ಮೊಹಾಲಿ: ಈಗ ಬದಲಾವಣೆಯ ಪರ್ವದಲ್ಲಿದೆ. ಶ್ರೀಲಂಕಾ ವಿರುದ್ಧ ಮುಂಬರುವ 2 ಪಂದ್ಯಗಳ ಟೆಸ್ಟ್‌ ಕ್ರಿಕೆಟ್ ಸರಣಿಗೆ ರೋಹಿತ್‌ ಶರ್ಮಾ ಅವರನ್ನು ಹೊಸ ಕ್ಯಾಪ್ಟನ್‌ ಆಗಿ ಆಯ್ಕೆ ಮಾಡಲಾಗಿದ್ದು, ತಂಡದಲ್ಲಿದ್ದ ನಾಲ್ಕು ಅನುಭವಿ ಆಟಗಾರರಿಗೆ ಗೇಟ್‌ ಪಾಸ್‌ ಕೊಟ್ಟ ಸೆಲೆಕ್ಷನ್‌ ಕಮಿಟಿ ಯುವ ಆಟಗಾರರಿಗೆ ಮಣೆ ಹಾಕಿದೆ. ಸತತ ವೈಫಲ್ಯ ಮತ್ತು ಸ್ಥಿರ ಪ್ರದರ್ಶನದ ಕೊರತೆ ಎದುರಿಸಿದ್ದ ಮತ್ತು ಜೊತೆಗೆ ದಣಿದ ಕುದುರೆಗಳಾದ ವೇಗಿ ಇಶಾಂತ್‌ ಶರ್ಮಾ ಮತ್ತು ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ ವೃದ್ಧಿಮಾನ್‌ ಸಹಾ ಅವರನ್ನು ಮಾರ್ಚ್‌ 4ರಂದು ಆರಂಭವಾಗಲಿರುವ 2 ಪಂದ್ಯಗಳ ಟೆಸ್ಟ್‌ ಕ್ರಿಕೆಟ್ ಸರಣಿಯಿಂದ ಕೈಬಿಡಲಾಗಿದೆ. ಇದೀಗ ಈ ಆಟಗಾರರಿಗೆ ವಾರ್ಷಿಕ ಒಪ್ಪಂದದಲ್ಲೂ ಭಾರಿ ಹೊಡೆತ ಬೀಳಲಿದೆ ಎಂದು ಟೈಮ್ಸ್‌ ಆಫ್‌ ಇಂಡಿಯಾ ವರದಿ ಮಾಡಿದೆ. ಈ ಮೊದಲು 'ಎ' ದರ್ಜೆಯ ವೇತನ ಪಡೆಯುತ್ತಿದ್ದ ರಹಾನೆ, ಪೂಜಾರ ಮತ್ತು ಇಶಾಂತ್‌ ಈಗ 'ಬಿ' ದರ್ಜೆಗೆ ಸೇರಿದ್ದಾರೆ. ಸಹಾ 'ಬಿ' ದರ್ಜೆಯಿಂದ 'ಸಿ' ದರ್ಜೆಗೆ ಜಾರಿದ್ದಾರೆ. ಅಂದಹಾಗೆ 'ಎ+' ದರ್ಜೆಯಲ್ಲಿ ಇರುವ ಆಟಗಾರರಿಗೆ ಬಿಸಿಸಿಐ ವಾರ್ಷಿಕವಾಗಿ 7 ಕೋಟಿ ರೂ. ವೇತನ ನೀಡುತ್ತದೆ. ಇನ್ನು 'ಎ', 'ಬಿ' ಮತ್ತು 'ಸಿ' ದರ್ಜೆಯಲ್ಲಿ ಕಾಣಿಸಿಕೊಳ್ಳುವ ಆಟಗಾರರಿಗೆ ಕ್ರಮವಾಗಿ 5, 3 ಮತ್ತು 1 ಕೋಟಿ ರೂ.ಗಳ ವಾರ್ಷಿಕ ವೇತನ ಲಭ್ಯವಾಗುತ್ತದೆ. ಹಾರ್ದಿಕ್ ವೇತನಕ್ಕೂ ಕತ್ತರಿ ಕಳೆದ ವರ್ಷ ಯುಎಇನಲ್ಲಿ ನಡೆದ ಐಸಿಸಿ ಟಿ20 ಕ್ರಿಕೆಟ್ ವಿಶ್ವಕಪ್‌ ಟೂರ್ನಿ ಬಳಿಕ ಸ್ಟಾರ್‌ ಆಲ್‌ರೌಂಡರ್‌ ಹಾರ್ದಿಕ್ ಪಾಂಡ್ಯ ಸ್ಪರ್ಧಾತ್ಮಕ ಕ್ರಿಕೆಟ್‌ನಿಂದ ದೂರ ಉಳಿದಿದ್ದಾರೆ. ಸತತ ಗಾಯದ ಸಮಸ್ಯೆ ಮತ್ತು ಬೆನ್ನು ನೋವಿನ ಸಮಸ್ಯೆಗೆ ಶಸ್ತ್ರಚಿಕಿತ್ಸೆ ಪಡೆದ ಬಳಿಕ ತಮ್ಮ ಶ್ರೇಷ್ಠ ಲಯ ಕಂಡುಕೊಳ್ಳಲು ಹಾರ್ದಿಕ್ ಪರದಾಟ ನಡೆಸಿದ್ದಾರೆ. ಸಂಪೂರ್ಣ ಫಿಟ್ನೆಸ್‌ ಇಲ್ಲದ ಕಾರಣ ಕಳೆದ 2 ವರ್ಷಗಳಿಂದ ಹಾರ್ದಿಕ್ ಪೂರ್ಣ ಪ್ರಮಾಣದಲ್ಲಿ ಬೌಲಿಂಗ್‌ ಮಾಡಿಲ್ಲ. ಇದೇ ಹಾರಣಕ್ಕೆ ಬಿಸಿಸಿಐನ ವಾರ್ಷಿಕ ಒಪ್ಪಂದದಲ್ಲಿ ಹಾರ್ದಿಕ್ ಪಾಂಡ್ಯ ವೇತನಕ್ಕೂ ಕತ್ತರಿ ಬಿದ್ದಿದೆ. 'ಎ' ದರ್ಜೆಯ ಆಟಗಾರನಾಗಿದ್ದ ಹಾರ್ದಿಕ್ ಈಗ 'ಬಿ' ದರ್ಜೆಗೆ ಜಾರಿದ್ದಾರೆ. ಆದರೆ, ಐಪಿಎಲ್‌ 2022 ಟೂರ್ನಿಯಲ್ಲಿ ಗುಜರಾತ್‌ ಜಯಂಟ್ಸ್‌ ತಂಡದ ಕ್ಯಾಪ್ಟನ್‌ ಆಗಿ ನೇಮಕಗೊಂಡಿರುವ ಹಾರ್ದಿಕ್ ಬರೋಬ್ಬರಿ 15 ಕೋಟಿ ರೂ. ಸಂಭಾವನೆಯ ಒಪ್ಪಂದ ಸ್ವೀಕರಿಸಿದ್ದಾರೆ. ಐಪಿಎಲ್‌ ಮೂಲಕ ಸ್ಪರ್ಧಾತ್ಮಕ ಕ್ರಿಕೆಟ್‌ಗೆ ಹಾರ್ದಿಕ್ ಕಮ್‌ಬ್ಯಾಕ್‌ ಮಾಡಲಿದ್ದಾರೆ. 'ಬಿ' ದರ್ಜೆಗೆ ಶಿಖರ್‌ ಧವನ್ ಟೆಸ್ಟ್‌ ತಂಡದಿಂದ ಹೊರಬಿದ್ದ ಬಳಿಕ ಏಕದಿನ ಕ್ರಿಕೆಟ್ ಮತ್ತು ಟಿ20 ಕ್ರಿಕೆಟ್‌ನಲ್ಲಿ ಮಾತ್ರವೇ ಶಿಖರ್‌ ಧವನ್ ಭಾರತ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ. ಯುವ ಆಟಗಾರರ ಎದುರಿನ ಪೈಪೋಟಿ ಕಾರಣ ಟಿ20 ತಂಡದಲ್ಲೂ ಶಿಖರ್‌ಗೆ ಈಗ ಅವಕಾಶ ಇಲ್ಲವಾಗಿದೆ. ಹೀಗಾಗಿ ಒಡಿಐನಲ್ಲಿ ಮಾತ್ರವೇ ಆಡುತ್ತಿರುವ ಶಿಖರ್‌ ಅವರನ್ನು 'ಎ' ದರ್ಜೆಯಿಂದ 'ಬಿ' ದರ್ಜೆಗೆ ಇಳಿಸಲಾಗಿದೆ. ಕೇವಲ ಟೆಸ್ಟ್‌ ಕ್ರಿಕೆಟ್ ಮಾತ್ರವೇ ಆಡುತ್ತಿರುವ ಉಮೇಶ್‌ ಯಾದವ್‌ 'ಸಿ' ದರ್ಜೆಗೆ ಜಾರಿದ್ದಾರೆ. ಭುವನೇಶ್ವರ್‌ ಕುಮಾರ್‌ ಅವರನ್ನೂ 'ಸಿ' ದರ್ಜೆಗೆ ಸೇರಿಸುವ ಸಾಧ್ಯತೆ ಇದೆ. ಈ ನಡುವೆ ಯುವ ಆಟಗಾರರಾದ ಮೊಹಮ್ಮದ್‌ ಸಿರಾಜ್, ಶ್ರೇಯಸ್‌ ಅಯ್ಯರ್‌ ಮತ್ತು ಅಕ್ಷರ್‌ ಪಟೇಲ್‌ 'ಸಿ' ದರ್ಜೆಯಿಂದ 'ಬಿ' ದರ್ಜೆಗೆ ಬಡ್ತಿ ಪಡೆದಿದ್ದಾರೆ. ವಿರಾಟ್‌ ಕೊಹ್ಲಿ, ರೋಹಿತ್‌ ಶರ್ಮಾ ಮತ್ತು ಜಸ್‌ಪ್ರೀತ್‌ ಬುಮ್ರಾ 'ಎ+' ದರ್ಜೆ ಹೊಂದಿರುವ ಆಟಗಾರರಾಗಿದ್ದಾರೆ. ರಿಷಭ್ ಪಂತ್‌, ಕೆಎಲ್‌ ರಾಹುಲ್‌, ರವೀಂದ್ರ ಜಡೇಜಾ, ಮೊಹಮ್ಮದ್‌ ಶಮಿ ಮತ್ತು ಆರ್‌ ಅಶ್ವಿನ್‌ 'ಎ' ದರ್ಜೆಯಲ್ಲಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/JI0CR4s
