ಫಾಲಲೋಚನ ಆರಾಧ್ಯ ಚಾಮರಾಜನಗರ: ಸರಕಾರಿ ವಸತಿ ಶಾಲೆಗಳಿಗೆ ರೆಫ್ರಿಜರೇಟರ್‌ಗಳನ್ನು ಪೂರೈಕೆ ಮಾಡದೇ, ಪೂರೈಸಲಾಗಿದೆ ಎಂಬ ದಾಖಲೆ ಸೃಷ್ಟಿಸಿ ಲಕ್ಷಾಂತರ ರೂ. ಅವ್ಯವಹಾರ ನಡೆಸಿರುವ ಪೂರೈಕೆದಾರ ಸಂಸ್ಥೆ ಕುರಿತು ಮಹಾಲೇಖಪಾಲರ (ಆಡಿಟ್‌) ವರದಿ ಬಲವಾದ ಆಕ್ಷೇಪ ಎತ್ತಿದೆ. ರಾಜ್ಯ ಅಲ್ಪಸಂಖ್ಯಾತರ ಇಲಾಖೆಯ ಮೊರಾರ್ಜಿ ದೇಸಾಯಿ ವಸತಿ ಶಾಲೆಗಳಿಗೆ 2020-21ನೇ ಸಾಲಿನಲ್ಲಿ ಕಿಯೋನಿಕ್ಸ್‌ ಸಂಸ್ಥೆ ಮೂಲಕ ರೆಫ್ರಿಜರೇಟರ್‌ ಚಿಲ್ಲರ್ಸ್ ಪೂರೈಸುವ ವ್ಯವಹಾರದಲ್ಲಿ ಅಕ್ರಮದ ವಾಸನೆ ಬಡಿದಿದೆ. ಪೂರೈಕೆದಾರ ಪಾತ್ರ ನಿರ್ವಹಿಸಿರುವ ನ್ಯೂಜೆನ್‌ ಸೆಕ್ಯೂರಿಟಿ ಸೆಲ್ಯೂಶನ್ಸ್‌ ಸಂಸ್ಥೆಯ ವ್ಯವಹಾರ ಕುರಿತು ಅನುಮಾನಗಳು ಎದ್ದಿವೆ. ಪೂರೈಸದೇ ರೆಫ್ರಿಜರೇಟರ್‌ ಪೂರೈಕೆ ಆಗಿದೆ ಎಂಬ ರೀತಿಯಲ್ಲಿ ಹಾಸ್ಟೆಲ್‌ ಪ್ರಾಂಶುಪಾಲರ ಸಹಿಯನ್ನೇ ಫೋರ್ಜರಿ ಮಾಡಿರುವುದು ಹಾಗೂ ಮೂರನೇ ವ್ಯಕ್ತಿ ಪರಿಶೀಲನೆ ವರದಿಯನ್ನೇ ನಕಲಿ ಮಾಡಿರುವುದು ಆಡಿಟ್‌ ತಪಾಸಣೆ ವೇಳೆ ಸಾಕ್ಷಿಯಾಗಿ ಸಿಕ್ಕಿವೆ. ಇದೆಲ್ಲದಕ್ಕಿಂತ ಅಚ್ಚರಿಯ ವಿಷಯವೆಂದರೆ, ರೆಫ್ರಿಜರೇಟರ್‌ ಪೂರೈಕೆಯಾಗದಿದ್ದರೂ ಅಧಿಕಾರಿಗಳು ಬಿಲ್‌ ಚುಕ್ತಗೊಳಿಸಿದ್ದಾರೆ. ಹಾಗಾಗಿ, ಅಧಿಕಾರಿಗಳ ಬಗ್ಗೆಯೂ ಅನುಮಾನದ ಬೊಟ್ಟು ತಿರುಗಿದೆ. ಕೆಲ ಪ್ರಾಂಶುಪಾಲರು ಹಾಗೂ ಮೂರನೇ ವ್ಯಕ್ತಿ ತಪಾಸಣೆ ಅಧಿಕಾರಿಗಳು ಈ ಸಹಿ ನಮ್ಮದಲ್ಲ ಎಂಬುದಾಗಿ ತಿಳಿಸಿ ಬರೆದಿರುವ ಪತ್ರ, ಆಡಿಟ್‌ನಲ್ಲಿ ಆಕ್ಷೇಪಣೆ ಮಾಡಿರುವ ದಾಖಲೆಗಳು ವಿಜಯ ಕರ್ನಾಟಕಕ್ಕೆ ಲಭ್ಯವಾಗಿವೆ. ಏನಿದು ಹಗರಣ?ಅಲ್ಪ ಸಂಖ್ಯಾತರ ಕಲ್ಯಾಣ ಇಲಾಖೆಯು ತನ್ನ ಮೊರಾರ್ಜಿ ವಸತಿ ಶಾಲೆ/ ಹಾಸ್ಟೆಲ್‌ಗಳಿಗೆ ಒಟ್ಟು 70 ರೆಫ್ರಿಜರೇಟರ್‌ಗಳನ್ನು ಸರಬರಾಜು ಮಾಡುವಂತೆ ಕೋರಿ ಪೂರೈಕೆದಾರ ಸಂಸ್ಥೆ ಕಿಯೋನಿಕ್ಸ್‌ಗೆ 2020ರ ಮಾ.10ರಂದು ಪತ್ರ ಬರೆಯುತ್ತದೆ. ಬಳಿಕ, 650 ಲೀಟರ್‌ನ ಡಿಜಿಟಲ್‌ ಮೈಕ್ರೋ ಆಧಾರಿತ ತಾಪಮಾನ ನಿಯಂತ್ರಿತ ರೆಫ್ರಿಜರೇಟರ್‌ಗಳನ್ನು ರಾಜ್ಯದ ನಾನಾ ಕಡೆಯ ಮೊರಾರ್ಜಿ ಹಾಸ್ಟೆಲ್‌ಗಳಿಗೆ ಪೂರೈಸಲು ಆದೇಶಿಸಿತು. ಆ ಸಂದರ್ಭದಲ್ಲಿಯೇ ನಿಯಮದಂತೆ ಒಂದಿಷ್ಟು ನಿರ್ದೇಶನಗಳನ್ನು ನೀಡಿತ್ತು. ‘ಪ್ರತಿ ರೆಫ್ರಿಜರೇಟರ್‌ಗಳ ದರದ ವಿವರಗಳನ್ನು ಒದಗಿಸಬೇಕು. 2 ವರ್ಷಗಳ ವಾರ್ಷಿಕ ನಿರ್ವಹಣೆ ಒಪ್ಪಂದವನ್ನು ಒಳಗೊಂಡಿರಬೇಕು. ಮೂರನೇ ವ್ಯಕ್ತಿಯ ತಪಾಸಣೆಗಳನ್ನು ಸರಬರಾಜುದಾರರಿಂದ ನಡೆಸಿ, ಇಲಾಖೆಗೆ ವರದಿ ಸಲ್ಲಿಸಬೇಕು. ಅಲ್ಲದೇ ವಿತರಣಾ ಚಲನ್‌ಗಳನ್ನು ಹಾಸ್ಟೆಲ್‌ಗಳ ಪ್ರಾಂಶುಪಾಲರು ಫೋಟೋಗಳೊಂದಿಗೆ ಪ್ರಮಾಣೀಕರಿಸಬೇಕು ಮತ್ತು ಪಾವತಿಸಲು ಇಲಾಖೆಗೆ ಸಲ್ಲಿಸಬೇಕು’ ಎಂದು ಇಲಾಖೆ ಅಧಿಕಾರಿಗಳು ಸೂಚನೆ ನೀಡಿದ್ದರು. ಈ ಆದೇಶದಂತೆ ಪೂರೈಕೆದಾರ ಸಂಸ್ಥೆ ಕಿಯೋನಿಕ್ಸ್‌, ತನ್ನೊಂದಿಗೆ ಒಪ್ಪಂದ ಮಾಡಿಕೊಂಡಿರುವ ನ್ಯೂಜೆನ್‌ ಸೆಕ್ಯೂರಿಟಿ ಸೆಲ್ಯೂಶನ್ಸ್‌ ಸಂಸ್ಥೆಗೆ ಈ ರೆಫ್ರಿಜರೇಟರ್‌ಗಳನ್ನು ಪೂರೈಸಲು ತಿಳಿಸುತ್ತದೆ. ಅದರಂತೆ 70 ಹಾಸ್ಟೆಲ್‌ಗಳಿಗೆ ರೆಫ್ರಿಜರೇಟರ್‌ಗಳನ್ನು ಪೂರೈಕೆ ಮಾಡಲಾಗಿದೆ. ಅದಕ್ಕೆ ಸಂಬಂಧಿಸಿದಂತೆ ಪ್ರಾಂಶುಪಾಲರಿಂದ ಸ್ವೀಕೃತ ಪತ್ರ ಹಾಗೂ ಮೂರನೇ ವ್ಯಕ್ತಿಯ ತಪಾಸಣೆ ಪತ್ರವನ್ನು ಒದಗಿಸಲಾಗಿದೆ ಎಂದು ನ್ಯೂಜೆನ್‌ ಸೆಕ್ಯೂರಿಟಿ ಸೆಲ್ಯೂಶನ್ಸ್‌ ಸಂಸ್ಥೆ ಪ್ರಾಮಾಣೀಕರಿಸಿ ಬಿಲ್‌ ಪಡೆದಿದೆ.
from India & World News in Kannada | VK Polls https://ift.tt/xiQj4Ck
