ಲಂಡನ್: ಟೀಂ ಇಂಡಿಯಾದ ಆಲ್‌ರೌಂಡರ್‌ ವಿಜಯ್‌ ಶಂಕರ್‌ ಗಾಯದ ಸಮಸ್ಯೆಯಿಂದಾಗಿ ವಿಶ್ವಕಪ್‌ ತಂಡದಿಂದ ಹೊರಬಿದ್ದಿದ್ದು, ಕರ್ನಾಟಕದ ಮಯಾಂಕ್‌ ಅಗರ್ವಾಲ್‌ 15ರ ಬಳಗಕ್ಕೆ ಸೇರ್ಪಡೆಯಾಗಿದ್ದಾರೆ. ಇಲ್ಲಿಯ ತನಕ ಭಾರತ ತಂಡದ ಪರ ಎರಡು ಟೆಸ್ಟ್‌ಗಳನ್ನು ಆಡಿರುವ ಮಯಾಂಕ್‌ ಅಗರ್ವಾಲ್‌, 65.00 ಸರಾಸರಿಯಲ್ಲಿ 195 ರನ್‌ ಪೇರಿಸಿದ್ದಾರೆ. ಗರಿಷ್ಠ 77 ರನ್‌. 75 ಲಿಸ್ಟ್‌ 'ಎ' ಪಂದ್ಯಗಳಲ್ಲಿ ಪಾಲ್ಗೊಂಡಿದ್ದು, 48.71ರ ಸರಾಸರಿಯಲ್ಲಿ 3605 ರನ್‌ ಪೇರಿಸಿದ್ದಾರೆ. ಗರಿಷ್ಠ 176 ರನ್‌ ಗಳಿಸಿದ್ದಾರೆ. ಇತ್ತೀಚೆಗೆ ಇಂಗ್ಲೆಂಡ್‌ನಲ್ಲಿ ನಡೆದ ಭಾರತ ಎ, ವೆಸ್ಟ್‌ ಇಂಡೀಸ್‌ ಎ ಮತ್ತು ಇಂಗ್ಲೆಂಡ್‌ ಲಯನ್ಸ್‌ ತಂಡಗಳನ್ನೊಳಗೊಂಡ ತ್ರಿಕೋನ ಸರಣಿಯಲ್ಲಿ ಮಯಾಂಕ್‌ ಅಗರ್ವಾಲ್‌ ಆಡಿದ್ದರು. ರಾಹುಲ್‌ ದ್ರಾವಿಡ್‌ ತರಬೇತಿಯಲ್ಲಿ ಪಳಗಿದ್ದ ಭಾರತ ಎ ತಂಡ ಆ ಸರಣಿಯಲ್ಲಿ ಗೆದ್ದಿತ್ತು. ಪೃಥ್ವಿ ಶಾ ಮತ್ತು ಮಯಾಂಕ್‌ ಅಗರ್ವಾಲ್‌ ಆ ಸರಣಿಯಲ್ಲಿ ಬ್ಯಾಟಿಂಗ್‌ನಲ್ಲಿ ಮಿಂಚಿದ್ದರು. ಅಂದಿನ ಆ ಸಾಧನೆ ಇಂದು ಮಯಾಂಕ್‌ ಅಗರ್ವಾಲ್‌ ಆಯ್ಕೆಯಲ್ಲಿ ಪ್ರಮುಖ ಪಾತ್ರ ವಹಿಸಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2KPcuKH
