ಢಾಕಾ: ಭಾರತ ವಿರುದ್ಧ ನಡೆಯಲಿರುವ ಸರಣಿಗೆ ಟ್ವೆಂಟಿ-20 ಹಾಗೂ ಟೆಸ್ಟ್ ನಾಯಕ ಅಲಭ್ಯರಾಗುವ ಸಾಧ್ಯತೆಯಿದೆ. ಭಾರತ ಹಾಗೂ ಬಾಂಗ್ಲಾದೇಶ ನಡುವಣ ಟ್ವೆಂಟಿ-20 ಸರಣಿಯು ನವೆಂಬರ್ 3ರಂದು ಹೊಸದಿಲ್ಲಿಯಲ್ಲಿ ಆರಂಭವಾಗಲಿದೆ. ಆದರೆ ಬಾಂಗ್ಲಾದೇಶ ಕ್ರಿಕೆಟಿಗರ ಮುಷ್ಕರದಿಂದಾಗಿ ಸರಣಿಗೂ ಮುನ್ನ ನಡೆದಿದ್ದ ಬಹುತೇಕ ಪೂರ್ವಾಭಾವಿ ಶಿಬಿರವನ್ನು ಶಕಿಬ್ ಮಿಸ್ ಮಾಡಿಕೊಂಡಿದ್ದರು. ಎರಡು ಅಭ್ಯಾಸ ಪಂದ್ಯಗಳು ಸೇರಿದಂತೆ ನಾಲ್ಕು ದಿನಗಳ ಪೂರ್ವಭಾವಿ ಶಿಬಿರದಲ್ಲಿ ಒಂದು ದಿನ ಮಾತ್ರ ಶಕಿಬ್ ಭಾಗವಹಿಸಿದ್ದರು. ಇದರಿಂದಾಗಿ ಅಕ್ಟೋಬರ್ 29ರಂದು ತಾಜಾ ತಂಡವನ್ನು ಘೋಷಿಸುವ ಸಾಧ್ಯತೆಯಿದ್ದು, ಶಕಿಬ್ರನ್ನು ಕೈಬಿಡುವುದು ಖಚಿತವೆನಿಸಿದೆ. ಈ ಬಗ್ಗೆ ಬಾಂಗ್ಲಾದೇಶ ಕ್ರಿಕೆಟ್ ಕಾರ್ಯಾಚರಣೆಯ ಮುಖ್ಯಸ್ಥರಾದ ಅಕ್ರಮ್ ಖಾನ್ ಹೇಳಿಕೆಯನ್ನು ನೀಡಿದ್ದಾರೆ. ನಾವು ಅಕ್ಟೋಬರ್ 29ರಂದು ಹೊಸತಾದ ಟಿ20 ತಂಡವನ್ನು ಆರಿಸಲಿದ್ದೇವೆ. ಟೆಸ್ಟ್ ತಂಡದ ಆಯ್ಕೆಗೆ ಮತ್ತಷ್ಟು ಸಮಯದ ಅಗತ್ಯವಿದೆ. ಮೂರು ದಿನಗಳ ಬಳಿಕ ಟೆಸ್ಟ್ ತಂಡವನ್ನು ಆರಿಸಲಿದ್ದೇವೆ ಎಂದು ಹೇಳಿದ್ದಾರೆ. ಶೆರ್ ಇ ಬಾಂಗ್ಲಾ ರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆದ ಅಭ್ಯಾಸ ಶಿಬಿರದ ಬಳಿಕ ಪ್ರಧಾನ ಕೋಚ್ ರಸೆಲ್ ಡೊಮಿಂಗೊ ಜತೆಗೆ ಆಯ್ಕೆದಾರರು ಸುದೀರ್ಘವಾದ ಚರ್ಚೆಯನ್ನು ನಡೆಸಿದ್ದಾರೆ. ಆಸಕ್ತಿದಾಯಕ ಸಂಗತಿಯೆಂದರೆ ಸವಾಲಿನಿಂದ ಕೂಡಿದ ಭಾರತ ಸರಣಿ ಬಗ್ಗೆ ಬಾಂಗ್ಲಾ ಮಂಡಳಿ ಅಧ್ಯಕ್ಷರಾದ ನಜ್ಮುಲ್ ಹಸನ್ ಕರೆದ ಸಭೆಯಲ್ಲಿ ಹಿರಿಯ ಆಟಗಾರರು ಉಪಸ್ಥಿತರಿದ್ದರು. ಆದರೆ ಶಕಿಬ್ ಅನುಪಸ್ಥಿ ಎದ್ದು ಕಾಣಿಸುತ್ತಿತ್ತು. ಟೆಲಿಕಾಂ ಸಂಸ್ಥೆಯೊಂದರ ಜತೆ ಪ್ರಾಯೋಜಕತ್ವ ಒಪ್ಪಂದಕ್ಕೆ ಸಹಿ ಹಾಕಿರುವ ಬಾಂಗ್ಲಾದೇಶ ತಂಡದ ಆಲ್ರೌಂಡರ್ ಶಕಿಬ್ ಅಲ್ ಹಸನ್ ವಿರುದ್ಧ ಬಿಸಿಬಿ ಶೋಕಾಸ್ ನೋಟಿಸ್ ಜಾರಿಗೊಳಿಸಿತ್ತು. ಈ ಮೊದಲು ವೇತನ ಹೆಚ್ಚಳ ಸೇರಿದಂತೆ ವಿವಿಧ ಬೇಡಿಕೆಗಳನ್ನು ಮುಂದಿರಿಸಿ ಬಾಂಗ್ಲಾದೇಶ ಆಟಗಾರರು ಮುಷ್ಕರ ಹಮ್ಮಕೊಂಡಿದ್ದರು. ಬಳಿಕ ಬಹುತೇಕ ಬೇಡಿಕೆಗಳನ್ನು ಮಂಡಳಿ ಈಡೇರಿಸಿತ್ತು. ನವೆಂಬರ್ 3ರಂದು ದಿಲ್ಲಿಯ ಅರುಣ್ ಜೇಟ್ಲಿಸ್ಟೇಡಿಯಮ್ನಲ್ಲಿ ಟಿ20 ಸರಣಿಗೆ ಚಾಲನೆ ದೊರೆಯಲಿದೆ. ನ.7 ಮತ್ತು 10ರಂದು ಕ್ರಮವಾಗಿ ರಾಜ್ಕೋಟ್ ಹಾಗೂ ನಾಗಪುರದಲ್ಲಿಸರಣಿಯ 2 ಮತ್ತು 3ನೇ ಪಂದ್ಯ ನಡೆಯಲಿವೆ. ನವೆಂಬರ್ 14ರಿಂದ 18ರವರೆಗೆ ಇಂದೋರ್ನಲ್ಲಿ ಮೊದಲ ಟೆಸ್ಟ್ ಹಾಗೂ ನ.22ರಿಂದ 26ರವರೆಗೆ ಕೋಲ್ಕೊತಾದಲ್ಲಿಎರಡನೇ ಟೆಸ್ಟ್ ನಿಗದಿಯಾಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3682TpT
