ಹೊಸದಿಲ್ಲಿ: ಭಾರತ ತಂಡ ತವರು ನೆಲದಲ್ಲಿ ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧ 3 ಟೆಸ್ಟ್ಗಳ ಸರಣಿಯನ್ನಾಡಲು ಸಜ್ಜಾಗುತ್ತಿದೆ. ಆದರೆ, ಸರಣಿ ಆರಂಭಕ್ಕೂ ಮೊದಲೇ ಪ್ರಮುಖ ವೇಗದ ಬೌಲರ್ ಗಾಯದ ಸಮಸ್ಯೆ ಕಾರಣ ಸರಣಿಯಿಂದ ಹೊರಗುಳಿಯುವಂತಾದ ಸುದ್ದಿ ಬರ ಸಿಡಿಲಿನಂತೆ ಅಬ್ಬರಿಸಿತ್ತು. ಆಟಗಾರರ ಸಾಮಾನ್ಯ ತಪಾಸಣೆ ವೇಳೆ ಬುಮ್ರಾ ಅವರ ಬೆನ್ನಿನ ಕೆಳ ಭಾಗದಲ್ಲಿ ಸ್ಟ್ರೆಸ್ ಫ್ರ್ಯಾಕ್ಚರ್ ಆಗಿರುವುದು ಬೆಳಕಿಗೆ ಬಂದಿತ್ತು. ಅಂದಹಾಗೆ ಬುಮ್ರಾ ಅವರ ಈ ಗಾಯದ ಸಮಸ್ಯೆಗೂ ಅವರ ವಿಭಿನ್ನ ಬೌಲಿಂಗ್ ಶೈಲಿಗೂ ಯಾವುದೇ ರೀತಿಯ ಸಂಬಂಧವಿಲ್ಲ ಎಂದು ಟೀಮ್ ಇಂಡಿಯಾದ ಮಾಜಿ ವೇಗದ ಬೌಲರ್ ಸ್ಪಷ್ಟಪಡಿಸಿದ್ದಾರೆ. ಬುಮ್ರಾ ಕೊಂಚ ಗಂಭೀರವಾಗಿರುವ ಕಾರಣ ಕನಿಷ್ಠ ಎರಡು ತಿಂಗಳ ವಿಶ್ರಾಂತಿ ಪಡೆಯಲಿದ್ದಾರೆ. ಇದರೊಂದಿಗೆ 2019ರಲ್ಲಿ ನಡೆಯಲಿರುವ ಎಲ್ಲಾ ಟೆಸ್ಟ್ ಸರಣಿಗಳಿಂದಲೂ ಬುಮ್ರಾ ಹೊರಗುಳಿಯುವಂತಾಗಿದೆ. ಆದರೂ, ವೆಸ್ಟ್ ಇಂಡೀಸ್ ವಿರುದ್ಧದ ಟಿ20 ಕ್ರಿಕೆಟ್ ಸರಣಿ ಹೊತ್ತಿಗೆ ಬುಮ್ರಾ ತಂಡಕ್ಕೆ ಮರಳುವ ಸಾಧ್ಯತೆ ಇದೆ. "ಬೌಲಿಂಗ್ ಶೈಲಿಗೂ ಸ್ಟ್ರೆಸ್ ಫ್ರ್ಯಾಕ್ಚರ್ಗೂ ಯಾವುದೇ ರೀತಿಯ ಸಂಬಂಧವಿಲ್ಲ. ಇದನ್ನು ಮೊದಲಿಗೆ ಅರ್ಥ ಮಾಡಿಕೊಳ್ಳಬೇಕು. ಈ ಸಲುವಾಗಿ ಅವರು ತಮ್ಮ ಬೌಲಿಂಗ್ ಶೈಲಿಯನ್ನು ಬದಲಾಯಿಸಿಕೊಳ್ಳುವ ಅಗತ್ಯವೇ ಇಲ್ಲ. ಅವರು ಈ ರೀತಿ ಮಾಡಿದ್ದೇ ಆದರೆ ಅವರಿಗೇ ನಷ್ಟವಾಗುತ್ತದೆ. ಅವರು ಗಾಯದ ಸಮಸ್ಯೆಯಿಂದ ಹೊರ ಬಂದ ಬಳಿಕವೂ ತಮ್ಮ ಎಂದಿನ ಶೈಲಿಯಲ್ಲೇ ಭರ್ಜರಿ ವೇಗದೊಂದಿಗೆ ಬೌಲಿಂಗ್ ಮುಂದುವರಿಸುತ್ತಾರೆ ಎಂದು ಭರವಸೆ ನೀಡಬಲ್ಲೆ," ಎಂದು ಬುಮ್ರಾ ಗಾಯದ ಸಮಸ್ಯೆ ಕುರಿತಾಗಿ ನೆಹ್ರಾ ಮಾತನಾಡಿದ್ದಾರೆ. "ಅವರ ಬೌಲಿಂಗ್ ಶೈಲಿ ವಿಭಿನ್ನವಾಗಿದೆ. ಆದರೆ, ಚೆಂಡನ್ನು ಎಸೆಯುವ ಸಂದರ್ಭದಲ್ಲಿ ಅವರ ದೇಹದ ವಿನ್ಯಾಸ ಅತ್ಯುತ್ತಮ ರೀತಿಯಲ್ಲಿದೆ. ಜಾವೆಲಿನ್ ಎಸೆತಗಾರನಂತಿರುವ ಲಸಿತ್ ಮಾಲಿಂಗ ಅವರ ಶೈಲಿಗಿಂತಲೂ ಬುಮ್ರಾ ಶೈಲಿ 10 ಪಟ್ಟು ಉತ್ತಮವಾಗಿದೆ.. ಇನ್ನು ಸ್ಟ್ರೆಸ್ ಫ್ರ್ಯಾಕ್ಚರ್ ಕುರಿತಾಗಿ ಮಾತನಾಡುವುದಾದರೆ ಇಂತಿಷ್ಟೇ ಅವಧಿಯಲ್ಲಿ ಅದು ಗುಣವಾಗುತ್ತದೆ ಎಂದು ಹೇಳಲಾಗದು. ಇನ್ನೆರಡು ತಿಂಗಳಲ್ಲಿ ಜಸ್ಪ್ರೀತ್ ಉತ್ತಮ ಅನುಭವ ಪಡೆಯಬಹುದು. ಅಥವಾ ಇನ್ನು 6 ತಿಂಗಳಾದರೂ ನೋವು ಉಳಿಯಬಹುದು. ಅಂದಹಾಗೆ ತಾನು ಶೇ.100ರಷ್ಟು ಸಜ್ಜಾಗಿದ್ದೇನೆ ಎಂಬುದು ಬೌಲರ್ಗಷ್ಟೇ ತಿಳಿಯುತ್ತದೆ," ಎಂದು ವಿವರಿಸಿದ್ದಾರೆ. ಈ ಈತಿಯ ಬೆನ್ನು ನೋವಿನ ಸಮಸ್ಯೆಗೆ ಯಾವುದೇ ರೀತಿಯ ಶಸ್ತ್ರಚಿಕಿತ್ಸೆ ನೀಡಲಾಗುವುದಿಲ್ಲ. ಹೀಗಾಗಿ ಪುನಶ್ಚೇತನ ಚಟುವಟಿಕೆಯಲ್ಲಿ ಪಾಲ್ಗೊಳ್ಳುವುದು ಇಲ್ಲಿ ಅತ್ಯಂತ ಪ್ರಮುಖವಾಗುತ್ತದೆ ಎಂದು ನೆಹ್ರಾ ಹೇಳಿದ್ದಾರೆ. "ಸ್ಟ್ರೆಸ್ ಫ್ರ್ಯಾಕ್ಚರ್ಗೆ ಇಂಥದ್ದೇ ಔಷಧವೆಂದು ಇಲ್ಲ. ವಿಶ್ರಾಂತಿ ಮತ್ತು ಪುನಶ್ಚೇತನವೇ ಇದಕ್ಕೆ ಮದ್ದು," ಎಂದಿದ್ದಾರೆ. "ವಿಶ್ವಕಪ್ ಬಳಿಕ ಬುಮ್ರಾ ವಿಶ್ರಾಂತಿ ಪಡೆದಿದ್ದಾರೆ. ವೆಸ್ಟ್ ಇಂಡೀಸ್ ಪ್ರವಾಸದಲ್ಲಿ ವೈಟ್ಬಾಲ್ ಕ್ರಿಕೆಟ್ನಿಂದ ದೂರ ಉಳಿದು ಟೆಸ್ಟ್ ಕ್ರಿಕೆಟ್ಗೆ ಮರಳಿದ್ದರು. ಇದರರ್ಥ ಅವರ ಮೇಲಿನ ಹೊರೆಯನ್ನು ಸರಿಯಾದ ರೀತಿಯಲ್ಲಿ ನಿರ್ವಹಿಸಲಾಗುತ್ತಿದೆ. ಆದರೂ ಈ ರೀತಿಯ ಸಮಸ್ಯೆ ಎದುರಾಗಿದೆ. ಇದಕ್ಕೆ ಕಾರಣ ಏನೆಂದು ವಿವರಿಸಲು ಸಾಧ್ಯವೇ?," ಎಂದು ನೆಹ್ರಾ ಪ್ರಶ್ನಿಸಿದ್ದಾರೆ. "ಸ್ಕ್ಯಾನ್ಗಳಿಗೆ ಆಟಗಾರರನ್ನು ಒಳಪಡಿಸಲಾಗಿರಲಿಲ್ಲವೆ? ಏಕೆಂದರೆ ಆಟಗಾರರಿಗೆ ಆರಂಭದಲ್ಲಿ ಈ ರೀತಿಯ ಗಾಯದ ಸಮಸ್ಯೆ ಅರಿವಿಗೆ ಬಂದಿರುವುದಿಲ್ಲ. ಮೂಳೆಗಳ ಸ್ಕ್ಯಾನ್ ಮಾಡಿದ ಬಳಿಕವಷ್ಟೇ ಅದನ್ನು ಪತ್ತೆ ಮಾಡಲು ಸಾಧ್ಯವಾಗುತ್ತದೆ. ಕೇವಲ ಎಂಆರ್ಐನಿಂದ ಇದು ಸಾಧ್ಯವಿಲ್ಲ. ವೇಗದ ಬೌಲಿಂಗ್ ಅತ್ಯಂತ ದಣಿವಿನ ಕೆಲಸ. ಹೀಗಾಗಿ ವೇಗಿಗಳ ಮೂಳೆಗಳ ಸ್ಕ್ಯಾನ್ ಮಾಡಿಸಿದರೆ ಎಲ್ಲಿ ಗಾಯದ ಸಮಸ್ಯೆ ಉದ್ಭವಿಸುತ್ತಿದೆ ಎಂಬುದನ್ನು ಪತ್ತೆ ಮಾಡಬಹುದು. ಅಂತಹ ಸಂದರ್ಭದಲ್ಲಿ ವಿಶ್ರಾಂತಿ ತೆಗೆದುಕೊಂಡು ಗಾಯದ ಸಮಸ್ಯೆ ನಿರ್ವಹಿಸುವ ಅಗತ್ಯವಿರುತ್ತದೆ," ಎಂದು ವಿವರಣೆ ನೀಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2m3RXaB