ತಿರುಪೂರು (ತಮಿಳುನಾಡು): ತಿರುಪೂರಿನ ಗ್ರಾಮೀಣ ಪೊಲೀಸರು ರವಾನೆ ಮಾಡಿರುವ ನೊಟೀಸ್ ಒಂದು ಇದೀಗ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಕಾರು ಚಾಲಕನಿಗೆ ನೊಟೀಸ್ ಕಳಿಸಿರುವ ಪೊಲೀಸರು, ಕಾರು ಚಲಾಯಿಸುವಾಗ ಹೆಲ್ಮೆಟ್ ಧರಿಸದ ಕಾರಣ 100 ರೂ. ಕಟ್ಟುವಂತೆ ಆದೇಶಿಸಿದ್ದಾರೆ. ತಿರುಪೂರು ನಿವಾಸಿ 41 ವರ್ಷ ವಯಸ್ಸಿನ ಎಂ. ಸೆಲ್ವಕುಮಾರ್ ಅವರ ಮೊಬೈಲ್ ಗೆ ಪೊಲೀಸರ ಎಸ್ಎಂಎಸ್ ಬಂದಿದ್ದು, ಅದರಲ್ಲಿ ಕಾರ್ ನ ನೋಂದಣಿ ಸಂಖ್ಯೆ, ವಿಳಾಸ ಎಲ್ಲವೂ ಇದೆ. ಆದ್ರೆ, ಪೊಲೀಸರು ಹೇಳಿರುವಂತೆ ಆ ಸಂದರ್ಭದಲ್ಲಿ ತಾವು ಧರ್ಮಪುರಂಗೆ ಪ್ರಯಾಣವನ್ನೇ ಬೆಳೆಸಿರಲಿಲ್ಲ ಎಂದು ಸೆಲ್ವಕುಮಾರ್ ಹೇಳುತ್ತಾರೆ. ತಾವು ಯಾವಾಗಲೂ ಸೀಟ್ ಬೆಲ್ಟ್ ಧರಿಸಿಯೇ ವಾಹನ ಚಾಲನೆ ಮಾಡೋದಾಗಿ ಸೆಲ್ವಕುಮಾರ್ ಸಮರ್ಥಿಸಿಕೊಂಡ್ರು. ಮೋಟಾರು ವಾಹನ ಕಾಯ್ದೆ 1988ರ ಸೆಕ್ಷನ್ 129ರ ಅಡಿ ಸೆಲ್ವಕುಮಾರ್ ವಿರುದ್ಧ ಪ್ರಕರಣ ದಾಖಲಾಗಿದ್ದು, 100 ರೂ. ದಂಡ ವಿಧಿಸಲಾಗಿದೆ. ರಸ್ತೆ ಸಾರಿಗೆ ಸಚಿವಾಲಯದ ವೆಬ್ ಸೈಟ್ ಮೂಲಕ ಪೊಲೀಸರ ಇ-ಚಲನ್ ಕೂಡಾ ಸಿದ್ದಗೊಂಡಿದೆ. ಇತ್ತೀಚೆಗಷ್ಟೇ ಇ ಚಲನ್ ವ್ಯವಸ್ಥೆಯನ್ನು ತಮಿಳುನಾಡಿನ ನಗರ ಹಾಗೂ ಗ್ರಾಮೀಣ ಭಾಗದಲ್ಲಿ ಪರಿಚಯಿಸಲಾಗಿದೆ. ಬಿಲ್ಲಿಂಗ್ ಉಪಕರಣಕ್ಕೆ ಕ್ಯಾಮರಾ ಅಳವಡಿಸಲಾಗಿರುತ್ತೆ. ಸಂಬಂಧಪಟ್ಟ ವಾಹನದ ಚಿತ್ರ ಕ್ಯಾಮರಾದಲ್ಲಿ ಮೂಡಿದ ಕೂಡಲೇ ತಾನೇ ತಾನಾಗಿ ಇ-ಚಲನ್ ಸಿದ್ಧವಾಗುತ್ತೆ ಹಾಗೂ ವಾಹನ ಮಾಲೀಕರ ಮೊಬೈಲ್ ಗೆ ಎಸ್ಎಂಎಸ್ ರವಾನೆಯಾಗುತ್ತೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಇಲಾಖೆ ನಾವು ಪ್ರಕರಣ ಸಂಬಂಧ ವಿಚಾರಣೆ, ತನಿಖೆ ನಡೆಸಿದ್ದೇವೆ, ಇದು ಕೇವಲ ತಾಂತ್ರಿಕ ದೋಷ ಎಂದು ಹೇಳಿ ಕೈತೊಳೆದುಕೊಂಡಿದೆ.
from India & World News in Kannada | VK Polls https://ift.tt/30S7REc
