ರವಿಕುಮಾರ ಬೆಟ್ಟದಪುರ ಬೆಂಗಳೂರು: ಸಾಮಾಜಿಕ ಜಾಲತಾಣದಲ್ಲಿ ತರುಣಿಯರ ಹೆಸರಿನಲ್ಲಿ ಖಾತೆ ತೆರೆದು ಬ್ಲ್ಯಾಕ್‌ ಮೇಲ್‌ ಮಾಡುವ ಪ್ರಕರಣಗಳು ಹೆಚ್ಚಾಗುತ್ತಿವೆ. ಈ ನಡುವೆ ಬ್ಲ್ಯಾಕ್‌ಮೇಲ್‌ಗೆ ಒಳಗಾದವರು ಮರ್ಯಾದೆಗೆ ಅಂಜಿ ಪ್ರಾಣ ಕಳೆದುಕೊಳ್ಳುವ ವಿದ್ಯಮಾನಗಳೂ ಹೆಚ್ಚುತ್ತಿದ್ದು ಆತಂಕ ಮೂಡಿಸಿದೆ. ಈ ರೀತಿ ಪ್ರಾಣ ಕಳೆದುಕೊಳ್ಳುತ್ತಿರುವವರಲ್ಲಿ ಹೆಚ್ಚಿನವರು ಯುವಜನರೇ ಆಗಿದ್ದಾರೆ. ಜನ ಜಾಲತಾಣ ಸಕ್ರಿಯತೆ ಮತ್ತು ಯಾವುದೇ ಅಡೆತಡೆ ಇಲ್ಲದೆ ತೆರೆದುಕೊಳ್ಳುವ ಸೆಕ್ಸ್‌ ಲೋಕದ ಬಗೆಗಿನ ಕುತೂಹಲವನ್ನೇ ಬಂಡವಾಳ ಮಾಡಿಕೊಳ್ಳುವ ಕೆಲವು ದುರುಳರು ಸ್ನೇಹದ ಜಾಲ ಬೀಸಿ ಟ್ರ್ಯಾಪ್‌ಗೆ ಸಿಲುಕಿಸುತ್ತಾರೆ. ಕೆಲವರು ಸಲುಗೆ ಬೆಳೆಸಿ ನಗ್ನ ವಿಡಿಯೊ ಮಾಡಿಸಿಕೊಳ್ಳುತ್ತಾರೆ, ಫೋಟೊ ತೆಗೆದುಕೊಳ್ಳುತ್ತಾರೆ. ಅವುಗಳನ್ನೇ ಬಳಸಿಕೊಂಡು ಬ್ಲ್ಯಾಕ್ಮೇಲ್ ಮಾಡುತ್ತಾರೆ. ಕೆಲವರು ಈ ಚಿತ್ರಗಳನ್ನೇ ಎಡಿಟ್‌ ಮಾಡಿ, ಮಾರ್ಫಿಂಗ್‌ ಮಾಡಿ ಸಾಮಾಜಿಕ ಜಾಲ ತಾಣದಲ್ಲಿ ಹರಿಬಿಡುವುದಾಗಿ ಹೆದರಿಸಿ ಹಣಕ್ಕೆ ಬೇಡಿಕೆ ಇಡುತ್ತಾರೆ. ಗೌರವ, ಘನತೆಗೆ ಹೆದರುವವರು ಮೊದ ಮೊದಲು ಹಣ ನೀಡಿದರೂ, ನಂತರವೂ ಬ್ಲ್ಯಾಕ್ಮೇಲ್ ಮುಂದುವರಿದಾಗ ಹಣ ನೀಡಲಾಗದೆ ಆತ್ಮಹತ್ಯೆಗೆ ಮುಂದಾಗುತ್ತಿದ್ದಾರೆ. ಈಗಾಗಲೇ ಬ್ಲ್ಯಾಕ್‌ಮೇಲ್‌ಗೆ ಒಳಗಾಗಿ ವೈದ್ಯಕೀಯ ವಿದ್ಯಾರ್ಥಿಗಳು, ಯುವ ವೈದ್ಯ, ಎಂಜಿನಿಯರ್‌, ಬೆಸ್ಕಾಂ ನೌಕರ, ಕಾಲೇಜು ವಿದ್ಯಾರ್ಥಿಗಳು ಹಾಗೂ ಎಂಬಿಎ ಪದವಿ ವಿದ್ಯಾರ್ಥಿಗಳು ಸೇರಿದಂತೆ ಹಲವರು ಪ್ರಾಣ ಕಳೆದುಕೊಂಡಿದ್ದಾರೆ. ಕೆಲವೊಂದು ಪ್ರಕರಣಗಳಷ್ಟೇ ಬಯಲಿಗೆ ಬರುತ್ತಿವೆ. ಉಳಿದಂತೆ ಯಾವುದೇ ಕಾರಣವಿಲ್ಲದೆ ಪ್ರಾಣ ಕಳೆದುಕೊಳ್ಳುವ ನೂರಾರು ಯುವಜನರ ಸಾವಿನ ಹಿಂದೆಯೂ ಇದೇ ಟ್ರ್ಯಾಪ್‌ ಇರಬಹುದೆಂಬ ಸಂಶಯವೂ ಕೇಳಿಬಂದಿದೆ. ರಾಜ್ಯದಲ್ಲಿ ಅಮಾಯಕರ ಜೀವಬಲಿ
- 26 ವರ್ಷದ ಯುವ ವೈದ್ಯರೊಬ್ಬರನ್ನು ಭೋಪಾಲ್‌ನ ಸೈಬರ್‌ ದುರುಳನೊಬ್ಬ ಯುವತಿಯ ಸೋಗಿನಲ್ಲಿ ಸಲುಗೆ ಬೆಳೆಸಿ ನಗ್ನ ವಿಡಿಯೊ ಮಾಡಿಕೊಂಡಿದ್ದ. ವೈದ್ಯರು ಮೊದಲು 67 ಸಾವಿರ ನೀಡಿದ್ದರೂ ಬ್ಲ್ಯಾಕ್ಮೇಲ್ ಮುಂದುವರಿದಿತ್ತು. ಕೊನೆಗೆ ಅವರು ಡೆತ್‌ನೋಟ್‌ ಬರೆದಿಟ್ಟು, 2021 ಆಗಸ್ಟ್‌ 13ರಂದು ಕೆಂಗೇರಿ ಹೆಜ್ಜಾಲದಲ್ಲಿ ರೈಲಿಗೆ ತಲೆ ಕೊಟ್ಟು ಆತ್ಮಹತ್ಯೆ ಮಾಡಿಕೊಂಡಿದ್ದರು.
- 24 ವರ್ಷದ ಎಂಜಿನಿಯರ್‌ರನನ್ನು ಪ್ರಚೋದಿಸಿ ಅಶ್ಲೀಲ ವಿಡಿಯೊ ಮಾಡಿಕೊಂಡ ದುರುಳರು ಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ. ಹಣ ನೀಡಲಾಗದೆ ಮಾನಕ್ಕೆ ಅಂಜಿ ಜ.24ರಂದು ಮಲ್ಲೇಶ್ವರದ ರೈಲ್ವೆ ಹಳಿ ಬಳಿ ರೈಲಿಗೆ ಸಿಲುಕಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.
- ಎಂಬಿಎ ಪದವಿ ವಿದ್ಯಾರ್ಥಿಯೊಬ್ಬರು ಕೆಲವು ವಾರದ ಹಿಂದೆ ಕೆಂಗೇರಿ ಬಳಿ ರೈಲಿಗೆ ತಲೆ ಕೊಟ್ಟು ಆತ್ಮಹತ್ಯೆ ಮಾಡಿಕೊಂಡಿದ್ದ.
- ಬೆಸ್ಕಾಂ ನೌಕರನೊಬ್ಬ ಇತ್ತೀಚೆಗೆ ತನ್ನ ಪ್ರೇಯಸಿ ಜತೆ ಅರಸೀಕೆರೆಗೆ ತೆರಳಿದ್ದರು. ಅಲ್ಲಿನ ಏಕಾಂತದ ಖಾಸಗಿ ಕ್ಷಣವನ್ನು ಸ್ಥಳೀಯ ಅಪ್ರಾಪ್ತ ಯುವಕರು ವಿಡಿಯೊ ಮಾಡಿಕೊಂಡು ಬ್ಲ್ಯಾಕ್ಮೇಲ್ ಶುರು ಮಾಡಿದ್ದರು. ಕೊನೆಗೆ ಹಣ ನೀಡಲಾಗದೆ ಬೆಂಗಳೂರಿನ ಲಾಡ್ಜ್‌ವೊಂದರಲ್ಲಿ 2021ರಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದರು.
- ಕಳೆದ ವರ್ಷ ಇಬ್ಬರು ಪತ್ರಕರ್ತರಿಗೂ ಇದೇ ರೀತಿ ಬ್ಲ್ಯಾಕ್ಮೇಲ್ ಮಾಡುವ ಪ್ರಯತ್ನ ನಡೆಸಿದ್ದರು. ಕೊನೆಗೆ ಸೈಬರ್‌ ಪೊಲೀಸರ ನೆರವಿನಿಂದ ಆರೋಪಿಗಳ ಬೆನ್ನತ್ತಿದಾಗ ಬೆಂಗಳೂರಿನವರೇ ಕೃತ್ಯವೆಸಗಿರುವುದು ತಿಳಿದುಬಂದಿತ್ತು.
- ಸಾಮಾಜಿಕ ಜಾಲತಾಣದಲ್ಲಿ ಯಾವುದೇ ಅಪರಿಚಿತರ ಫ್ರೆಂಡ್‌ ರಿಕ್ವೆಸ್ಟ್‌ ಸ್ವೀಕರಿಸಬಾರದು.
- ಸ್ವೀಕರಿಸಿದರೂ, ಅವರೊಂದಿಗೆ ಚಾಟ್‌ ಮಾಡಬಾರದು. ಒಡನಾಟ ಬೆಳೆಸಿಕೊಳ್ಳಬಾರದು.
- ಮೊಬೈಲ್‌ ನಂಬರ್‌ ಹಾಗೂ ವೈಯಕ್ತಿಕ ವಿಚಾರಗಳನ್ನು ಹಂಚಿಕೊಳ್ಳಬಾರದು.
- ಅಪರಿಚಿತ ವ್ಯಕ್ತಿಗಳು ವಿಡಿಯೊ ಕರೆ ಮಾಡಿದಾಗ ಸ್ವೀಕರಿಸಬಾರದು.
- ಒಂದು ವೇಳೆ ಸ್ವೀಕರಿಸಿ ವಿಡಿಯೊ ರೆಕಾರ್ಡ್‌ ಆದ ನಂತರ ಅವರ ಬ್ಲ್ಯಾಕ್‌ಮೇಲ್‌ಗೆ ಹೆದರಬಾರದು.
- ಅವರ ನಂಬರ್‌ ಬ್ಲ್ಯಾಕ್‌ ಮಾಡಬೇಕು. ಇಲ್ಲ ತಮ್ಮ ಸಾಮಾಜಿಕ ಜಾಲತಾಣಗಳನ್ನು ನಿಷ್ಕ್ರೀಯಗೊಳಿಸಿ
- ಯಾವುದೇ ಕಾರಣಕ್ಕೂ ಹಣ ನೀಡಬಾರದು.
- ಬ್ಲ್ಯಾಕ್ಮೇಲ್ ಹೆಚ್ಚಾದರೆ ಸೈಬರ್‌ ಕ್ರೈಂ ಪೊಲೀಸರಿಗೆ ದೂರು ನೀಡಬೇಕು.
- ಇಲ್ಲವೇ ಬ್ಲ್ಯಾಕ್ಮೇಲ್ ಪ್ರೊಫೈಲ್‌ ಚಿತ್ರ ಹಾಗೂ ಚಾಟ್‌ ಮಾಡಿರುವುದನ್ನು ಸ್ಕ್ರೀನ್‌ಶಾಟ್‌ ತೆಗೆದು ಅಟ್ಯಾಚ್‌ ಮಾಡಿ ರಾಷ್ಟ್ರೀಯ ಸೈಬರ್‌ ಕ್ರೈಂ ರಿಪೋರ್ಟಿಂಗ್‌ ಪೋರ್ಟಲ್‌ನಲ್ಲಿ ದೂರು ದಾಖಲಿಸುವುದು.
- ಇಂತಹ ತಪ್ಪುಗಳ ನಡೆದಾಗ ಯಾವುದೇ ಮುಚ್ಚುಮರೆ ಇಲ್ಲದೇ ಸ್ನೇಹಿತರು ಅಥವಾ ಪೋಷಕರ ಬಳಿ ಹೇಳಿಕೊಳ್ಳುವುದು.
from India & World News in Kannada | VK Polls https://ift.tt/zT0xMuO
