ಪಂಚಕುಲ (ಹರಿಯಾಣ): ಹೈಸ್ಕೋರಿಂಗ್‌ನಿಂದ ಕೂಡಿದ್ದ ಹೈ ವೋಲ್ಟೇಜ್‌ ಕದನದಲ್ಲಿ ಯುವ ರೇಡರ್‌ ನವೀನ್‌ ಕುಮಾರ್‌ ನೀಡಿದ ಭರ್ಜರಿ ಪ್ರದರ್ಶನದ ಬಲಿಂದ ಅಬ್ಬರಿಸಿದ ತಂಡ ಅಪಾಯಕಾರಿ ಪಡೆಯನ್ನು ಬಗ್ಗುಬಡಿದು ಸೀಸನ್‌ 7ರಲ್ಲಿನ ತನ್ನ ಅಗ್ರಸ್ಥಾನವನ್ನು ಮತ್ತಷ್ಟು ಬಲಪಡಿಸಿಕೊಂಡಿತು. ಇಲ್ಲಿನ ತಾವ್‌ ದೇವಿ ಲಾಲ್‌ ಕ್ರೀಡಾ ಸಂಕೀರ್ಣದಲ್ಲಿ ಭಾನುವಾರ ನಡೆದ ಪಂದ್ಯದಲ್ಲಿ ಅಂಕಪಟ್ಟಿಯ ಅಗ್ರಸ್ಥಾನಿ ದಬಾಂಗ್‌ ಡೆಲ್ಲಿ ತಂಡ 60-40 ಅಂಕಗಳಿಂದ ಪಲ್ಟನ್‌ ಪಡೆಯನ್ನು ಪಲ್ಟಿ ಹೊಡೆಯುವಂತೆ ಮಾಡಿತು. ಈಗಾಗಲೇ ರಲ್ಲಿ ನಾಕ್‌ಔಟ್‌ ಹಂತಕ್ಕೆ ಅರ್ಹತೆ ಪಡೆದುಕೊಂಡಿರುವ ಡೆಲ್ಲಿ ತಂಡ, ಈ ಜಯದೊಂದಿಗೆ ಆಡಿದ 19 ಪಂದ್ಯಗಳಿಂದ 15 ಗೆಲುವು ತಲಾ 2 ಡ್ರಾ ಮತ್ತು ಸೋಲಿನೊಂದಿಗೆ 82 ಅಂಕಗಳನ್ನು ದಾಖಲಿಸಿದೆ. ಪಂದ್ಯದಲ್ಲಿ ಮಿಂಚಿನ ದಾಳಿಗಳೊಂದಿಗೆ ಕಂಗೊಳಿಸಿದ ಯುವ ರೇಡರ್‌ ನವೀನ್‌ ಕುಮಾರ್‌, 15 ಟಚ್‌ ಮತ್ತು 4 ಬೋನಸ್‌ ಅಂಕಗಳೊಂದಿಗೆ ಒಟ್ಟು 19 ಅಂಕಗಳನ್ನು ಗಳಿಸುವ ಮೂಲಕ ತಂಡದ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದರು. ಅವರಿಗೆ ಉತ್ತಮ ಸಾಥ್‌ ನೀಡಿದ ಮತ್ತೊಬ್ಬ ರೇಡರ್‌ ಚಂದ್ರನ್‌ ರಂಜಿತ್‌ 12 ಅಂಕಗಳ ಅತ್ಯಮೂಲ್ಯ ಕೊಡುಗೆ ನೀಡಿದರು. ಡಿಫೆನ್ಸ್‌ ವಿಭಾಗದಲ್ಲೂ ಎದುರಾಳಿ ರೇಡರ್‌ಗಳ ಪ್ರಯತ್ನವನ್ನು ವಿಫಲವನ್ನಾಗಿಸಿದ ಅನುಭವಿ ಡಿಫೆಂಡರ್‌ ರವೀಂದ್ರ ಪಹಲ್‌ 6 ಅಂಕಗಳನ್ನು ಗಳಿಸಿದರೆ, ಅವರಿಗೆ ಅಮಿತ್‌ ಕುಮಾರ್‌ (3 ಅಂಕ) ಅವರಿಂದ ಉತ್ತಮ ಜೊತೆಗಾರಿಕೆ ಲಭ್ಯವಾಯಿತು. ದಬಾಂಗ್‌ ತನ್ನ ಮುಂದಿನ ಪಂದ್ಯದಲ್ಲಿ ಬೆಂಗಾಲ್‌ ವಾರಿಯರ್ಸ್‌ ವಿರುದ್ಧ ಸೆಣಸಲಿದೆ. ಮತ್ತೊಂದೆಡೆ ಸ್ಟಾರ್‌ ಆಟಗಾರರನ್ನೇ ಹೊಂದಿರುವ ಪುಣೇರಿ ಪಲ್ಟನ್‌ ತಂಡ ನಿರೀಕ್ಷಿತ ಪ್ರದರ್ಶನ ನೀಡುವಲ್ಲಿ ವಿಫಲವಾಗುತ್ತಿದ್ದು, ಸ್ಥಿರ ಪ್ರದರ್ಶನದ ಕೊರತೆಯಿಂದಾಗಿ ನಾಕ್‌ಔಟ್‌ ರೇಸ್‌ನಿಂದ ಬಹುತೇಕ ಹೊರಬಿದ್ದಾಗಿದೆ. ಆಡಿದ 20 ಪಂದ್ಯಗಳಲ್ಲಿ 11 ಸೋಲು, 6 ಗೆಲುವು ಮತ್ತು 3 ಸೋಲಿನೊಂದಿಗೆ 42 ಅಂಕಗಳನ್ನು ಗಳಿಸಿದ್ದು ಅಂಕಪಟ್ಟಿಯಲ್ಲಿ 9ನೇ ಸ್ಥಾನದಲ್ಲಿದೆ. ಇನ್ನು ಪಂದ್ಯದಲ್ಲಿ ರೇಡರ್‌ಗಳಾದ ನಿತಿನ್‌ ಥೋಮರ್‌ (7) ಮತ್ತು ಮಂಜೀತ್‌ (5) ಹೆಚ್ಚೇನು ಗಮನ ಸೆಳೆಯದ ಪರಿಣಾಮ ತಂಡ ಸೋಲಿನ ಸುಳಿಯಲ್ಲಿ ಮುಳುಗುವಂತಾಯಿತು. ಆದರೆ, ಡಿಫೆನ್ಸ್‌ ವಿಭಾಗದಲ್ಲಿ ಬಾಲಾಸಾಹೇಬ್‌ ಜಾಧವ್‌ 6 ಅಂಕಗಳನ್ನು ಗಳಿಸುವ ಮೂಲಕ ಗಮನ ಸೆಳೆಯಲಷ್ಟೇ ಶಕ್ತರಾದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2nKqg6X
