ಕಿಂಗ್‌ಸ್ಟನ್: ಟೀಮ್ ಇಂಡಿಯಾ ನಾಯಕ ಡಿಆರ್‌ಎಸ್ ನಿಖರತೆ ಬಗ್ಗೆ ಎಲ್ಲೆಡೆಗಳಿಂದಲೂ ಟೀಕೆಗಳು ಕೇಳುತ್ತಾ ಬಂದಿದೆ. ಮಹೇಂದ್ರ ಸಿಂಗ್ ಧೋನಿಗೆ ಹೋಲಿಸಿದರೆ ತರಾತುರಿಯಲ್ಲಿ ಡಿಆರ್‌ಎಸ್ ಮನವಿಗೆ ಮೊರೆ ಹೋಗುವ ಮೂಲಕ ತಪ್ಪಾದ ನಿರ್ಧಾರ ಸ್ವೀಕರಿಸುತ್ತಾರೆ ಎಂಬ ಬಗ್ಗೆ ಅಪವಾದಗಳು ಕೇಳಿ ಬಂದಿದೆ. ಆದರೆ ಇದೀಗ ವೆಸ್ಟ್‌ಇಂಡೀಸ್ ವಿರುದ್ಧ ನಡೆಯುತ್ತಿರುವ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಅವರಿಗೆ ಸ್ಮರಣೀಯ ಹ್ಯಾಟ್ರಿಕ್ ಒದಗಿಸಲು ವಿರಾಟ್ ಕೊಹ್ಲಿ ಮಾಸ್ಟರ್ ಮೈಂಡ್ ವರ್ಕೌಟ್ ಆಗಿರುವುದು ಎಲ್ಲೆಡೆಗಳಿಂದಲೂ ಶ್ಲಾಘನೆಗೆ ಪಾತ್ರವಾಗಿದೆ. ವೆಸ್ಟ್‌ಇಂಡೀಸ್‌ನ ಇನ್ನಿಂಗ್ಸ್‌ನ ಎಂಟನೇ ಓವರ್‌ನ ಎರಡನೇ ಹಾಗೂ ಮೂರನೇ ಎಸೆತದಲ್ಲಿ ಅನುಕ್ರಮವಾಗಿ ಡ್ಯಾರೆನ್ ಬ್ರಾವೋ ಹಾಗೂ ಶಮರ್ ಬ್ರೂಕ್ಸ್ ಹೊರದಬ್ಬಿದ ಬುಮ್ರಾ ನಾಲ್ಕನೇ ಎಸೆತದಲ್ಲಿ ರೋಸ್ಟರ್ ಚೇಸ್‌ರನ್ನು ಎಲ್‌ಬಿಡಬ್ಲ್ಯು ಬಲೆಗೆ ಸಿಲುಕಿಸಿದರು. ಆದರೆ ಫೀಲ್ಡ್ ಅಂಪೈರ್ ಔಟ್ ನೀಡಿರಲಿಲ್ಲ. ಬುಮ್ರಾ ಕೂಡಾ ಹೆಚ್ಚಿನ ಉತ್ಸುಕತೆ ತೋರದೇ ರನ್ನಪ್‌ಗೆ ಮರಳುವ ಗೋಜಿನಲ್ಲಿದ್ದರು. ತಕ್ಷಣವೇ ಮಧ್ಯೆ ಪ್ರವೇಶಿಸಿದ ನಾಯಕ ವಿರಾಟ್ ಕೊಹ್ಲಿ ಸಹ ಆಟಗಾರರಲ್ಲಿ ಸಮಾಲೋಚಿಸಿ ತಾವೇ ಖುದ್ದಾಗಿ ಡಿಆರ್‌ಎಸ್ ಮೇಲ್ಮನವಿಗೆ ಮೊರೆ ಹೋದರು. ಆಗಲೇ ಕೊಹ್ಲಿ ಪರಿಪೂರ್ಣ ಆತ್ಮವಿಶ್ವಾಸದಿಂದಲೇ ಔಟ್ ಎಂಬ ಸನ್ನೆಯನ್ನು ಮಾಡಿದರು. ಬಳಿಕ ರಿಪ್ಲೇ ಪರಿಶೀಲಿಸಿದಾಗ ಚೆಂಡು ಮೊದಲು ಕಾಲಿಗೆ ಬಡಿದಿರುವುದು ಸ್ಪಷ್ಟವಾಗಿತ್ತು. ಪರಿಣಾಮ ಅಂಪೈರ್ ತಮ್ಮ ನಿರ್ಧಾರ ಬದಲಾಯಿಸಬೇಕಾಯಿತು. ಇದರಿಂದಾಗಿ ಬುಮ್ರಾ ಹ್ಯಾಟ್ರಿಕ್ ವಿಕೆಟ್ ಸಾಧನೆಯೊಂದಿಗೆ ಇತಿಹಾಸ ಪುಟ ಸೇರಿದರು. ಆಫ್ ಸ್ಪಿನ್ನರ್ ಹರ್ಭಜನ್ ಸಿಂಗ್ ಸಹ ಇದನ್ನೇ ಉಲ್ಲೇಖಿಸಿದ್ದು, ಜಸ್ಪ್ರೀತ್ ಬುಮ್ರಾ ಹ್ಯಾಟ್ರಿಕ್ ಶ್ರೇಯಸ್ಸು ನಾಯಕ ವಿರಾಟ್ ಕೊಹ್ಲಿ ಅವರಿಗೂ ಸಲ್ಲುತ್ತದೆ ಎಂದಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/30KdXGx
