ಕಿಂಗ್‌ಸ್ಟನ್: ಒಡ್ಡಿರುವ 468 ರನ್‌ಗಳ ಬೃಹತ್ ಗೆಲುವಿನ ಗುರಿ ಹಿಂಬಾಲಿಸುತ್ತಿರುವ ಆತಿಥೇಯ ವೆಸ್ಟ್‌ಇಂಡೀಸ್, ಇಲ್ಲಿ ನಡೆಯುತ್ತಿರುವ ದ್ವಿತೀಯ ಹಾಗೂ ಅಂತಿಮ ಟೆಸ್ಟ್ ಪಂದ್ಯದ ಮೂರನೇ ದಿನದಂತ್ಯಕ್ಕೆ 13 ಓವರ್‌ಗಳಲ್ಲಿ ಎರಡು ವಿಕೆಟ್ ನಷ್ಟಕ್ಕೆ 45 ರನ್ ಗಳಿಸಿದೆ. ಇನ್ನು ಎಂಟು ವಿಕೆಟ್ ಮಾತ್ರ ಬಾಕಿ ಉಳಿದಿರುವಂತೆಯೇ ಗೆಲುವಿಗಾಗಿ 423 ರನ್ ಗಳಿಸಬೇಕಿದೆ. ಈಗಾಗಲೇ ಆರಂಭಿಕರಾದ ಜಾನ್ ಕ್ಯಾಂಬೆಲ್ (16) ಹಾಗೂ ಕ್ರೇಗ್ ಬ್ರಾತ್‌ವೇಟ್ (3) ವಿಕೆಟುಗಳು ನಷ್ಟವಾಗಿದ್ದು ಡ್ಯಾರೆನ್ ಬ್ರಾವೋ (18*) ಹಾಗೂ ಶಮರ್ ಬ್ರೂಕ್ಸ್ (4*) ನಾಲ್ಕನೇ ದಿನದಾಟಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ. ಈ ಎರಡು ವಿಕೆಟುಗಳನ್ನು ಮೊಹಮ್ಮದ್ ಶಮಿ ಹಾಗೂ ಇಶಾಂತ್ ಶರ್ಮಾ ಹಂಚಿಕೊಂಡರು. ಈ ಮೊದಲು ವಿಂಡೀಸ್‌ಗೆ ಫಾಲೋಆನ್ ಹೇರದೆ 299 ರನ್‌ಗಳ ಬೃಹತ್ ಮುನ್ನಡೆಯೊಂದಿಗೆ ದ್ವಿತೀಯ ಇನ್ನಿಂಗ್ಸ್ ಬ್ಯಾಟಿಂಗ್ ಮುಂದುವರಿಸಿದ ಭಾರತ, ಉಪನಾಯಕ ಅಜಿಂಕ್ಯ ರಹಾನೆ (64*) ಹಾಗೂ ಹನುಮ ವಿಹಾರಿ (53*) ಅಜೇಯ ಅರ್ಧಶತಕಗಳ ನೆರವಿನಿಂದ 54.4 ಓವರ್‌ಗಳಲ್ಲಿ ನಾಲ್ಕು ವಿಕೆಟ್ ನಷ್ಟಕ್ಕೆ 168 ರನ್‌ಗಳ ಬೃಹತ್ ಮೊತ್ತ ಪೇರಿಸಿ ಡಿಕ್ಲೇರ್ ಘೋಷಿಸಿತು. ಈ ಮೂಲಕ ವಿಂಡೀಸ್‌ಗೆ 468 ರನ್‌ಗಳ ಬೃಹತ್ ಗೆಲುವಿನ ಗುರಿಯನ್ನು ಒಡ್ಡಿತು. ದ್ವಿತೀಯ ಇನ್ನಿಂಗ್ಸ್‌ನಲ್ಲೂ ಭಾರತದ ಆರಂಭ ಉತ್ತಮವಾಗಿರಲಿಲ್ಲ. 57 ರನ್ ಗಳಿಸುವುದರೆಡೆಗೆ ಪ್ರಮುಕ ನಾಲ್ಕು ವಿಕೆಟುಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಓಪನರ್‌ಗಳಾದ ಕೆಎಲ್ ರಾಹುಲ್ (6), ಮಯಾಂಕ್ ಅಗರ್ವಾಲ್ (4), ನಾಯಕ ವಿರಾಟ್ ಕೊಹ್ಲಿ (0) ಹಾಗೂ ಚೇತೇಶ್ವರ ಪೂಜಾರ (27) ಬೇಗನೇ ಪೆವಿಲಿಯನ್ ಸೇರಿಕೊಂಡರು. ಆದರೆ ಮುರಿಯದ ಐದನೇ ವಿಕೆಟ್‌ಗೆ 111 ರನ್‌ಗಳ ಜತೆಯಾಟ ನೀಡಿದ ರಹಾನೆ ಹಾಗೂ ವಿಹಾರಿ ತಂಡವನ್ನು ಉತ್ತಮ ಮೊತ್ತದತ್ತ ಮುನ್ನಡೆಸಿದರು. ವಿಂಡೀಸ್ ಪರ ಕೆಮರ್ ರೂಚ್ ಮೂರು ವಿಕೆಟ್ ಪಡೆದರು. ಇದಕ್ಕೂ ಮೊದಲು 87/7 ಎಂಬಲ್ಲಿದ್ದ ಮೂರನೇ ದಿನಾದಟ ಆರಂಭಿಸಿದ ವಿಂಡೀಸ್ 30 ರನ್ ಪೇರಿಸುವಷ್ಟರಲ್ಲಿ ಉಳಿದ ಮೂರು ವಿಕೆಟುಗಳನ್ನು ಕಳೆದುಕೊಂಡು ಆಲೌಟಾಯಿತು. ಇದರೊಂದಿಗೆ 47.1 ಓವರ್‌ಗಳಲ್ಲಿ 117 ರನ್‌ಗಳಿಗೆ ತನ್ನೆಲ್ಲ ವಿಕೆಟುಗಳನ್ನು ಕಳೆದುಕೊಂಡಿತು. ದಿನದಾಟದಲ್ಲಿ ಜಹಮರ್ ಹ್ಯಾಮಿಲ್ಟನ್ (5), ರಖೀಮ್ ಕಾರ್ನ್‌ವಾಲ್ (14) ಹಾಗೂ ಕೆಮರ್ ರೂಚ್ (17) ರನ್ ಗಳಿಸಿದರು. ಭಾರತದ ಪರ ಆರು, ಮೊಹಮ್ಮದ್ ಶಮಿ ಎರಡು ಮತ್ತು ಇಶಾಂತ್ ಶರ್ಮಾ ಹಾಗೂ ರವೀಂದ್ರ ಜಡೇಜಾ ತಲಾ ಒಂದು ವಿಕೆಟನ್ನು ಹಂಚಿಕೊಂಡರು. ಏತನ್ಮಧ್ಯೆ ಎರಡನೇ ದಿನದಾಟದಲ್ಲಿ ಜಸ್ಪ್ರೀತ್ ಬುಮ್ರಾ ಹ್ಯಾಟ್ರಿಕ್ ಸೇರಿದಂತೆ ಆರು ವಿಕೆಟ್ ಸಾಧನೆ ಮಾಡಿದ್ದರು. ಭಾರತ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ ಹನುಮ ವಿಹಾರಿ ಶತಕ (111) ಮತ್ತು ನಾಯಕ ವಿರಾಟ್ ಕೊಹ್ಲಿ (76) ಇಶಾಂತ್ ಶರ್ಮಾ (57) ಹಾಗೂ ಮಯಾಂಕ್ ಅಗರ್ವಾಲ್ (55) ಅರ್ಧಶತಕಗಳ ನೆರವಿನಿಂದ 416 ರನ್‌ಗಳ ಬೃಹತ್ ಮೊತ್ತ ಪೇರಿಸಿತ್ತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Upflfb
