ಹೊರತಾಗಿಯೂ ವಿರುದ್ಧ ತೆಲುಗು ಟೈಟಾನ್ಸ್ ಒಂದು ಅಂಕದ ಅಂತರದ ವಿರೋಚಿತ ಸೋಲಿಗೆ ಶರಣಾಗಿದೆ. ಇದರೊಂದಿಗೆ 2019ನೇ ಸಾಲಿನಲ್ಲಿ ಹ್ಯಾಟ್ರಿಕ್ ಸೋಲಿನ ಮುಖಭಂಗಕ್ಕೊಳಗಾಗಿದೆ. ಅತ್ತ ದಬಾಂಗ್ ಡೆಲ್ಲಿ ಗೆಲುವಿನೊಂದಿಗೆ ಶುಭಾರಂಭ ಮಾಡಿಕೊಂಡಿದ್ದು, 34-33ರ ಅಂತರದಲ್ಲಿ ಪಂದ್ಯ ವಶಪಡಿಸಿಕೊಂಡಿದೆ. ಬೆಂಗಾಲ್ ವಾರಿಯರ್ಸ್ ಹಾಗೂ ಯುಪಿ ಯೋಧಾ ವಿರುದ್ಧ ನಡೆದ ಮೊದಲ ಪಂದ್ಯಕ್ಕೂ ವಿಭಿನ್ನವಾಗಿ ಪ್ರತಿಯೊಂದು ಕ್ಷಣವೂ ನೋಡುಗರನ್ನು ರೋಮಾಂಚನವನ್ನುಂಟು ಮಾಡಿದ ಪಂದ್ಯದಲ್ಲಿ ಡೆಲ್ಲಿ ಕೂದಲೆಳೆಯ ಅಂತರದಲ್ಲಿ ಗೆಲುವಿನ ನಗೆ ಬೀರಿದೆ. ಜಿದ್ದಾಜಿದ್ದಿನಿಂದ ಸಾಗಿದ ಪಂದ್ಯದ ಮೊದಲಾರ್ಧದಲ್ಲಿ ಡೆಲ್ಲಿ 12-13ರ ಅಂತರದ ಮುನ್ನಡೆಯನ್ನು ಕಾಯ್ದುಕೊಂಡಿತು. ದ್ವಿತಿಯಾರ್ಧದಲ್ಲೂ ನೆಕ್ ಟು ನೆಕ್ ಫೈಟ್ ಮುಂದುವರಿಯಿತು. ತಮ್ಮ ಚೊಚ್ಚಲ ಪಿಕೆಎಲ್ ಪಂದ್ಯದಲ್ಲೇ ದಾಖಲೆಯನ್ನು ಬರೆದಿರುವ ಸೂರಜ್ ದೇಸಾಯ್ ಒಟ್ಟು 18 ಅಂಕಗಳನ್ನು ಕಲೆ ಹಾಕಿದರು. ಈ ಮೂಲಕ ಪಿಕೆಎಲ್ ಡೆಬ್ಯು ಪಂದ್ಯದಲ್ಲೇ ಅತಿ ಹೆಚ್ಚು ಅಂಕಗಳನ್ನು ಕಲೆ ಹಾಕಿದ ದಾಖಲೆಗೆ ಪಾತ್ರವಾದರು. ಈ ಮೂಲಕ ತಮ್ಮ ಸಹೋದರ ಸಿದ್ಧಾರ್ಥ್ ದೇಸಾಯ್ ಅವರ ದಾಖಲೆಯನ್ನು (ಡೆಬ್ಯು ಪಿಕೆಎಲ್ ಪಂದ್ಯದಲ್ಲಿ 15 ಅಂಕ) ಮುರಿದರು. ಇನ್ನೊಂದೆಡೆ ದಬಾಂಗ್ ಪರ 14 ಅಂಕಗಳನ್ನು ಕಲೆ ಹಾಕಿದ ನವೀನ್ ಕುಮಾರ್ ಗೆಲುವಿನ ರೂವಾರಿ ಎನಿಸಿಕೊಂಡರು. ಈ ಪಂದ್ಯವು ಅಕ್ಷರಶ: ಸೂರಜ್ ಹಾಗೂ ನವೀನ್ ನಡುವಣ ಪೈಪೋಟಿಗೆ ವೇದಿಕೆಯೊದಗಿಸಿತ್ತು. ಆದರೆ ಕೊನೆಗೂ ಚಂದ್ರನ್ ರಂಜಿತ್ (6 ಅಂಕ) ಹಾಗೂ ಜೋಗಿಂದರ್ ನರ್ವಾರ್ (4 ಅಂಕ) ಬೆಂಬಲದೊಂದಿಗೆ ಡೆಲ್ಲಿ ಗೆಲುವಿನ ನಗೆ ಬೀರುವಲ್ಲಿ ಯಶಸ್ವಿಯಾಯಿತು. ತೆಲುಗು ಪರ ಸೂರಜ್ ಹೊರತಾಗಿಯೂ ಸಿದ್ದಾರ್ಥ್ ದೇಸಾಯ್ ಎಂಟು ಹಾಗೂ ವಿಶಾಲ್ ಭಾರಧ್ವಾಜ್ ನಾಲ್ಕು ಅಂಕಗಳನ್ನು ಕಲೆ ಹಾಕಿದರು. ಆದರೂ ತಂಡವನ್ನು ಸೋಲಿನ ಸರಪಣಿಯಿಂದ ಪಾರು ಮಾಡುವಲ್ಲಿ ಯಶಸ್ವಿಯಾಗಲಿಲ್ಲ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2JWC2mk
