ಚೆನ್ನೈ: ಒಂದು ಇಡ್ಲಿಗೆ ಕಡಿಮೆ ಎಂದರೆ 5 ರೂ.ಗೆ ಮಾರಾಟ ಮಾಡುವುದನ್ನು ಕೇಳಿರುತ್ತೀರಿ, ತಿಂದಿರುತ್ತೀರಿ. ಆದರೆ 80 ವರ್ಷದ ಅಜ್ಜಿ ಕಳೆದ 30 ವರ್ಷಗಳಿಂದ ಅತ್ಯಂತ ಕಡಿಮೆ ದರದಲ್ಲಿ ಇಡ್ಲಿಯನ್ನು ಗ್ರಾಹಕರಿಗೆ ಉಣಬಡಿಸುತ್ತಿದ್ದಾರೆ. ತಮಿಳುನಾಡಿನ ಕೊಯಮತ್ತೂರಿನ ವಡಿವೇಲಂಪಳಯಂನ ಕೆ ಕಮಲಥಲ್ ಬೆಲೆ ಏರಿಸಲು ಈಗಲೂ ಒಪ್ಪುತ್ತಿಲ್ಲ. ಕಳೆದ 10 ವರ್ಷದ ವರೆಗೆ ಒಂದು ಇಡ್ಲಿಗೆ ಕೇವಲ 50 ಪೈಸೆ ತೆಗೆದುಕೊಳ್ಳುತ್ತಿದ್ದರು. ಇದೀಗ 1 ರೂ.ಗೆ 1 ಇಡ್ಲಿ ನೀಡುತ್ತಿದ್ದಾರೆ. ಪ್ರತಿದಿನ ಸುಮಾರು 1,000 ಇಡ್ಲಿಯನ್ನು ಮಾರುತ್ತಿರುವ ಕಮಲಥಲ್ ಅವರ ಜೀವನೋತ್ಸಾಹ ಎಂತವರಿಗೂ ಸ್ಪೂರ್ತಿದಾಯಕವಾಗಿದೆ. ಸೂರ್ಯ ಹುಟ್ಟುವ ಮೊದಲೇ ಎದ್ದು ಸುಮಾರು 4 ಗಂಟೆ ಹಿಟ್ಟು ರುಬ್ಬಿ, ಇಡ್ಲಿ ತಯಾರಿಸಿ ಮಾರುವುದು ಕಮಲಥಲ್ ದೈನಂದಿನ ಕಾಯಕ. ಕೂಡುಕುಟುಂಬದಲ್ಲಿ ಬೆಳೆದ ಹಿನ್ನೆಲೆ ಹೆಚ್ಚು ಮಂದಿಗೆ ಅಡುಗೆ ಮಾಡಿದ ಅನುಭವವಿದೆ. ಇಡ್ಲಿ ತಯಾರಿಕೆ ವೇಳೆ ಬಹುತೇಕ ಹೆಚ್ಚಿನ ಕೆಲಸಗಳನ್ನು ಸ್ವತಂಃ ಕೈಯಿಂದಲೇ ಮಾಡುತ್ತಾರೆ. ವಡಿವೇಲಂಪಳಯಂನ ಹೆಚ್ಚಿನವರು ಬಡವರು ಮತ್ತು ಮಧ್ಯಮ ವರ್ಗದವರು ಎಂಬುದನ್ನು ಅರ್ಥೈಸಿಕೊಂಡಿರುವ ಕಮಲಥಲ್ ಅತ್ಯಂತ ಅಗ್ಗದಲ್ಲಿ ಉಪಹಾರ ನೀಡುತ್ತಿದ್ದಾರೆ. ರೂ. 15-20 ಕೊಟ್ಟು ಒಂದು ಪ್ಲೇಟ್ ಇಡ್ಲಿ ತಿನ್ನಲು ಕಷ್ಟವಿರುವ ಹೆಚ್ಚಿನ ಮಂದಿ ಅಜ್ಜಿಯ ಉಪಹಾರ ಗೃಹಕ್ಕೆ ಆಗಮಿಸುತ್ತಾರೆ. ಇಷ್ಟೊಂದು ಅಗ್ಗಕ್ಕೆ ಇಡ್ಲಿ ಮಾರಿದರೆ ಅಜ್ಜಿಗೆ ಲಾಭವಾಗುತ್ತಾ? ಸಾಧಾರಣವಾಗಿ ಆಗುತ್ತದೆ. ಆದರೆ ಅಜ್ಜಿಗೆ ಲಾಭಕ್ಕಿಂತಲೂ ಬಡವರಿಗೆ ಹೊಟ್ಟೆ ತುಂಬ ಆಹಾರ ನೀಡುವುದೇ ಗುರಿ. ಕೆಲವು ಹಿತೈಷಿಗಳು ಇಡ್ಲಿ ಬೆಲೆ ಹೆಚ್ಚಿಸುವಂತೆ ಹೇಳಿದರೂ ಒಪ್ಪದ ಕಮಲಥಲ್, ಬಡವರಿಗೆ ಮತ್ತು ಹಸಿದವರಿಗಾಗಿ ಇಡ್ಲಿ ಮಾರುತ್ತಿದ್ದೇನೆ ಎನ್ನುತ್ತಾರೆ. Input by EPS
from India & World News in Kannada | VK Polls https://ift.tt/2ZHyhqz
