ಹೊಸದಿಲ್ಲಿ: ನಾಯಕ ಯಶಸ್ಸಿನ ಅಲೆಯಲ್ಲಿ ತೇಲುತ್ತಿದ್ದಾರೆ. ಸೀಮಿತ ಓವರ್‌ಗಳ ಕ್ಯಾಪ್ಟನ್‌ ಆದ ಮೇಲೆ ಟೆಸ್ಟ್‌ ತಂಡದ ನಾಯಕತ್ವವೂ ರೋಹಿತ್ ಅವರನ್ನೇ ಹುಡುಕಿಕೊಂಡು ಬಂದಿದೆ. ಇದೀಗ ತಾಯ್ನಾಡಿನಲ್ಲಿ ಸತತ ನಾಲ್ಕು ಸರಣಿ ಗೆದ್ದುಕೊಟ್ಟು (3 ಟಿ20 ಸರಣಿ, 1 ಒಡಿಐ ಸರಣಿ) ತಮ್ಮ ಕ್ಯಾಪ್ಟನ್ಸಿ ಖದರ್‌ ತೋರಿಸಿಕೊಟ್ಟಿದ್ದಾರೆ. ಐಪಿಎಲ್ 2022 ಟೂರ್ನಿ ಸಲುವಾಗಿ ಮುಂಬೈ ಇಂಡಿಯನ್ಸ್‌ ತಂಡ ತನ್ನ ಕ್ಯಾಪ್ಟನ್‌ ರೋಹಿತ್ ಶರ್ಮಾ ಅವರನ್ನು ಬರೋಬ್ಬರಿ 16 ಕೋಟಿ ರೂ.ಗಳ ಭಾರಿ ಮೊತ್ತ ಕೊಟ್ಟು ಉಳಿಸಿಕೊಂಡಿದೆ. ಈಗ ಐಪಿಎಲ್ ಭರ್ಜರಿ ವೇತನ ಮತ್ತು ಟೀಮ್ ಇಂಡಿಯಾ ಕ್ಯಾಪ್ಟನ್ಸಿ ಯಶಸ್ಸಿನ ಸಂಭ್ರಮದಲ್ಲಿ ಇರುವ ಹಿಟ್‌ಮ್ಯಾನ್‌ ಖ್ಯಾತಿಯ ಆರಂಭಿಕ ಬ್ಯಾಟ್ಸ್‌ಮನ್‌ ತಮಗೆ ತಾವೇ ವಿಶೇಷ ಗಿಫ್ಟ್‌ ಒಂದನ್ನು ತಂದುಕೊಂಡಿದ್ದು, ಬರೋಬ್ಬರಿ 3.10 ಕೋಟಿ ರೂ. ಬೆಲೆ ಬಾಳುವ ಲ್ಯಾಂಬೋರ್ಗಿನಿ ಯುರಸ್‌ ಸೂಪರ್‌ ಕಾರ್‌ ಖರೀದಿ ಮಾಡಿದ್ದಾರೆ. 34 ವರ್ಷದ ಬಲಗೈ ಬ್ಯಾಟ್ಸ್‌ಮನ್‌ ಖರೀದಿ ಮಾಡಿರುವ ಐಶಾರಾಮಿ ಲ್ಯಾಂಬೋರ್ಗಿನಿ ಕಾರಿನ ಫೋಟೊಗಳು ಸೋಷಿಯಲ್‌ ಮೀಡಿಯಾಗಳಲ್ಲಿ ಕಿಚ್ಚು ಹಚ್ಚಿವೆ. ರೋಹಿತ್ ಸಲುವಾಗಿ ಈ ಕಾರಿನ ಒಳ ವಿನ್ಯಾಸವನ್ನು ನಿರ್ಮಾಣ ಮಾಡಲಾಗಿದೆ ಎಂದು ವರದಿಗಳು ಹೇಳಿವೆ. ನೀಲಿ ಬಣ್ಣದ ಮೆಟಾಲಿಕ್‌ ನೋಟ ಹೊಂದಿರುವ ಕಾರಿಗೆ 22 ಇಂಚಿನ ಡೈಮಂಡ್‌ ಕಟ್‌ ಅಲಾಯ್‌ ರಿಮ್‌ ಇದೆ. 4.0 ಲೀಟರ್‌ ಟ್ವಿನ್‌ ಟರ್ಬೊಚಾರ್ಜ್‌ ವಿ8 ಪೆಟ್ರೋಲ್‌ ಇಂಜಿನ್‌ ಇದ್ದು, 650 ಪಿಎಸ್‌ ಗರಿಷ್ಠ ಪವರ್‌ ಮತ್ತು 850 ಎನ್‌ಎಮ್‌ ಟಾರ್ಕ್‌ ನೀಡಬಲ್ಲ ಶಕ್ತಿಶಾಲಿ ಹೈಸ್ಪೀಡ್‌ ವಾಹನ ಇದಾಗಿದೆ. ಕ್ಷಣ ಮಾತ್ರದಲ್ಲಿ ಗಂಟೆಗೆ 200 ಕಿ.ಮೀ ವೇಗ ಪಡೆಯುವ ಸಾಮರ್ಥ್ಯ ಈ ಕಾರಿಗಿದೆ. ಈ ಸೂಪರ್‌ ಕಾರ್‌ನ ಕಾರ್‌ನ ಇಂಟೀರಿಯರ್‌ನಲ್ಲಿ ಕೆಂಪು ಬಣ್ಣದ ಲೆದರ್‌ ಬಳಕೆ ಮಾಡಲಾಗಿದೆ. ಅಂದಹಾಗೆ ರೋಹಿತ್ ಸೂಪರ್‌ ಕಾರ್‌ ಖರೀದಿ ಮಾಡಿರುವುದು ಇದೇ ಮೊದಲು ಎನ್ನಲಾಗಿದೆ. ಮಾರ್ಚ್‌ 4ರಿಂದ ಟೆಸ್ಟ್‌ ಸರಣಿ ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ತಾವು ಭಾರತ ತಂಡವನ್ನು ಮುನ್ನಡೆಸಿದ ಮೊದಲ ಸರಣಿಗಳನ್ನು ಗೆದ್ದುಕೊಟ್ಟಿರುವ ರೋಹಿತ್ ಶರ್ಮಾ ಈಗ ಟೆಸ್ಟ್‌ ತಂಡದ ನಾಯಕನಾಗಿ ಮೊದಲ ಸರಣಿಯನ್ನಾಡಲು ಸಜ್ಜಾಗುತ್ತಿದ್ದಾರೆ. ಐಸಿಸಿ ಟೆಸ್ಟ್‌ ವಿಶ್ವ ಚಾಂಪಿಯನ್‌ಷಿಪ್‌ ಭಾಗವಾಗಿ ಎದುರು 2 ಪಂದ್ಯಗಳ ಟೆಸ್ಟ್‌ ಸರಣಿ ನಡೆಯಲಿದ್ದು, ಮೊದಲ ಪಂದ್ಯ ಮೊಹಾಲಿಯಲ್ಲಿ ಮಾರ್ಚ್‌ 4ರಂದು ಆರಂಭವಾಗಲಿದೆ. ಅಂದಹಾಗೆ ಈ ಪಂದ್ಯ ಭಾರತ ತಂಡದ ಮಾಜಿ ನಾಯಕ ವಿರಾಟ್‌ ಕೊಹ್ಲಿ ಅವರ ವೃತ್ತಿಬದುಕಿನ 100ನೇ ಟೆಸ್ಟ್‌ ಪಂದ್ಯವಾಗಿದೆ. ಕಳೆದ ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿ ಭಾರತ ತಂಡ ಆತಿಥೇಯ ಹರಿರಣ ಪಡೆ ಎದುರು 1-2 ಅಂತರದಲ್ಲಿ ಟೆಸ್ಟ್‌ ಸರಣಿ ಸೋತ ಬೆನ್ನಲ್ಲೇ ಭಾರತ ಟೆಸ್ಟ್‌ ತಂಡದ ನಾಯಕತ್ವಕ್ಕೆ ವಿರಾಟ್‌ ಕೊಹ್ಲಿ ರಾಜೀನಾಮೆ ನೀಡಿದರು. ಪರಿಣಾಮ ಎಲ್ಲಾ ಮಾದರಿಯ ಕ್ರಿಕೆಟ್‌ಗೆ ರೋಹಿತ್ ಶರ್ಮಾ ಕ್ಯಾಪ್ಟನ್‌ ಆದರು. ಮಾರ್ಚ್‌ 26ರಿಂದ ಐಪಿಎಲ್ ಶುರು ಮುಂಬೈ ಇಂಡಿಯನ್ಸ್‌ ತಂಡಕ್ಕೆ ದಾಖಲೆಯ 5 ಟ್ರೋಫಿಗಳನ್ನು ಗೆದ್ದುಕೊಟ್ಟಿರುವ ರೋಹಿತ್ ಶರ್ಮಾ, ಐಪಿಎಲ್ 2022 ಟೂರ್ನಿಯಲ್ಲಿ 6ನೇ ಟ್ರೋಫಿ ಗೆಲುವಿನ ಕಡೆಗೆ ಕಣ್ಣಿಟ್ಟಿದ್ದಾರೆ. ಈ ಬಾರಿ ಮುಂಬೈನಲ್ಲೇ ಬರೋಬ್ಬರಿ 55 ಪಂದ್ಯಗಳು ನಡೆಯಲಿದ್ದು, ಮುಂಬೈ ತಂಡಕ್ಕೆ ತವರಿನ ಪ್ರೇಕ್ಷಕರ ಬೆಂಬಲ ಸಿಗಲಿದೆ. ಲೀಗ್‌ ಹಂತದ 70 ಪಂದ್ಯಗಳು ಮಹಾರಾಷ್ಟ್ರದಲ್ಲೇ ಆಯೋಜನೆ ಆಗಲಿದ್ದು, ಮುಂಬೈನ ಮೂರು ಕ್ರೀಡಾಂಗಣಗಲ್ಲಿ 55 ಪಂದ್ಯಗಳು ಮತ್ತು ಮಹಾರಾಷ್ಟ್ರದ ಎಂಸಿಎ ಕ್ರೀಡಾಂಗಣದಲ್ಲಿ 15 ಪಂದ್ಯಗಳು ಜರುಗಲಿವೆ. ಮಾರ್ಚ್‌ 26ರಿಂದ ಮೇ 29ರವರೆಗೆ ಟೂರ್ನಿ ನಡೆಯಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/5dNjmRs
