ಮಾಸ್ಕೊ: ಉಕ್ರೇನ್‌ ಮೇಲೆ ಸಂಪೂರ್ಣವಾಗಿ ನಿಯಂತ್ರಣ ಸಾಧಿಸುವತ್ತ ಸಾಗುತ್ತಿರುವ ರಷ್ಯಾ ಈಗ ಹಲವು ಮಾಧ್ಯಮಗಳು ಹಾಗೂ ಸಾಮಾಜಿಕ ಜಾಲತಾಣಗಳ ಮೇಲೂ ಪ್ರಾಬಲ್ಯ ಸಾಧಿಸಲು ಮುಂದಾಗಿದೆ. ಉಕ್ರೇನ್‌ ಮೇಲೆ ರಷ್ಯಾ ಮಾಡಿರುವ ದಾಳಿ ಕುರಿತು 'ನಕಲಿ ಸುದ್ದಿ' ಹರಡಿದ ಆರೋಪದಲ್ಲಿ ಫೇಸ್‌ಬುಕ್‌ ಹಾಗೂ ಟ್ವಿಟರ್‌ಅನ್ನು ಬ್ಲಾಕ್‌ ಮಾಡಿದೆ. ಅಲ್ಲದೆ, ಮುಂದಿನ ದಿನಗಳಲ್ಲಿ ನಕಲಿ ಸುದ್ದಿ ಹರಡುವ ಮಾಧ್ಯಮಗಳ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳಲು ಕಾನೂನು ಸಹ ಜಾರಿಗೊಳಿಸಿದೆ. ಜಾಗತಿಕ ಮಟ್ಟದ ಹಲವು ಮಾಧ್ಯಮಗಳ ಮೇಲೂ ರಷ್ಯಾ ಗುರಾಣಿ ಬಳಸಿದೆ. ಬ್ರಿಟನ್‌ನ ಬಿಬಿಸಿ, ಅಮೆರಿಕ ಸರಕಾರ ಹಣ ಹೂಡಿಕೆ ಮಾಡಿರುವ ವಾಯ್ಸ್ ಆಫ್‌ ಅಮೆರಿಕ, ರೇಡಿಯೋ ಫ್ರೀ ಯುರೋಪ್‌/ರೇಡಿಯೋ ಲಿಬರ್ಟಿ, ಜರ್ಮನ್‌ ಬ್ರಾಡ್‌ಕಾಸ್ಟರ್‌ ಡಾಯ್ಚ ವಿಲ್ಲೆ ಹಾಗೂ ಲ್ಯಾಟ್ವಿಯಾ ಮೂಲದ ಮೆಡುಜಾ ಮಾಧ್ಯಮಗಳನ್ನೂ ನಿಷೇಧಿಸಿದೆ. ''ರಷ್ಯಾ ನಿಷೇಧಿಸಿರುವ ವಿಷಯಗಳು ಜಾಲತಾಣಗಳಲ್ಲಿ ಪೋಸ್ಟ್‌ ಮಾಡಲಾಗಿದ್ದು, ಇವುಗಳನ್ನು ಡಿಲೀಟ್‌ ಮಾಡುವಲ್ಲಿ ವಿಫಲವಾದ ಕಾರಣ ಫೇಸ್‌ಬುಕ್‌ ಹಾಗೂ ಟ್ವಿಟರ್‌ ಮೇಲೆ ನಿಷೇಧ ಹೇರಲಾಗಿದೆ,'' ಎಂದು ರಷ್ಯಾ ತಿಳಿಸಿದೆ. ನಕಲಿ ಸುದ್ದಿ ಪ್ರಸಾರ ಮಾಡಿದ ಹಿನ್ನೆಲೆಯಲ್ಲಿ ವಿದೇಶಿ ಮಾಧ್ಯಮಗಳನ್ನು ನಿಷೇಧಿಸಿದೆ. ಅಲ್ಲದೆ, ಮುಂದಿನ ದಿನಗಳಲ್ಲಿ ನಕಲಿ ಸುದ್ದಿ ಹರಡಿದರೆ 15 ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸುವ ಕಾನೂನನ್ನು ಸಹ ಜಾರಿಗೊಳಿಸಿದೆ. ಮುಂದುವರಿದ ದಾಳಿ ನಾಗರಿಕರು ಸುರಕ್ಷಿತ ಸ್ಥಳಗಳಿಗೆ ತೆರಳಲು ಹಾಗೂ ವಿದೇಶಿಯರ ತೆರವು ಕಾರ್ಯಾಚರಣೆಗೆ ನೆರವಾಗಲು ಉಕ್ರೇನ್‌ನ ಎರಡು ನಗರಗಳಲ್ಲಿ ಕದನ ವಿರಾಮ ಘೋಷಿಸಿದ್ದ ರಷ್ಯಾ, ಉಳಿದ ಪ್ರದೇಶಗಳಲ್ಲಿ ದಾಳಿ ತೀವ್ರಗೊಳಿಸಿದೆ. ರಾಜಧಾನಿ ಕೀವ್‌ ಸೇರಿ ಹಲವು ಪ್ರಮುಖ ನಗರಗಳ ಮೇಲೆ ಶನಿವಾರವೂ ಶೆಲ್‌ ಹಾಗೂ ರಾಕೆಟ್‌ ದಾಳಿ ನಡೆಸಲಾಗಿದೆ. ಶನಿವಾರ ಒಂದೇ ದಿನ ಕೀವ್‌ ನಗರದ 12 ಕಡೆಗಳಲ್ಲಿ ರಾಕೆಟ್‌ ಹಾಗೂ ಕ್ಷಿಪಣಿ ದಾಳಿ ಮಾಡಿರುವ ರಷ್ಯಾ ಪಡೆಗಳು ಇಡೀ ನಗರವನ್ನು ಸ್ಮಶಾನವನ್ನಾಗಿ ಮಾಡಿವೆ. ಅತ್ತ, ಚೆರ್ನಿಹಿವ್‌ನಲ್ಲಿಯೂ ಬೃಹತ್‌ ಸ್ಫೋಟ ಸಂಭವಿಸಿದ್ದು, ನೂರಾರು ಜನ ಮೃತಪಟ್ಟಿರುವ ಕುರಿತು ಮಾಹಿತಿ ಲಭ್ಯವಾಗಿದೆ. ಕೀವ್‌ನಲ್ಲಿ ಆರಂಭದಿಂದಲೂ ದಾಳಿ ಮಾಡುತ್ತಿರುವ ಪುಟಿನ್ ಪಡೆಗಳು ಶುಕ್ರವಾರ ನಡೆಸಿದ ಕ್ಷಿಪಣಿ ದಾಳಿಯಲ್ಲಿ ಏಳು ಜನ ಹತರಾಗಿದ್ದರು. ಕೀವ್‌, ಕಾರ್ಕಿವ್‌, ಖೆರ್ಸಾನ್‌, ಚೆರ್ನಿಹಿವ್‌, ಸುಮಿ ಸೇರಿ ಹಲವು ನಗರಗಳ ಮೇಲೆ ಪ್ರಾಬಲ್ಯ ಸಾಧಿಸಿರುವ ಪಡೆಗಳು ಎಲ್ಲಾಕಡೆಗಳಿಂದಲೂ ದಾಳಿ ಮಾಡುತ್ತಿವೆ. ಮರಿಯಾಪೋಲ್‌ ಹಾಗೂ ವೊಲ್ನೊವಖಾ ನಗರಗಳಲ್ಲಿ ರಷ್ಯಾ ಶನಿವಾರ ತಾತ್ಕಾಲಿಕವಾಗಿ ಕದನ ವಿರಾಮ ಘೋಷಿಸಿತ್ತು. ಆದರೆ, ‘‘ಜನರ ತೆರವು ಕಾರ್ಯಾಚರಣೆಯಲ್ಲಿ ತೊಡಗಿರುವವರ ಮೇಲೆಯೇ ದಾಳಿ ಮಾಡಿದ ಕಾರಣ ತೆರವು ಸ್ಥಗಿತಗೊಳಿಸಲಾಗಿದೆ,’’ ಎಂದು ಉಕ್ರೇನ್‌ ಅಸಮಾಧಾನ ವ್ಯಕ್ತಪಡಿಸಿದೆ. ಉಕ್ರೇನ್‌ ಸೇನೆ, ಶಸ್ತ್ರಾಸ್ತ್ರ ನಾಶ ಸರಕಾರಿ ಕಚೇರಿ, ಬಂದರು, ಪರಮಾಣು ಘಟಕ, ವಸತಿ ಸಮುಚ್ಚಯಗಳ ಮೇಲೆ ದಾಳಿ ಮಾಡುತ್ತಿರುವ ರಷ್ಯಾ ಪಡೆಗಳು ಈಗಾಗಲೇ ಉಕ್ರೇನ್‌ ಸೇನೆಯ ಬಹುತೇಕ ಶಸ್ತ್ರಾಸ್ತ್ರಗಳನ್ನು ನಾಶಪಡಿಸಿವೆ ಎಂದು ಅಧ್ಯಕ್ಷ ವ್ಲಾಡಿಮಿರ್‌ ಪುಟಿನ್ ಹೇಳಿದ್ದಾರೆ. ಆ ಮೂಲಕ ಇಡೀ ದೇಶದಲ್ಲಿನ ಶಸ್ತ್ರಾಸ್ತ್ರ ನಾಶಪಡಿಸುವುದೇ ತಮ್ಮ ಗುರಿ ಎಂಬುದನ್ನು ಪರೋಕ್ಷವಾಗಿ ತಿಳಿಸಿದ್ದಾರೆ. ‘‘ಉಕ್ರೇನ್‌ ಸೇನೆಯ ಎಲ್ಲ ಯುದ್ಧ ಟ್ಯಾಂಕ್‌, ಹೆಲಿಕಾಪ್ಟರ್‌ ಸೇರಿ ಸಕಲ ರೀತಿಯ ಶಸ್ತ್ರಾಸ್ತ್ರಗಳನ್ನು ಧ್ವಂಸಗೊಳಿಸುವಲ್ಲಿ ನಮ್ಮ ಯೋಧರು ಬಹುತೇಕ ಯಶಸ್ವಿಯಾಗಿದ್ದಾರೆ,’’ ಎಂಬುದಾಗಿ ಬ್ಲಾಡಿಮಿರ್ ಪುಟಿನ್ ಹೇಳಿದ್ದಾರೆ ಎಂದು ರಷ್ಯಾದ ಮಾಧ್ಯಮಗಳೇ ವರದಿ ಮಾಡಿವೆ. ಜಾಗತಿಕ ಶಾಂತಿ ಮೇಲೆ ರಷ್ಯಾ ದಾಳಿ: ಬೈಡನ್ ಉಕ್ರೇನ್‌ ಮೇಲೆ ರಷ್ಯಾ ಮಾಡಿರುವ ಸೇನಾ ದಾಳಿಯನ್ನು ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಮತ್ತೆ ಖಂಡಿಸಿದ್ದು, ‘‘ರಷ್ಯಾ ಕೇವಲ ಉಕ್ರೇನ್‌ ಮೇಲೆ ಅಲ್ಲ, ಯುರೋಪ್‌ ಭದ್ರತೆ ಹಾಗೂ ಜಾಗತಿಕ ಶಾಂತಿಯ ಮೇಲೆಯೇ ದಾಳಿ ಮಾಡಿದೆ,’’ ಎಂದು ಹೇಳಿದ್ದಾರೆ. ಶ್ವೇತಭವನದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘‘ಪೂರ್ವ ಯುರೋಪ್‌ನ ದೇಶದ ಮೇಲೆ ಪುಟಿನ್ ಪಡೆಗಳು ದಾಳಿ ಮಾಡಿದ್ದು, ನ್ಯಾಟೋ ಸದಸ್ಯ ರಾಷ್ಟ್ರಗಳ ಸುರಕ್ಷತೆಗೆ ಅಮೆರಿಕ ಬದ್ಧವಾಗಿದೆ. ಇದಕ್ಕಾಗಿ ಹಲವು ರಾಷ್ಟ್ರಗಳ ಜತೆ ನಿರಂತರವಾಗಿ ಚರ್ಚಿಸಲಾಗುತ್ತಿದೆ,’’ ಎಂದು ತಿಳಿಸಿದ್ದಾರೆ. ಪೋಲೆಂಡ್‌ಗೆ ಕಮಲಾ ಭೇಟಿ ಉಕ್ರೇನ್‌ನಲ್ಲಿ ರಷ್ಯಾದ ಸೇನೆಯು ದಾಳಿ ತೀವ್ರಗೊಳಿಸಿರುವ ಬೆನ್ನಲ್ಲಿಯೇ ಅಮೆರಿಕ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್‌ ಅವರು ಮುಂದಿನ ವಾರ ಉಕ್ರೇನ್‌ ಗಡಿ ರಾಷ್ಟ್ರಗಳಾದ ಪೋಲೆಂಡ್‌ ಹಾಗೂ ರೊಮೇನಿಯಾಗೆ ಭೇಟಿ ನೀಡಲಿದ್ದಾರೆ. ‘‘ರಷ್ಯಾ ಆಕ್ರಮಣದ ವಿರುದ್ಧ ಅಭಿಪ್ರಾಯ ಮೂಡಿಸಲು ಹಾಗೂ ನ್ಯಾಟೋ ಸದಸ್ಯ ರಾಷ್ಟ್ರಗಳಲ್ಲಿ ಒಗ್ಗಟ್ಟು ಮೂಡಿಸುವ ದಿಸೆಯಲ್ಲಿ ಕಮಲಾ ಹ್ಯಾರಿಸ್‌ ಅವರು ಭೇಟಿ ನೀಡಲಿದ್ದಾರೆ,’’ ಎಂದು ಹ್ಯಾರಿಸ್‌ ಉಪ ಮಾಧ್ಯಮ ಕಾರ್ಯದರ್ಶಿ ಸಬ್ರಿನಾ ಸಿಂಗ್‌ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/5SCrGin
