ಕಿಂಗ್‌ಸ್ಟನ್: ಭಾರತ ಕ್ರಿಕೆಟ್ ತಂಡದ ಬಲಗೈ ವೇಗದ ಬೌಲರ್ ಟೆಸ್ಟ್ ಕ್ರಿಕೆಟ್‌ನಲ್ಲಿ 150 ವಿಕೆಟುಗಳ ಸಾಧನೆ ಮಾಡಿದ್ದಾರೆ. ವೆಸ್ಟ್‌ಇಂಡೀಸ್ ವಿರುದ್ಧ ನಡೆಯುತ್ತಿರುವ ದ್ವಿತೀಯ ಟೆಸ್ಟ್ ಪಂದ್ಯದಲ್ಲಿ ಶಮಿ ಈ ಸ್ಮರಣೀಯ ದಾಖಲೆಯನ್ನು ಬರೆದಿದ್ದಾರೆ. ಈ ಮೂಲಕ ಜಹೀರ್ ಖಾನ್ ಹಾಗೂ ಇಶಾಂತ್ ಶರ್ಮಾ ದಾಖಲೆಯನ್ನು ಮುರಿದಿದ್ದಾರೆ. ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತಿ ವೇಗದಲ್ಲಿ 150 ವಿಕೆಟ್ ಕಬಳಿಸಿದ ಭಾರತೀಯ ಬೌಲರ್‌ಗಳ ಪಟ್ಟಿಯಲ್ಲಿ ಮೊಹಮ್ಮದ್ ಶಮಿ ಮೂರನೇ ಸ್ಥಾನದಲ್ಲಿ ಗುರುತಿಸಿಕೊಂಡಿದ್ದಾರೆ. ಈ ಪಟ್ಟಿಯನ್ನು ಮಾಜಿ ದಿಗ್ಗಜ ಕಪಿಲ್ ದೇವ್ ಮುನ್ನಡೆಸುತ್ತಿದ್ದಾರೆ. ಟೆಸ್ಟ್ ಕ್ರಿಕೆಟ್‌ನಲ್ಲಿ ಕಪಿಲ್ ದೇವ್ 39 ಪಂದ್ಯಗಳಲ್ಲೇ 150 ವಿಕೆಟ್ ಸಾಧನೆ ಮಾಡಿದ್ದರು. ದ್ವಿತೀಯ ಸ್ಥಾನದಲ್ಲಿರುವ ಮಾಜಿ ಕರ್ನಾಟಕದ ವೇಗಿ ಜಾವಗಲ್ ಶ್ರೀನಾಥ್ 40 ಪಂದ್ಯಗಳಲ್ಲಿ ಹಾಗೂ ಮೂರನೇ ಸ್ಥಾನದಲ್ಲಿರುವ ಮೊಹಮ್ಮದ್ ಶಮಿ 42 ಪಂದ್ಯಗಳಲ್ಲಿ ಈ ಸ್ಮರಣೀಯ ದಾಖಲೆಯನ್ನು ತಲುಪಿದ್ದಾರೆ. ವೆಸ್ಟ್ಇಂಡೀಸ್‌ನ ಡೆಬ್ಯು ಆಟಗಾರ ರಖೀಮ್ ಕಾರ್ನ್‌ವಾಲ್ ಭಾರತೀಯ ವೇಗಿ ಮೊಹಮ್ಮದ್ ಶಮಿಗೆ ಬಲಿಯಾದ 150ನೇ ಆಟಗಾರನಾಗಿದ್ದಾರೆ. ಅಂದ ಹಾಗೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ನಾಲ್ಕು ಬಾರಿ ಶಮಿ ಇನ್ನಿಂಗ್ಸ್‌ವೊಂದರಲ್ಲಿ ಐದು ವಿಕೆಟ್ ಸಾಧನೆ ಮಾಡಿದ್ದಾರೆ. ಜೀವನಶ್ರೇಷ್ಠ ಬೌಲಿಂಗ್ 6/56. ಟೆಸ್ಟ್‌ನಲ್ಲಿ ಭಾರತದ ಪರ ಅತಿ ವೇಗದಲ್ಲಿ 150 ವಿಕೆಟ್ ಸಾಧನೆ ಕಪಿಲ್ ದೇವ್ (39) ಜಾವಗಲ್ ಶ್ರೀನಾಥ್ (40) ಮೊಹಮ್ಮದ್ ಶಮಿ (42) ಜಹೀರ್ ಖಾನ್ (49) ಇಶಾಂತ್ ಶರ್ಮಾ (54)
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2lkfqU7
