ಹೊಸದಿಲ್ಲಿ: ಜೂನಿಯರ್‌ ಕ್ರಿಕೆಟ್ ಆಡುವಾಗ ಆಹಾರ ಪ್ರಿಯ. ವಿಶೇಷವಾಗಿ ಬೀದಿ ಬದಿ ಆಹಾರ ಎಂದರೆ ಆತನಿಗೆ ಪಂಚಪ್ರಾಣ. ರುಚಿಯಾಗಿ ಎಲ್ಲಿ ಏನೇ ದೊರೆತರೂ ಆತ ನನ್ನನ್ನು ಬಿಡದೆ ಕರೆದುಕೊಂಡು ಹೋಗುತ್ತಿದ್ದರು ಎಂದು ಮಾಜಿ ನಾಯಕನ ಅಂಡರ್‌ 19 ಸಹ ಆಟಗಾರ ಹೇಳಿದ್ದಾರೆ. ಕಳೆದ 2008ರಲ್ಲಿ ಭಾರತಕ್ಕೆ ಅಂಡರ್‌ 19 ವಿಶ್ವಕಪ್‌ ಗೆದ್ದುಕೊಟ್ಟಿದ್ದ ನಾಯಕ ವಿರಾಟ್‌ ಕೊಹ್ಲಿ 2011ರಲ್ಲಿ ಹಿರಿಯರ ತಂಡದ ಪರ ಅಂತಾರಾಷ್ಟ್ರೀಯ ಟೆಸ್ಟ್‌ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದರು. ಇದೀಗ ಅವರು ಭಾರತೀಯ ಟೆಸ್ಟ್‌ ಕ್ರಿಕೆಟ್‌ನ ಅತ್ಯಂತ ಯಶಸ್ವಿ ನಾಯಕನಾಗುವ ಮೂಲಕ ತಮ್ಮದೇ ಆದ ಮೈಲುಗಲ್ಲು ಸ್ಥಾಪಿಸಿದ್ದಾರೆ. ಪಶ್ಚಿಮ ದಿಲ್ಲಿಯಲ್ಲಿನ ಕಾಲೋನಿಯ ಮಧ್ಯಮ ಕುಟುಂಬವೊಂದರಲ್ಲಿ ಜನಿಸಿದ್ದ ವಿರಾಟ್‌ ಕೊಹ್ಲಿ ಶಾಲಾ ಹಂತದಲ್ಲಿ ಬ್ಯಾಟಿಂಗ್‌ನಲ್ಲಿ ಸಾಕಷ್ಟು ಪ್ರಾವಿಣ್ಯತೆಯನ್ನು ಹೊಂದಿದ್ದರು. ಆ ಮೂಲಕ 19 ವಯೋಮಿತಿ ಭಾರತ ತಂಡ ಪ್ರವೇಶಿಸುವ ಮೂಲಕ ದೊಡ್ಡ ಹೆಸರು ಮಾಡಿದ್ದರು. ಅಂದಹಾಗೆ ವಿರಾಟ್‌ ಕೊಹ್ಲಿ ಜೊತೆ ಏಳು ವರ್ಷಗಳ ಕಾಲ ಜೂನಿಯರ್‌ ಕ್ರಿಕೆಟ್ ಆಡಿರುವ ಪ್ರದೀಪ್‌ ಸಂಗ್ವನ್‌ ತಮ್ಮ ಸ್ನೇಹಿತನ ಬಗ್ಗೆ ಹಲವು ಕುತೂಹಲಕಾರಿ ಅಂಶಗಳನ್ನು ಬಹಿರಂಗಪಡಿಸಿದ್ದಾರೆ. ಚಿಕನ್‌ ರೋಲ್ಸ್‌ ಅಂದ್ರೆ ಕೊಹ್ಲಿಗೆ ಪಂಚಪ್ರಾಣ: "ಜೂನಿಯರ್‌ ಕ್ರಿಕೆಟ್ ಆಡುವಾಗ ಏಳು ವರ್ಷಗಳ ಕಾಲ ನಾನು ಮತ್ತು ವಿರಾಟ್‌ ಕೊಹ್ಲಿ ಒಂದೇ ಕೊಠಡಿಯನ್ನು ಹಂಚಿಕೊಂಡಿದ್ದೆವು. ಕೊಹ್ಲಿ ಆಹಾರ ಪ್ರಿಯ, ವಿಶೇಷವಾಗಿ ಬೀದಿ ಬದಿ ಆಹಾರ ಎಂದರೆ ಆತನಿಗೆ ಪಂಚಪ್ರಾಣ. ಚಿಕನ್‌ ರೋಲ್ಸ್‌ ಅಂದ್ರೆ ಕೊಹ್ಲಿಗೆ ಜಾಸ್ತಿ ಇಷ್ಟ. ಅಂಡರ್‌ 19 ಭಾರತ ತಂಡದೊಂದಿಗೆ ದಕ್ಷಿಣ ಆಫ್ರಿಕಾದಲ್ಲಿ ನಾವಿದ್ದಾಗ, ಇಲ್ಲಿನ ಜಾಗವೊಂದರಲ್ಲಿ ಮಟನ್‌ ರೋಲ್‌ ತುಂಬಾ ರುಚಿಯಾಗಿರುತ್ತದೆ ಎಂದು ಯಾರೂ ಒಬ್ಬರು ಹೇಳಿದ್ದರು. ಆದರೆ ಆ ಸ್ಥಳ ಸುರಕ್ಷಿತವಲ್ಲ ಎಂತಲೂ ಅವರು ಹೇಳಿದ್ದರು," ಎಂದು ಸಂಗ್ವನ್‌ ಇಂಡಿಯನ್‌ ಎಕ್ಸ್‌ಪ್ರೆಸ್‌ನಲ್ಲಿ ಬರೆದಿರುವ ತಮ್ಮ ಅಂಕಣದಲ್ಲಿ ತಿಳಿಸಿದ್ದಾರೆ. ನನಗೆ ತುಂಬಾ ಭಯವಾಯ್ತು: "ಹೌದು ಅಲ್ಲಿ ಮಟನ್‌ ರೋಲ್ಸ್‌ ಸೇರಿದಂತೆ ಹಲವು ಬಗೆಯ ಖಾದ್ಯಗಳು ತುಂಬಾ ರುಚಿಯಾಗಿರುತ್ತವೆ. ಆದರೆ ಇತ್ತೀಚೆಗೆ ಅಲ್ಲಿ ಗಲಾಟೆ ನಡೆದಿತ್ತು ಹಾಗೂ ಒಬ್ಬರ ಕೈಗೆ ಚಾಕುವಿನಿಂದ ಇರಿಯಲಾಗಿತ್ತು ಎಂದು ನಮ್ಮ ಡ್ರೈವರ್‌ ತಿಳಿಸಿದರು. ಇದನ್ನು ಕೇಳಿದ ನನಗೆ ಭಯವಾಯ್ತು. ಆದರೆ ಕೊಹ್ಲಿ,' ಹೋಗೋಣ ಬಾ ಗುರು, ಏನು ಆಗಲ್ಲ,' ಎಂದು ನನ್ನನ್ನು ಪುಸಲಾಯಿಸಿದರು. ಅದರಂತೆ ಅವರು ನನ್ನನ್ನು ಕರೆದೊಯ್ದರು. ಅಲ್ಲಿ ವಿವಿಧ ಖಾದ್ಯಗಳ ರುಚಿ ನೋಡಿದ ಬಳಿಕ ನಮ್ಮನ್ನು ಕೆಲವರು ಓಡಿಸಿಕೊಂಡು ಬಂದರು. ಆದರೆ ನಾವು ನಮ್ಮ ಕಾರನ್ನು ನಿಲ್ಲಿಸದೆ ನಮ್ಮ ಜಾಗಕ್ಕೆ ಸುರಕ್ಷಿತವಾಗಿ ತಲುಪಿದೆವು," ಎಂದರು. 2012 ಮತ್ತು 2013ರಲ್ಲಿ ವಿರಾಟ್‌ ಕೊಹ್ಲಿ ಅತ್ಯುತ್ತಮ ಲಯದಲ್ಲಿದ್ದರು. ಆ ಮೂಲಕ ಅವರು ಆಹಾರ ಕ್ರಮ ಸೇರಿದಂತೆ ತಮ್ಮ ಸಂಪೂರ್ಣ ಜೀವನ ಶೈಲಿಯನ್ನು ಬದಲಾಯಿಸಿಕೊಳ್ಳಲು ಬಯಸಿದ್ದರು ಎಂಬುದನ್ನು ಸಂಗ್ವನ್‌ ಮೆಲುಕು ಹಾಕಿದರು. 2012ರಲ್ಲಿ ಶ್ರೀಲಂಕಾ ವಿರುದ್ಧ 133 ರನ್‌ ಹಾಗೂ ಪಾಕಿಸ್ತಾನ ವಿರುದ್ಧ ವೃತ್ತಿ ಜೀವನದ ಶ್ರೇಷ್ಠ ಇನಿಂಗ್ಸ್ ಆಡಿ ದೊಡ್ಡ ಹೆಸರು ಮಾಡಿದ್ದರು. ಆ ಮೂಲಕ ಅವರು ಸಾರ್ವಕಾಲಿಕ ಶ್ರೇಷ್ಠ ಬ್ಯಾಟ್ಸ್‌ಮನ್‌ ಆಗುವ ಮುನ್ಸೂಚನೆ ನೀಡಿದ್ದರು. ಕಟ್ಟುನಿಟ್ಟಿನ ಆಹಾರ ಕ್ರಮ: "ಭಾರತ ಹಿರಿಯರ ತಂಡದ ಪರ ಆಡಿದ ಬಳಿಕ 2012ರಲ್ಲಿ ನಮ್ಮ ಜೊತೆ ಆಡಲು ಬಂದಾಗ ವಿರಾಟ್‌ ಕೊಹ್ಲಿ ತಮ್ಮ ಆಹಾರ ಕ್ರಮವನ್ನು ಬದಲಾಯಿಸಿದ್ದರು. ನಮ್ಮ ತಂಡದಲ್ಲಿ ನಾವು ವಿರಾಟ್‌ ಕೊಹ್ಲಿಯನ್ನು ಚೀಕು-ಮೋಟು ಎಂದು ಕರೆಯುತ್ತಿದ್ದೆವು. ಆದರೆ 2012ರಲ್ಲಿ ಅವರು ಫಿಟ್‌ನೆಸ್‌ ಹಾಗೂ ಕ್ಲಿಷ್ಟ ಆಹಾರ ಕ್ರಮದೊಂದಿಗೆ ಬಂದಿದ್ದರು. ತಮ್ಮ ದೇಹದ ತೂಕವನ್ನು ಕಡಿಮೆಗೊಳಿಸಲು ಅವರು ನಿರ್ಧರಿಸಿದ್ದರು. ಬ್ಯಾಟಿಂಗ್‌ ಜೊತೆಗೆ ಅತ್ಯುತ್ತಮ ಫೀಲ್ಡರ್‌ ಆಗಲು ಅವರು ಬಯಸಿದ್ದರು. ಈ ಕಾರಣ ಆವರು ನೆಟ್ಸ್‌ನಲ್ಲಿ ಹೆಚ್ಚಿನ ಸಮಯ ಕಳೆಯುತ್ತಿದ್ದರು," ಎಂದರು. "ದೇಹದ ತೂಕವನ್ನು ಕಡಿಮೆಗೊಳಿಸಬೇಕೆಂದು ಹಲವು ಬಾರಿ ನಾವು ಚರ್ಚೆ ನಡೆಸಿದ್ದೆವು. ಅದರಂತೆ ಅವರು ತಮ್ಮ ತೂಕವನ್ನು ಕಡಿಮೆಗೊಳಿಸಲು ಮುಂದಾದರು. ಮೂರು ತಿಂಗಳ ಬಳಿಕ ಕೊಹ್ಲಿ 12 ಕೆ.ಜಿ ತೂಕ ಇಳಿಸಿಕೊಂಡರು. ಡ್ರೆಸ್ಸಿಂಗ್‌ ಕೊಠಡಿಯಲ್ಲಿ ಅವರು ಊಟ ಬದಲಾಯಿತು. ಮಟನ್‌ ರೈಸ್‌ ಬದಲು ಬೇಯಿಸಿದ ಆಹಾರವನ್ನು ಸೇವಿಸಲು ಮುಂದಾದರು. ಬೇಯಿಸಿದ ಮೊಟ್ಟೆ, ಹಸಿರು ಸಲಾಡ್‌ಗಳು, ಒಣ ಹಣ್ಣುಗಳನ್ನು ತಿನ್ನಲು ಆರಂಭಿಸಿದರು," ಎಂದು ಸಂಗ್ವನ್‌ ತಮ್ಮ ಸ್ನೇಹಿತ ಕೊಹ್ಲಿ ಬಗ್ಗೆ ಹೇಳಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/Rw6afbn
