ಬೆಂಗಳೂರು: ಕ್ಯಾಮರಾ ಬಾಡಿಗೆ ಪಡೆಯುವ ಗ್ರಾಹಕರ ಸೋಗಿನಲ್ಲಿ ಕ್ಯಾಮೆರಾ ಪಡೆದು ಪರಾರಿಯಾಗಿದ್ದವನನ್ನು ಚಂದ್ರಾ ಲೇಔಟ್‌ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಮಾಲೂರಿನಲ್ಲಿ ನೆಲೆಸಿದ್ದ ಪುರುಷೋತ್ತಮ್‌ (26) ಬಂಧಿತ ಆರೋಪಿಯಾಗಿದ್ದು, ಈತ ನೀಡಿದ ಮಾಹಿತಿ ಮೇರೆಗೆ ಸುಮಾರು 3.65 ಲಕ್ಷ ರೂ. ಮೌಲ್ಯದ ಐದು ಕ್ಯಾಮೆರಾ ಹಾಗೂ ಲೆನ್ಸ್‌ಗಳನ್ನು ಜಪ್ತಿ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಆರೋಪಿಯು ಫೆ. 22 ರಂದು ಚಂದ್ರಾ ಲೇಔಟ್‌ನ ಚೇತನ್‌ ಎಂಬುವವರ ಇಂಪೈಂಟ್‌ ವಿಂಗ್ಸ್‌ ಸ್ಟುಡಿಯೋಗೆ ತೆರಳಿದ್ದರು. ಈ ವೇಳೆ ಬಾಡಿಗೆ ಪಡೆಯುವ ನೆಪದಲ್ಲಿ ಕ್ಯಾಮರಾ ಪಡೆದು ಬಳಿಕ ಪರಾರಿಯಾಗಿದ್ದ. ಈ ಸಂಬಂಧ ದಾಖಲಾಗಿದ್ದ ದೂರಿನ ಮೇರೆಗೆ ಕಾರ್ಯಾಚರಣೆ ನಡೆಸಿ ಆರೋಪಿಯನ್ನು ಬಂಧಿಸಲಾಗಿದೆ. ತಮಿಳು ನಾಡು ಕೃಷ್ಣಗಿರಿ ಮೂಲದ ಆರೋಪಿ ಪುರುಷೋತ್ತಮ್‌ ಕ್ಯಾಮೆರಾಗಳ ಬಗ್ಗೆ ಆಸಕ್ತಿ ಹೊಂದಿದ್ದ. ಆರಂಭದಲ್ಲಿ ಕೃಷ್ಣಗಿರಿ ಸ್ಟುಡಿಯೊಗಳಲ್ಲಿ ಕ್ಯಾಮೆರಾ ಬಾಡಿಗೆಗೆ ಪಡೆದು ಫೋಟೋ ತೆಗೆಯುತ್ತಿದ್ದ. ಬಳಿಕ ಸುಲಭವಾಗಿ ಹಣ ಗಳಿಸುವ ಉದ್ದೇಶದಿಂದ ಬಾಡಿಗೆ ನೆಪದಲ್ಲಿ ಕ್ಯಾಮೆರಾ ಪಡೆದು ಓಎಲ್‌ಎಕ್ಸ್‌ ಆ್ಯಪ್‌ನಲ್ಲಿ ಮಾರಾಟಕ್ಕಿರುವುದಾಗಿ ಹಾಕುತ್ತಿದ್ದ. ಇದನ್ನು ಗಮನಿಸಿ ಸಂಪರ್ಕಿಸುವ ಗಿರಾಕಿಗಳಿಂದ ಹಣ ಪಡೆದು ಕ್ಯಾಮೆರಾ ಮಾರಾಟ ಮಾಡುತ್ತಿದ್ದ. ಈ ಸಂಬಂಧ ಹಲವು ಬಾರಿ ಜೈಲು ಸೇರಿದ್ದ. ಹೀಗಾಗಿ, ಮನೆಯವರು ಈತನನ್ನು ಹೊರಹಾಕಿದ್ದರು. ಆರೋಪಿ ಕೆಲ ವರ್ಷಗಳಿಂದ ಕೋಲಾರದ ಮಾಲೂರಿಗೆ ಬಂದು ಸೂಪರ್‌ ಮಾರ್ಕೆಟ್‌ವೊಂದರಲ್ಲಿ ಕೆಲಸ ಮಾಡಿಕೊಂಡಿದ್ದ ಎಂದು ವಿಚಾರಣೆಯಿಂದ ತಿಳಿದು ಬಂದಿದೆ. ಕ್ಲಾರಿಟಿ ನೋಡುವ ನೆಪದಲ್ಲಿ ಪರಾರಿ !ಆರೋಪಿ ಪುರುಷೋತ್ತಮ್‌ ನಗರದ ಹಲವೆಡೆ ಬಾಡಿಗೆಗೆ ಕ್ಯಾಮರಾ ಸಿಗುವ ಸ್ಟುಡಿಯೊಗಳನ್ನು ಸಂಪರ್ಕಿಸಿ ಮಾಹಿತಿ ಪಡೆಯುತ್ತಿದ್ದ. ಫೋಟೊ ಕ್ಲಾರಿಟಿ ನೋಡುವುದಾಗಿ ಸ್ಟುಡಿಯೊದಿಂದ ಹೊರಗೆ ಕ್ಯಾಮೆರಾ ತಂದು ಬಳಿಕ ಕ್ಷಣಮಾತ್ರದಲ್ಲಿ ಪರಾರಿಯಾಗುತ್ತಿದ್ದ. ಬಳಿಕ ಓಎಲ್‌ಎಕ್ಸ್‌ನಲ್ಲಿ ಕ್ಯಾಮೆರಾಗಳನ್ನು ಮಾರಾಟ ಮಾಡುತ್ತಿದ್ದ. ಚಂದ್ರಾ ಲೇಔಟ್‌ನಲ್ಲಿಯೂ ಆರೋಪಿ ಫೋಟೋ ಕ್ಲಾರಿಟಿ ನೋಡುವುದಾಗಿ ಸ್ಟುಡಿಯೋದಿಂದ ಕ್ಯಾಮೆರಾ ಹೊರಗೆ ತಂದು ಫೋಟೋ ತೆಗೆಯುವ ಹಾಗೆ ನಟಿಸಿ, ಬಳಿಕ ಸ್ಟುಡಿಯೊ ಮಾಲೀಕ ಚೇತನ್‌ ಎದುರೇ ಕ್ಯಾಮೆರಾದೊಂದಿಗೆ ಓಡಿ ಹೋಗಿದ್ದ. ಆರೋಪಿಯು ಶ್ರೀರಂಗ ಪಟ್ಟಣ, ಹೊಸೂರು ಸೇರಿದಂತೆ ರಾಜ್ಯ ಹಾಗೂ ಹೊರ ರಾಜ್ಯಗಳ ಗಿರಾಕಿಗಳಿಗೆ ಕ್ಯಾಮೆರಾ ಮಾರಾಟ ಮಾಡಿರುವುದು ಪೊಲೀಸರ ವಿಚಾರಣೆಯಿಂದ ತಿಳಿದು ಬಂದಿದೆ.
from India & World News in Kannada | VK Polls https://ift.tt/XvfH4LW
