ಬೆಂಗಳೂರು: ಸ್ಟಾರ್ ರೇಡರ್ ಪವನ್ ಶೆಹ್ರಾವತ್ ಅವರ ಏಕಾಂಗಿ ಹೋರಾಟದ ನೆರವಿನಿಂದ ಬೆಂಗಳೂರು ಬುಲ್ಸ್ ತಂಡ ಪ್ರೊ ಕಬಡ್ಡಿ ಲೀಗ್ನ 74ನೇ ಪಂದ್ಯದಲ್ಲಿ ಪಟನಾ ಪೈರೇಟ್ಸ್ ವಿರುದ್ಧ 40-39ರ ಅಂತರದಲ್ಲಿ ರೋಚಕ ಗೆಲುವು ದಾಖಲಿಸಿದೆ. ಬುಲ್ಸ್ ಪರ ಶ್ರೇಷ್ಠ ಪ್ರದರ್ಶನ ತೋರಿದ ಪವನ್ 17 ಅಂಕ ಕಲೆಹಾಕಿ ಗೆಲುವಿನ ರೂವಾರಿ ಎನಿಸಿಕೊಂಡರು. ಅಷ್ಟೇ ಯಾಕೆ ಪ್ರೊ ಕಬಡ್ಡಿ ಲೀಗ್ನಲ್ಲಿ ಒಟ್ಟಾರೆ 500 ರೇಡ್ ಅಂಕಗಳನ್ನು ಕಲೆ ಹಾಕುವ ಮೂಲಕ ಮೆಚ್ಚುಗೆಗೆ ಪಾತ್ರವಾಗಿದ್ದಾರೆ. ಹೊಸದಿಲ್ಲಿ ಮೂಲದ 23ರ ಹರೆಯದ ಪವನ್ ಸೆಹ್ರಾವತ್ ಆರನೇ ಆವೃತ್ತಿಯಲ್ಲಿ ಅತಿ ಬೆಲೆಬಾಳುವ ಆಟಗಾರನೆಂಬ ಹಿರಿಮೆಗೆ ಪಾತ್ರವಾಗಿದ್ದರು. ಕಳೆದ ಸಾಲಿನಲ್ಲಿ ಆಡಿರುವ 24 ಪಂದ್ಯಗಳಲ್ಲಿ 282 ಅಂಕಗಳನ್ನು ಕಲೆ ಹಾಕಿದ್ದರು. ಇದೀಗ ಈ ಸಾಲಿನಲ್ಲೂ ಮಿಂಚಿನ ಹೋರಾಟ ಮುಂದುವರಿಸಿರುವ ಪವನ್, 14 ಪಂದ್ಯಗಳಲ್ಲೇ 174 ಅಂಕಗಳನ್ನು ಪಡೆದಿದ್ದಾರೆ. ಅಷ್ಟೇ ಯಾಕೆ ಫೈನಲ್ ಪಂದ್ಯದಲ್ಲಿ 22 ಅಂಕಗಳನ್ನು ಬಾಚಿಕೊಳ್ಳುವ ಮೂಲಕ ಪ್ರೊ ಕಬಡ್ಡಿ ಲೀಗ್ ಉಪಾಂತ್ಯದ ಪಂದ್ಯದಲ್ಲಿ ಅತಿ ಹೆಚ್ಚು ಅಂಕಗಳನ್ನು ಪಡೆದ ದಾಖಲೆಗೆ ಪಾತ್ರವಾದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2NRmrI8
